ଖଡ଼ିଆଳ,୧୫।୭(ସୁଜିତ କୁମାର ପ୍ରଧାନ): ନୂଆପଡ଼ା ଜିଲା ଖଡ଼ିଆଳସ୍ଥିତ ତିଖାଳି ନିମ୍ନ ଇନ୍ଦ୍ର ଜଳସେଚନ ପ୍ରକଳ୍ପରୁ ସୋମବାର ଖରିଫ ଚାଷ ପାଇଁ କେନାଲ ଦ୍ବାରା ଜଳ ଛଡ଼ାଯାଇଛି।
ଫଳରେ ନୂଆପଡ଼ା ଏବଂ ବଲାଙ୍ଗୀର ଜିଲାର ୩୫ ହଜାର ୫ଶହ ୫୭ ଜଣ ଚାଷୀଙ୍କ ୨୯ ହଜାର ୯୦୦ ହେକ୍ଟର ଜମିକୁ ଜଳସେଚନ କରିବାକୁ ଲକ୍ଷ୍ୟ ରଖାଯାଇଛି। ପ୍ରକଳ୍ପର ବାମ ଓ ଦକ୍ଷିଣ କେନାଲରେ ଜଳ ଛଡ଼ାଯାଇଛି। ଏହାଦ୍ୱାରା ବର୍ଷାଭାବରୁ ଦେଖାଯାଇଥିବା ସମସ୍ୟା ସମାଧାନ ହେବ ବୋଲି ଆଶା କରାଯାଉଛି।
ପାଣି ପଞ୍ଚାୟତ ଓ ବିଭାଗୀୟ ଅଧିକାରୀ ଯୋଗଦେଇ ପୂଜାର୍ଚ୍ଚନା ପରେ ୪ଗୋଟି ଗେଟ୍ ମଧ୍ୟରୁ ୨ ଓ ୩ ନମ୍ବର ଗେଟ୍ ଖୋଲାଯାଇଛି। ୨ ଗେଟ୍ରେ ୪୦କ୍ୟୁବିକ ଜଳ ନିଷ୍କାସନ ହେଉଥିବା ଜଣାପଡିଛି।
ଅଧୀକ୍ଷଣ ଯନ୍ତ୍ରୀ ବଙ୍ଗୋମୁଣ୍ଡା ସୂର୍ଯ୍ୟ କୁମାର ପାଣିଗ୍ରାହୀ, ଖଡ଼ିଆଳ ଅଧୀକ୍ଷଣ ଯନ୍ତ୍ରୀ ସୌମ୍ୟ କିଶୋର ଜୟପୁରିଆ, ସହକାରୀ ଯନ୍ତ୍ରୀ ସୌରଭ କୁମାର ଦାସ, ଡ୍ୟାମ୍ ସହକାରୀ ଯନ୍ତ୍ରୀ ହେମ କୁମାର ନାଏକ, ପାଣିପଞ୍ଚାୟତ ସଭାପତି ମଞ୍ଜେସ ମେହେର, ସମ୍ପାଦକ ମିଳନ ଯାଦବ ପ୍ରମୁଖ ଉପସ୍ଥିତ ଥିଲେ।