ନୀଳଗିରି,୧୯।୪ (ସ୍ବ.ପ୍ର) ପ୍ରକୃତି, ପ୍ରାଣୀପକ୍ଷୀ ଆଉ ମଣିଷ ମଧ୍ୟରେ ରହିଛି ନିବିଡ଼ ସମ୍ପର୍କ। ପରିବେଶର ଜାଗ୍ରତ ପ୍ରହରୀ ସାଜି ନୀଳଗିରିର କେତେଜଣ ପ୍ରକୃତିପ୍ରେମୀ ପ୍ରଚଣ୍ଡ ଗ୍ରୀଷ୍ମପ୍ରବାହକୁ ଆଖିଆଗରେ ରଖି ଏକ ନିଆରା ପ୍ରୟାସ ଆରମ୍ଭ କରିଛନ୍ତି। ସଂରକ୍ଷଣ ଜଙ୍ଗଲରେ ପକ୍ଷୀ ଓ ସହରରେ ପ୍ରାଣୀମାନଙ୍କ ପାଇଁ ଜଳ ବ୍ୟବସ୍ଥା କରିଛନ୍ତି। ପ୍ରତ୍ୟେକ ଦିନ ସେମାନେ ଏହି ଜଳପାତ୍ରରେ ଜଳ ମଧ୍ୟ ଭର୍ତ୍ତି କରୁଛନ୍ତି। ଫଳରେ ବହୁ ପ୍ରାଣୀପକ୍ଷୀ ଏଥିରେ ତୃଷା ମେଣ୍ଟାଉଥିବା ପରିଲକ୍ଷିତ ହୋଇଛି।
ନୀଳଗିରି ଅଞ୍ଚଳର ମହାବୀର ଫାଉଣ୍ଡେସନ ପକ୍ଷରୁ ପକ୍ଷୀମାନଙ୍କ ଉଦ୍ଦେଶ୍ୟରେ ଜଳଦାନ ଉଦ୍ଦେଶ୍ୟରେ ତିନିକୋଶିଆ ସଂରକ୍ଷିତ ଜଙ୍ଗଲର ୩୦ରୁ ଅଧିକ ସ୍ଥାନରେ ବ୍ୟବସ୍ଥା କରାଯାଇଛି। ଏଥିସହ ନୀଳଗିରି ବଜାରର ବିଭିନ୍ନ ସ୍ଥାନରେ ପ୍ରାଣୀମାନଙ୍କ ପାଇଁ ଜଳପାତ୍ର ବ୍ୟବସ୍ଥା କରାଯାଇଛି। ପ୍ରତ୍ୟେକ ଦିନ ଏହି ଜଳପାତ୍ରରେ ଜଳ ମଧ୍ୟ ଭର୍ତ୍ତି କରାଯାଉଛି। ଏହି ଉଦ୍ୟମ ବଳରେ ନିରୀହ ପକ୍ଷୀଙ୍କ ଜୀବନ ବଞ୍ଚତ୍ବା ସହ ବନାଞ୍ଚଳବାସୀଙ୍କ ମଧ୍ୟରେ ବନ୍ୟଜନ୍ତୁଙ୍କ ସୁରକ୍ଷା ପାଇଁ ସଚେତନତା, ଦାୟିତ୍ୱବୋଧ ଓ ପ୍ରକୃତିକୁ ଅଧିକ ଭଲ ପାଇବା ସମ୍ବନ୍ଧୀୟ ବାର୍ତ୍ତା ସୃଷ୍ଟି କରିବ ବୋଲି ଉକ୍ତ ଫାଉଣ୍ଡେଶନ ପ୍ରତିଷ୍ଠାତା ବିଦ୍ୟାଧର ବାରିକ କହିଛନ୍ତି। ସେହିପରି ସଙ୍ଗଠନ ପକ୍ଷରୁ ନିସ୍ବାର୍ଥପର ସେବା ସମାଜ ପାଇଁ ଜାରି ରହିଛି ଏବଂ ଆଗକୁ ମଧ୍ୟ ଜାରି ରହିବ ବୋଲି ମତ ରଖିଛନ୍ତି। ଏଭଳି ବିଭିନ୍ନ ସଚେତନତାର କାର୍ଯ୍ୟକ୍ରମ ସହ ସଙ୍ଗଠନ ପକ୍ଷରୁ ପୂର୍ବରୁ ନୀଳଗିରି ଅଞ୍ଚଳରେ ନିଆଁଦାଉରୁ ଜଙ୍ଗଲକୁ ରକ୍ଷା କରିବା ଉଦ୍ଦେଶ୍ୟରେ ବିଭିନ୍ନ ସ୍ଥାନରେ ବ୍ୟାନର ମାରି ପାଦଚଲା ଲୋକଙ୍କୁ ପ୍ରକୃତିକୁ ବଞ୍ଚାଇବାକୁ ନିବେଦନ ମଧ୍ୟ କରାଯାଇଥିଲା। କାର୍ଯ୍ୟକ୍ରମରେ ସଙ୍ଗଠନର ସଭାପତି ବିଶ୍ୱସୁନ୍ଦର ବାରିକ, ସରୋଜ ବାରିକ, ଜୟନ୍ତ ଜୀ, ଦିଗମ୍ବର ବେହେରା, ପ୍ରଦୀପ ମଲିକ ଓ ପ୍ରମେୟଜ୍ୟୋତି ବେହେରା ପ୍ରମୁଖ ସାମିଲ ଥିଲେ।