ରାଉରକେଲା,୨୯ା୪(ବିପ୍ଳବ ରଞ୍ଜନ ଦାଶ): ରାଉରକେଲା ସହରର ଜୀବନରେଖା କୁହାଯାଉଥିବା ବ୍ରାହ୍ମଣୀ, ଶଙ୍ଖ ଓ କୋଏଲ୍ ନଦୀର ପରିସୀମା ଦିନକୁଦିନ ସଙ୍କୁଚିତ ହେବାରେ ଲାଗିଛି। ଏହାର ପ୍ରଭାବ ସିଧାସଳଖ ସହରବାସୀଙ୍କ ଉପରେ ପଡ଼ୁଛି। ଆଗକୁ ସହରର ନଦୀଗୁଡ଼ିକର ସୁରକ୍ଷା ପ୍ରତି ଯତ୍ନଶୀଳ ନ ହେଲେ ଭବିଷ୍ୟତରେ ଉତ୍କଟ ଜଳସଙ୍କଟ ସହରବାସୀଙ୍କ ପାଇଁ ଭୟାବହ ପରିସ୍ଥିତି ସୃଷ୍ଟି କରିବ। ପ୍ରକାଶଥାଉ କି, ଏକଦା ବ୍ରାହ୍ମଣୀ ନଦୀ ସହରବାସୀଙ୍କ ପାନୀୟ ଆବଶ୍ୟକତାକୁ ପୂରଣ କରେ। ରାଉରକେଲା ଜଳ ନିଗମ ବିଭାଗ ତରଫରୁ ବ୍ରାହ୍ମଣୀ ନଦୀରୁ ଦୈନିକ ୬୧ ମିଲିୟନ ଲିଟର ପାଣି ଉତ୍ତୋଳନ ହୋଇ ସହରସାରା ବିତରଣ ହୁଏ। ତନ୍ମଧ୍ୟରୁ ୨୦ଭାଗ ପାଣି ବ୍ୟବହାର ପରେ ଅପବ୍ୟବହାର ହୋଇ ସିଧାସଳଖ ସ୍ବିରେଜ ସିଷ୍ଟମ ମାଧ୍ୟମରେ ନଦୀରେ ମିଶୁଥିବା ବେଳେ ବଳକା ପାଣି ଦୈନିକ ଅପବ୍ୟବହାର ହୋଇ ନଷ୍ଟ ହେଉଛି। ସହରରେ ଏହିଭଳି ଜଳର ଅପବ୍ୟବହାର ଆଗକୁ ଜଳ ସଙ୍କଟ ପାଇଁ ପ୍ରମୁଖ କାରଣ ସାଜିବ ବୋଲି ସହରର ବୁଦ୍ଧିଜିବୀ ମହଲରେ କୁହାଯାଉଛି। ନଦୀଘାଟରୁ ବାଲି ଉତ୍ତୋଳନ ଓ ଘର ନିର୍ମାଣ ଯୋଗୁ ନଦୀ ସଙ୍କୁଚିତ ହେବାରେ ଲାଗିଛି। ରାଉରକେଲା ଜଳ ବିଭାଜନ ବିଭାଗ ପ୍ରତିବର୍ଷ କୋଟି କୋଟି ଟଙ୍କା ଖର୍ଚ୍ଚ କରି ସହରର ପ୍ରତ୍ୟେକ ଘରକୁ ଟ୍ୟାପ୍ ଓ ପାଇପ୍ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଉଛି। ତଥାପି ଜଳ ସମସ୍ୟା ଦେଖାଦେଉଛି। ରାଉରକେଲା ଜଳ ନିଗମ (ଓ୍ବାଟ୍କୋ)କୁ ଆର୍ଥିକ ବର୍ଷ ୨୦୨୦-୨୧ରେ ସହରର ୨୨ଟି ଜୋନକୁ ପାନୀୟ ଜଳ ପହଞ୍ଚାଇବା ପାଇଁ ଆବଶ୍ୟକୀୟ ଜଳ ପ୍ରକଳ୍ପ ନିର୍ମାଣ ନିମନ୍ତେ ୧୨୯ କୋଟି ୬୪ ଲକ୍ଷ ବ୍ୟୟବରାଦ ହୋଇଛି। ଆରଏମ୍ସି ଟ୍ୟାପ୍ ଯୋଗେ ମୋଟ ୩ ଲକ୍ଷ ଲୋକଙ୍କ ପାଖକୁ ଦୈନିକ ବିଶୁଦ୍ଧ ପାନୀୟ ଜଳ ଯୋଗାଇବା ପାଇଁ ଆର୍ଥିକ ବର୍ଷ ୨୦୨୨-୨୩ରେ ୬ କୋଟି ୫୮ ଲକ୍ଷ ଟଙ୍କା ବ୍ୟୟବରାଦ କରିଛି। ଏହିସବୁ ପ୍ରକଳ୍ପର ସଠିକ ପରିଚାଳନା ପାଇଁ ଜଳର ଆବଶ୍ୟକତା ରହିଛି। ଏନେଇ ରାଉରକେଲା ଓ୍ବାଟ୍କୋ ମୁଖ୍ୟ ପରିଚାଳକ ପ୍ରତାପ କେଶରୀ ମହାନ୍ତିଙ୍କୁ ପଚାରିବାରୁ, ସହରରେ ଅନବରତ ମେଗା ଜଳ ପ୍ରକଳ୍ପ ନିର୍ମାଣ କାର୍ଯ୍ୟ ଚାଲିଛି। ଜଳ ବିନା ପ୍ରକଳ୍ପଗୁଡ଼ିକ ଜନହିତରେ ଲାଗିବା ଅସମ୍ଭବ। ତେଣୁ ଆଗକୁ ଯେଭଳି ସହରରେ ଜଳ ଅପବ୍ୟବହାର ହ୍ରାସ ହେବ, ସେ ଦିଗରେ ବିହିତ ପଦକ୍ଷେପ ଗ୍ରହଣ କରାଯିବ ବୋଲି ମୁଖ୍ୟ ପରିଚାଳକ ମହାନ୍ତି କହିଥିଲେ।
