ନିରାକାରପୁର,୧୦ା୫(ମାନସ ଚନ୍ଦ୍ର ପଟ୍ଟନାୟକ): ଚାଷ ଓ ଚାଷୀଙ୍କ ଉନ୍ନତ୍ତି ସରକାର ବିଭନ୍ନ ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ବିଭାଗୀୟ ଅଧିକାରୀଙ୍କ ଅବହେଳାରୁ ତଳସ୍ତରରେ କାର୍ଯ୍ୟକ୍ଷମ ହୋଇପାରୁନାହିଁ। ଏଭଳି ଦୃଶ୍ୟ ଖୋର୍ଦ୍ଧା ଜିଲା ଲେଣ୍ଡୋ ପଞ୍ଚାୟତ ଦେଇ ଯାଇଥିବା କେନାଲ କ୍ଷେତ୍ରରେ ଦେଖିବାକୁ ମିଳିଛି। ଏହି କେନାଲଟି ପୋତିହୋଇଯିବାରୁ ଏବେ ଚାଷୀଙ୍କ କାମରେ ଲାଗି ପାରୁନାହିଁ। ଏଥିପ୍ରତି ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି।
ସୂଚନାଥାଉ କି, ରାମେଶ୍ୱର ବ୍ୟାରେଜଠାରୁ ଲେଣ୍ଡୋ ପଞ୍ଚାୟତ ଅନ୍ତର୍ଗତ ଭୂଷଣ୍ଡପୋଖରୀ ଓ ଫୁଲଦୋଳ ପଡିଆ ଦେଇ କଣାସ ବ୍ଲକର ମୈତ୍ରତ୍ରିଲୋଚନପୁର ପର୍ଯ୍ୟନ୍ତ କେନାଲ ଖୋଳାଯାଇଥିଲା। ଏହି କେନାଲ ଯୋଗୁ ସ୍ଥାନୀୟ ଲେଣ୍ଡୋ ପଞ୍ଚାୟତ ଅନ୍ତର୍ଗତ ଗୋପୀନାଥପୁର, ପାଟପୁର, ଆସେଲି, ଆରେଡି, ଅରାଞ୍ଚଳ ଏପରିକି କଣାସ ବ୍ଲକର ମୈତ୍ର-ତ୍ରିଲୋଚନପୁର ଆଦି ଅଞ୍ଚଳର ଚାଷୀମାନେ ଉପକୃତ ହେଉଥିଲେ। ଧାନ ଫସଲ ପରେ ଏହି କେନାଲ କୂଳବର୍ତ୍ତୀ ଅଞ୍ଚଳରେ ବିଭିନ୍ନ ପନିପରିବା ଚାଷ କରି ଚାଷୀ ଉପକୃତ ହେଉଥିଲେ। ହେଲେ ଗତ ‘ଫନୀ’ ବାତ୍ୟା ପରଠାରୁ ବିଭାଗୀୟ ଅଧିକାରୀମାନଙ୍କ ଦୂରଦୃଷ୍ଟି ଅଭାବରୁ ଏବେ ଏହି କେନାଲ ପୋତି ହୋଇ ଅସ୍ତିତ୍ୱ ହରାଇ ବସିଛି। ଫଳରେ ଦୀର୍ଘ ୫ବର୍ଷ ହେବ ଏହି କେନାଲଟି ଲୋକଙ୍କ କାମରେ ଲାଗୁନାହିଁ। ତେବେ କେନାଲ ପୋତି ହୋଇଯିବାରୁ ଏବେ ବର୍ଷା ଜଳ କେନାଲକୁ ଯିବା ପରିବର୍ତ୍ତେ ବିଭିନ୍ନ ସ୍ଥାନରେ ଜମି ରହୁଛି। ଅନ୍ୟପଟେ ଆବଶ୍ୟକ ଅନୁସାରେ ଜମିକୁ ପାଣି ଯାଇ ନ ପାରିବାରୁ ଧାନଚାଷ କାର୍ଯ୍ୟରେ ସମସ୍ୟା ସୃଷ୍ଟି ହେଉଛି ବୋଲି ଅଶୋକ କୁମାର ରାଉତରାୟ, ପୂର୍ଣ୍ଣଚନ୍ଦ୍ର ପ୍ରଧାନ, ସଦାଶିବ ପ୍ରଧାନ ପ୍ରମୁଖ ଚାଷୀ ଅଭିଯୋଗ କରିଛନ୍ତି। କେନାଲ ପୋତି ହୋଇଯାଇଥିବା ନେଇ ବିଭାଗୀୟ ଅଧିକାରୀଙ୍କୁ ଅବଗତ ସତ୍ତ୍ୱେ କୌଣସି ପଦକ୍ଷେପ ନିଆଯାଉ ନାହିଁ। ଏପରିକି ଉକ୍ତ କେନାଲର ପୁନଉଦ୍ଧାର ନ ହେବାରୁ ଲେଣ୍ଡୋ ଛକସ୍ଥିତ ନୂଆ ଜଗନ୍ନାଥ ସଡ଼କ ଠାରୁ ଫୁଲଦୋଳ ପଡିଆ ପର୍ଯ୍ୟନ୍ତ ଆସିଥିବା ଏହି କେନାଲର ଉଭୟ ପାର୍ଶ୍ୱ ଏବେ ଜବର ଦଖଲକାରୀଙ୍କ କବ୍ଜାରେ ରହିଛି। ସମୟକ୍ରମମେ ଏହି କେନାଲ ଅଧିକାଂଶ ସ୍ଥାନରେ ପୋତି ହୋଇଯିବାରୁ ଆଉ ଚାଷୀଙ୍କ କାର୍ଯ୍ୟରେ ଲାଗିପାରୁନାହିଁ ବୋଲି ଚାଷୀମାନେ ଅଭିଯୋଗ କରିଛନ୍ତି।ତୁରନ୍ତ ଉକ୍ତ କେନାଲର ପୁନଉଦ୍ଧାର ସହ ଜବରଦଖଲ ମୁକ୍ତ କରିବା ନିମନ୍ତେ ଚାଷୀ ସୁଶାନ୍ତ ବିଶ୍ୱାଳ, ମହେନ୍ଦ୍ର ବିଶ୍ୱାଳ, କେଦାର ଛୋଟରାୟ, ସଚ୍ଚି ବିଶ୍ୱାଳ, ଡମ୍ବରୁ ନାୟକ ପ୍ରମୁଖ ନିବେଦନ କରିଛନ୍ତି । ଏ ସମ୍ପର୍କରେ ଏସ୍ଡିଓ କୃଷ୍ଣ ଚନ୍ଦ୍ର ସେଠୀ କହିଛନ୍ତି, ନିର୍ବାଚନ କାର୍ଯ୍ୟ ସରିଲେ କେନାଲର ପୁନଉଦ୍ଧାର ପାଇଁ ପଦକ୍ଷେପ ନିଆଯିବ।