ଭୁବନେଶ୍ୱର,୧୨।୪(ବ୍ୟୁରୋ): ରାଜ୍ୟରେ ପାଣି ବ୍ୟବହାରକାରୀଙ୍କୁ ଚଳିତ ମାସଠାରୁ ଅଧିକ ଟିକସ ଦେବାକୁ ପଡ଼ିବ। ୨୦୨୧-୨୨ ଆର୍ଥିକ ବର୍ଷ ପାଇଁ ରାଜ୍ୟ ସରକାର ୧୦% ଜଳକର ବୃଦ୍ଧି କରିଛନ୍ତି। ଓଡ଼ିଶା ଜଳସେଚନ(ସଂଶୋଧନ) ରୁଲ୍ସ-୨୦୧୬ ଅନୁସାରେ ଜଳକର, ଜଳ ଉଠାଣ ଓ ବ୍ୟବହାର ନିମନ୍ତେ ଲାଇସେନ୍ସ ଫି’କୁ ବାର୍ଷିକ ୧୦ପ୍ରତିଶତ ବୃଦ୍ଧି କରାଯାଇଛି। ଏହି ବର୍ଦ୍ଧିତ ଜଳକର ଚଳିତ ମାସ ୧ତାରିଖରୁ ଲାଗୁ କରାଯାଇଛି। ଜଳ ସମ୍ପଦ ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତି ଅନୁସାରେ ଯେଉଁ ଶିଳ୍ପସଂସ୍ଥା ୫କ୍ୟୁସେକରୁ କମ୍ ଜଳ ବ୍ୟବହାର କରୁଛନ୍ତି, ସେମାନଙ୍କୁ ପ୍ରତି ହଜାରେ ଲିଟର ଜଳ ପିଛା ଏବେ ୬ଟଙ୍କା୩୦ ପଇସା ଦେବାକୁ ପଡ଼ିବ। ପୂର୍ବରୁ ଏହା ୫ଟଙ୍କା ୮୮ ପଇସା ରହିଥିଲା। ୫କ୍ୟୁସେକ୍ କିମ୍ବା ଏହାଠାରୁ ଅଧିକ ଜଳ ବ୍ୟବହାର କରୁଥିବା ସଂସ୍ଥା ପ୍ରତି ହଜାର ଲିଟର ଜଳ ପିଛା ୭ଟଙ୍କା ୮୪ପଇସା ପରିବର୍ତ୍ତେ ୮ଟଙ୍କା ୪୦ପଇସା ଦେବେ। ଏଥିସହ ସରକାର ଜଳ ବିଦ୍ୟୁତ୍ ପ୍ରକଳ୍ପ କ୍ଷେତ୍ରରେ ପ୍ର୍ରତ୍ୟେକ କିଲୋଓ୍ବାଟ ଆଓ୍ବାର(କେଡବ୍ଲ୍ୟୁଏଚ୍) ଜଳ ଉତ୍ପନ୍ନ ନିମନ୍ତେ ୧ପଇସାରୁ ଦେଢ଼ ପଇସାକୁ ବୃଦ୍ଧି କରାଯାଇଛି। ମ୍ୟୁନିସିପାଲିଟି, ଏନ୍ଏସି ଏବଂ ଗ୍ରାମ୍ୟ କ୍ଲଷ୍ଟରରେ ବ୍ୟବହାର କରାଯାଉଥିବା ପାନୀୟ ଜଳ ପାଇଁ ଏବେ ପ୍ରତି ହଜାର ଲିଟର ଜଳପିଛା ୩୭.୫ପଇସା ଦେବାକୁ ପଡ଼ିବ ଯାହାକି, ପୂର୍ବରୁ ୩୫ ପଇସା ରହିଥିଲା।
ଅପରପକ୍ଷରେ ବାଣିଜି୍ୟକ ପ୍ରତିଷ୍ଠାନ ନିର୍ମାଣ ପାଇଁ ବ୍ୟବହାର ହେଉଥିବା ଜଳ ଉପରେ ମଧ୍ୟ ଅଧିକ ଟିକସ ଲାଗିଛି। ଏହି ନିର୍ମାଣ କ୍ଷେତ୍ରରେ ପ୍ରତି ହଜାର ଲିଟର ପିଛା ୯ଟଙ୍କା ୯୪ପଇସା ପରିବର୍ତ୍ତେ ଏବେ ୧୦ଟଙ୍କା ୬୫ପଇସା ଦେବାକୁ ପଡ଼ିବ। ସେହିପରି ପାଣି ଟାଙ୍କିକୁ ଜଳ ଯୋଗାଣ ନିମନ୍ତେ ୧୪ପଇସା ବଦଳରେ ୧୫ପଇସା ଦିଆଯିବ। ପିଇବା ପାଇଁ ଟାଙ୍କି କ୍ଷେତ୍ରରେ ୭.୫ପଇସା ଦେବାକୁ ପଡ଼ିବ। ଏପରି କି ଇଟା ନିର୍ମାଣ ଏବଂ ଟାଇଲ୍ ପ୍ରସ୍ତୁତି ପାଇଁ ବ୍ୟବହାର ହେଉଥିବା ଜଳ ନିମନ୍ତେ ପ୍ରତି ହଜାର ଇଟାକୁ ଜଳକର ବାବଦକୁ ୪୨ ପଇସା ପରିବର୍ତ୍ତେ ଏଥର ୪୫ ପଇସା ଦେବାକୁ ପଡ଼ିବ।
ଏତଦ୍ବ୍ୟତୀତ ଜଳ ବ୍ୟବହାର ପାଇଁ ଲାଇସେନ୍ସ ଫି’କୁ ପୂର୍ବ ଆର୍ଥତ୍କ ବର୍ଷ ଅପେକ୍ଷା ୧୦% ବୃଦ୍ଧି କରାଯାଇଛି। ପ୍ରତି ହଜାରେ ଇଟା ପାଇଁ ଲାଇସେନ୍ସ ବାବଦ ୩୭ଟଙ୍କା ୫୦ପଇସା ଦେବାକୁ କୁହଯାଯାଇଥିବାବେଳେ ୫କ୍ୟୁସେକରୁ କମ୍ ଜଳ ବ୍ୟବହାର କରୁଥିବା ଶିଳ୍ପ ଓ ବାଣିଜି୍ୟକ ପ୍ରତିଷ୍ଠାନରେ ବ୍ୟବହାର ହେଉଥିବା ପ୍ରତି ହଜାର ଲିଟର ପାଣି ପିଛା ୫ଟଙ୍କା ୧୦ ପଇସା ଦେବାକୁ ନିଷ୍ପତ୍ତି ହୋଇଛି। ସେହିପରି ୫କ୍ୟୁସେକ୍ରୁ ଅଧିକ ଜଳ ବ୍ୟବହାର କ୍ଷେତ୍ରରେ ୬ଟଙ୍କା ୭୫ପଇସା ଦେବାକୁ ପଡ଼ିବ। ସେହିପରି ଶିଳ୍ପ ଏବଂ ବାଣିଜି୍ୟକ ପ୍ରତିଷ୍ଠାନରେ ପ୍ରତି ହଜାର ଲିଟର ଜଳ ବ୍ୟବହାର ପାଇଁ ଲାଇସେନ୍ସ ଫି’ ବାବଦକୁ ଏବେ ୧୦ଟଙ୍କା ୨୦ପଇସା ଦେବାକୁ ପଡ଼ିବ। ପୂର୍ବରୁ ଏହା ୯ଟଙ୍କା ୫୨ପଇସା ରହିଥିଲା।