ସିଡନୀ,୪।୧୧(ପି.ଟି.): ଅଷ୍ଟ୍ରେଲିଆ ତାରକା ଅଲରାଉଣ୍ଡର ସେନ୍ ଓ୍ବାଟସନ ମଙ୍ଗଳବାର ପ୍ରତିଯୋଗିତାମୂଳକ କ୍ରିକେଟରୁ ଅବସର ଘୋଷଣା କରିଛନ୍ତି। ଏଥିସହିତ ତାଙ୍କ ୨୦ ବର୍ଷର କ୍ୟାରିୟରର ଅନ୍ତ ଘଟିଛି। ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ତାଙ୍କ ଦଳ ଚେନ୍ନାଇ ସୁପରକିଙ୍ଗ୍ସ ବିଦାୟ ନେବା ପରେ ସେ ଅବସର ନିଷ୍ପତ୍ତି ନେଇଥିଲେ। ଦୀର୍ଘ ଦୁଇ ଦଶନ୍ଧିର କ୍ୟାରିୟରରେ କ୍ରିକେଟକୁ ଉପଭୋଗ କରିଛି।
ତେବେ ୨୦୧୬ରେ ୩୯ ବର୍ଷୀୟ ଓ୍ବାଟସନ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିସାରିଥିଲେ। ଗତବର୍ଷ ମଧ୍ୟ ଅଷ୍ଟ୍ରେଲୀୟ ଟି୨୦ ଲିଗ୍ ବିଗ୍ ବାସ୍ରୁ ମଧ୍ୟ ଅବସର ଘୋଷଣା କରିଥିଲେ। ପିଲାଟି ବେଳୁ ଅଷ୍ଟ୍ରେଲିଆ ପାଇଁ କ୍ରିକେଟ ଖେଳିବି ବୋଲି ସ୍ବପ୍ନ ଦେଖୁଥିଲି ଓ ଏଥିରେ ମଧ୍ୟ ସଫଳ ହୋଇଥିଲି ବୋଲି ସେ କହିଛନ୍ତି। ଏବେ ସବୁ ପ୍ରକାର କ୍ରିକେଟରୁ ଅବସର ଘୋଷଣା କରୁଛି ବୋଲି ଓ୍ବାଟସନ ତାଙ୍କ ୟୁଟ୍ୟୁବ୍ ଚ୍ୟାନେଲରେ କହିଛନ୍ତି। ଏହାର ଏକ ଲିଙ୍କ୍ ତାଙ୍କ ଟ୍ୟୁଟର ହ୍ୟାଣ୍ଡଲ୍ରେ ପୋଷ୍ଟ କରାଯାଇଛି।
ମୋର ପ୍ରିୟ ଦଳ ଚେନ୍ନାଇ ସୁପରକିଙ୍ଗ୍ସ ପାଇଁ ଶେଷ ମ୍ୟାଚ୍ ଖେଳିସାରିଛି। ଗତ ୩ ବର୍ଷ ହେବ ଏହି ଦଳ ମୋ ପାଇଁ ବେଶ୍ ଉତ୍ତମ ସାବ୍ୟସ୍ତ ହୋଇଛି। ଓ୍ବାଟସନଙ୍କ ଅନ୍ତର୍ଜାତୀୟ କ୍ୟାରିୟର ବେଶ୍ ଉଜ୍ଜ୍ୱଳମୟ ସାବ୍ୟସ୍ତ ହୋଇଛି। ସେ ୫୯ ଟେଷ୍ଟ, ୧୯୦ ଦିନିକିଆ ଓ ୫୮ଟି ଟି୨୦ ମ୍ୟାଚ୍ ଖେଳି ମୋଟ ୧୦, ୯୫୦ ରନ ସଂଗ୍ରହ କରିଛନ୍ତି। ସେ ମଧ୍ୟ ଅଷ୍ଟ୍ରେଲିଆ ପାଇଁ ୨୯୧ ଉଇକେଟ ହାସଲ କରିଥିଲେ। ସେ ୧୪୫ଟି ଆଇପିଏଲ୍ ମ୍ୟାଚ୍ ଖେଳି ୩୮୭୪ ରନ ସଂଗ୍ରହ କରିଛନ୍ତି। ଏଥିରେ ୪ଟି ଶତକ ଓ ୨୧ଟି ଅର୍ଦ୍ଧଶତକ ସାମିଲ ରହିଛି। ସେ ମଧ୍ୟ ୯୨ଟି ଆଇପିଏଲ୍ ଉଇକେଟ ହାସଲ କରିଛନ୍ତି।
ଏହି ଅବସରରେ ଓ୍ବାଟସନ ନିଜ କୋଚ୍, ମେଣ୍ଟର, ଟିମ୍ ମେଟ, ପ୍ରଶଂସକ, ପରିବାରର ସଦସ୍ୟମାନଙ୍କୁ କୃତଜ୍ଞତା ଜଣାଇଛନ୍ତି। ଚଳିତ ଆଇପିଏଲ୍ରେ ଓ୍ବାଟସନ ୨୯୯ ରନ ସଂଗ୍ରହକରି ତାଙ୍କ ଅଭିଯାନ ଶେଷ କରିଛନ୍ତି। ଚେନ୍ନାଇ ଅବଶ୍ୟ ପ୍ରଥମଥର ପାଇଁ ପ୍ଲେ- ଅଫ୍କୁ କ୍ୱାଲିଫାଏ କରିବାରେ ଏଥର ବିଫଳ ହୋଇଛି। ଭିନ୍ନ ଭିନ୍ନ ଦଳ ତରଫରୁ ପ୍ରତିନିଧିତ୍ୱ କରି ସେ ଦୁଇଟି ଆଇପିଏଲ୍ ଟାଇଟଲ ଜିତି ବିରଳ ସଫଳତ ହାସଲ କରିଛନ୍ତି। ପୂର୍ବରୁ ସେ ରାଜସ୍ଥାନ ରୟାଲ୍ସ ତରଫରୁ ଖେଳି ପ୍ରାରମ୍ଭିକ ସଂସ୍କରଣରେ ଟାଇଟଲ ଜିତିଥିଲେ। ଏଥିରେ ସେ ୧୭ଟି ଉଇକେଟ ନେବା ସହ ୪୭୨ ରନ ସଂଗ୍ରହ କରିଥିଲେ। ୨୦୧୮ରେ ସେ ଚେନ୍ନାଇ ତରଫରୁ ୫୫୫ ରନ ସଂଗ୍ରହ କରିବା ସହ ୬ ଉଇକେଟ ହାସଲ କରିଥିଲେ।