ନୂଆଦିଲ୍ଲୀ/ଭୁବନେଶ୍ୱର,୩୦ା୮(ବ୍ୟୁରୋ): ଆର୍ଥିକ ବର୍ଷ ୨୦୨୧-୨୨ଠାରୁ ୨୦୨୫-୨୬ ଯାଏ ଦେଶର ଗ୍ରାମ ପଞ୍ଚାୟତଗୁଡିକୁ ୧.୪୨ ଲକ୍ଷ କୋଟି ଟଙ୍କାର ଅନୁଦାନ କେନ୍ଦ୍ର ସରକାର ଯୋଗାଇ ଦେବେ। ପାନୀୟ ଜଳ ଯୋଗାଣ ଏବଂ ପରିମଳ ବ୍ୟବସ୍ଥା ସୁଧାରିବା ଲାଗି ଏହା ଖର୍ଚ୍ଚ ହେବ। ଏହି ରାଶି ପ୍ରଦାନ ଲାଗି ପଞ୍ଚଦଶ ଅର୍ଥ କମିଶନ ସୁପାରିସ କରିଥିବା ଜଣାପଡ଼ିଛି। ଉକ୍ତ ଯୋଜନାରେ ଓଡ଼ିଶାକୁ ଚଳିତ ଆର୍ଥିକ ବର୍ଷ ୧,୦୦୨ କୋଟି ଟଙ୍କା ଅନୁଦାନ ମିଳିବ। ସେହିଭଳି ଆଗାମୀ ୪ ଆର୍ଥିକ ବର୍ଷରେ ଯଥାକ୍ରମେ- ୧୦୩୬ କୋଟି, ୧୦୪୮ କୋଟି, ୧,୧୧୦ କୋଟି ଏବଂ ୧,୦୮୪ କୋଟି ଟଙ୍କା ମିଳିବ। ଏହି ବର୍ଷଗୁଡିକରେ ଓଡ଼ିଶା ମୋଟ ୫,୨୮୦ କୋଟି ଟଙ୍କା ପାଇବ ବୋଲି ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ଗ୍ରାମାଞ୍ଚଳରେ ବସବାସ କରୁଥିବା ଲୋକଙ୍କ ଜୀବନ ଧାରଣ ମାନରେ ଉନ୍ନତି ଏବଂ ସ୍ବାସ୍ଥ୍ୟାବସ୍ଥା କ୍ଷେତ୍ରରେ ଅନେକ ପରିବର୍ତ୍ତନ ଆସିବ ବୋଲି ଆଶା କରାଯାଉଛି। ଅର୍ଥ ମନ୍ତ୍ରଣାଳୟ ଅଧୀନ ବ୍ୟୟ ବିଭାଗ ପକ୍ଷରୁ ଏ ନେଇ ଗାଇଡ୍ଲାଇନ ଜାରି କରାଯାଇଛି। କେଉଁ ବର୍ଷ କେତେ ଅର୍ଥ ପ୍ରଦାନ କରାଯିବ ଏବଂ ଏହା କେଉଁ ଉପାୟରେ ଖର୍ଚ୍ଚ ହେବ ସେ ନେଇ ଏଥିରେ ଉଲ୍ଲେଖ ରହିଛି। ଏହି ଯୋଜନା ଲାଗି କେନ୍ଦ୍ର ସରକାରଙ୍କ ଜଳ ଶକ୍ତି ମନ୍ତ୍ରଣାଳୟର ପାନୀୟ ଜଳ ଏବଂ ପରିମଳ ବିଭାଗ ନୋଡାଲ ବିଭାଗ ଭାବେ କାର୍ଯ୍ୟ କରିବ ବୋଲି ଜଣାପଡିଛି।
ଗ୍ରାଣ୍ଟ ଭାବେ ଏହି ଅର୍ଥ ପ୍ରଦାନ କରାଯିବ। ପ୍ରଥମ କିସ୍ତିରେ ୨୫ ରାଜ୍ୟକୁ ଉକ୍ତ ରାଶି ଯୋଗାଣ କରାଯିବ ବୋଲି ଜଣାପଡିଛି। ଚଳିତବର୍ଷ ବଜେଟରେ ୫୦ ହଜାର କୋଟିର ସହାୟତା, ଜଳ ଜୀବନ ମିଶନରେ ୩୦ ହଜାର କୋଟି ରାଜ୍ୟଗୁଡିକର ଅଂଶ, ଟାଏଡ୍ ଗ୍ରାଣ୍ଟ ଭାବେ ୨୮ ହଜାର କୋଟି ବ୍ୟୟ ବରାଦ କରାଯାଇଛି। ଏହା ଗ୍ରାମ୍ୟ ଅର୍ଥନୀତି ସୁଦୃଢ କରିବା ଆଶା କରାଯାଉଛି। ଚଳିତ ଆର୍ଥିକ ବର୍ଷରେ ପାନୀୟ ଜଳ ଏବଂ ପରିମଳ ଲାଗି ୨୬,୯୪୦ କୋଟି ଅନୁଦାନ ସରକାର ଦେବେ। ସେହିଭଳି ଆଗାମୀ ୪ ଆର୍ଥତ୍କ ବର୍ଷରେ ଯଥାକ୍ରମେ ୨୭,୯୦୮ କୋଟି, ୨୮,୨୧୨ କୋଟି, ୨୯,୮୮୦ କୋଟି ଏବଂ ୨୯,୧୪୪ କୋଟି ଟଙ୍କା ପ୍ରଦାନ କରିବା ନେଇ ଯୋଜନା କରିଛନ୍ତି। କେନ୍ଦ୍ର ସରକାର ଲୋକଙ୍କୁ ପାଇପ ଯୋଗେ ପାନୀୟ ଜଳ ଯୋଗାଣ ପାଇଁ ଯୋଜନା କରିଛନ୍ତି। ରାଜ୍ୟଗୁଡିକର ସହଯୋଗରେ ୨୦୧୯ ଅଗଷ୍ଟରୁ ଜଳଜୀବନ ମିଶନ କାର୍ଯ୍ୟକାରୀ ହେଉଛି। ଏଥିରେ ୩.୬୦ ଲକ୍ଷ କୋଟି ଟଙ୍କା ଖର୍ଚ୍ଚ ଯୋଜନା ରଖାଯାଇଛି।