ଶିକାରୀ ଜୀବନ ଛାଡ଼ି ମଣିଷ ଚାଷବାସ କରିବାପରେ ନିଜ ଆଖପାଖରେ ଥିବା ଜନବସତି ମଧ୍ୟରେ ଦେଣନେଣ କାରବାର ଆରମ୍ଭ କରିଥିଲା। ସେତେବେଳେ ଗୋଟିଏ ଜିନିଷ ବଦଳରେ ଅନ୍ୟ ଦ୍ରବ୍ୟର ଦେଣନେଣ କରାଯାଉଥିଲା। ଏଭଳି କାର୍ଯ୍ୟରେ ସ୍ଥଳପଥ ତୁଳନାରେ ଜଳପଥ ବିଶେଷ ଉପଯୋଗୀ ସାବ୍ୟସ୍ତ ହୋଇଥିଲା। ସେବେଠାରୁ ମାନବ ସଭ୍ୟତାକୁ ବାଣିଜ୍ୟ କ୍ଷେତ୍ରରେ ଜଳପଥ ବହୁ ସହାୟତା ଯୋଗାଇ ଆସିଛି।
ଦେଶ ଦେଶ ମଧ୍ୟରେ ହେଉଥିବା ବାଣିଜ୍ୟ କାରବାରରେ ଜଳପଥର ଭୂମିକା ଗୁରୁତ୍ୱପୂର୍ଣ୍ଣ। ଜଳପଥରେ ମୋଟ ବାଣିଜ୍ୟର ୮୦ ପ୍ରତିଶତ ପରିବହନ କରାଯାଇଥାଏ। ବାଣିଜ୍ୟ ଲାଗି ଜଳପଥର ଗୁରୁତ୍ୱ ସମ୍ପର୍କରେ ସଚେତନତା ସୃଷ୍ଟି ପାଇଁ ୧୯୪୮ରେ ଜାତିସଂଘ ପକ୍ଷରୁ ଉଦ୍ୟମ ଆରମ୍ଭ ହୋଇଥିଲା। ପରେ ୧୯୫୮ରେ ଇଣ୍ଟର-ଗଭର୍ନମେଣ୍ଟାଲ ମେରିଟାଇମ୍ କନସଲଟିଭ୍ ଅର୍ଗାନାଇଜେଶନ (ଆଇଏମ୍ସିଓ) ଗଠନ କରାଯାଇଥିଲା। ସେତେବେଳେ ଏହାର ସଦସ୍ୟ ସଂଖ୍ୟା ୨୧ ଥିବାବେଳେ ଏବେ ଏହା ୧୬୭ରେ ପହଞ୍ଚିଛି। ଏହାପରେ ୧୯୭୮ ମାର୍ଚ୍ଚ ୧୭ରେ ବିଶ୍ୱ ମେରିଟାଇମ୍ ଦିବସ ପାଳନ କରାଯାଇଥିଲା। ୧୯୮୨ରେ ଏହାକୁ ଅନ୍ତର୍ଜାତୀୟ ମେରିଟାଇମ୍ ଅର୍ଗାନାଇଜେଶନ ଭାବେ ନାମିତ କରାଯାଇଥିଲା।
ଜଳପଥର ଗୁରୁତ୍ୱ ଉପଲବ୍ଧି କରାଇବା ଲାଗି ପ୍ରତିବର୍ଷ ସେପ୍ଟେମ୍ବର ଶେଷ ଗୁରୁବାରକୁ ଓ୍ବାଲର୍ଡ ମେରିଟାଇମ୍ ଡେ’(ବିଶ୍ୱ ନୌବାଣିଜ୍ୟ ଦିବସ) ଭାବେ ପାଳନ କରାଯାଉଛି। ଚଳିତ ୨୦୨୧ରେ ଏହା ସେପ୍ଟେମ୍ବର ୩୦ରେ ପାଳନ କରାଯାଉଥିବାବେଳେ ବିଶ୍ୱବ୍ୟାପୀ ବିଭିନ୍ନ ସଚେତନତାମୂଳକ କାର୍ଯ୍ୟକ୍ରମର ଆୟୋଜନ କରାଯାଉଛି।