କେନ୍ଦୁଝର,୬ା୪(ସ୍ବ.ପ୍ର.): ବ୍ୟବହାର ହୋଇ ପାରୁ ନ ଥିବା ଏବଂ ରକ୍ଷଣାବେକ୍ଷଣ ଅଭାବରୁ ସଦର ଥାନା ମୁରୁସୁଆଁ ଟୋଲ ପ୍ଲାଜା ନିକଟରେ ଥିବା ଦୁଇଟି ବ୍ୟୟ ବହୁଳ ଓ୍ବେ ବ୍ରିଜ୍ ଖତ ଖାଉଛି। ‘ସରକାର କା ମାଲ ଦରିଆ ମେ ଡାଲ’ ନୀତିରେ ଏହି ଲକ୍ଷ ଲକ୍ଷ ଟଙ୍କା ବ୍ୟୟରେ ଏନ୍ଏଚ୍ ୨୦ର ଦୁଇ ପାର୍ଶ୍ୱରେ ନିର୍ମାଣ ହୋଇଥିବା ଏହି ଦୁଇ ଓ୍ବେ ବ୍ରିଜ୍ ଏବେ ଜଙ୍ଗଲରେ ପରିଣତ ହୋଇ ନଷ୍ଟ ହୋଇଗଲାଣି। ଦୁଇଟି ଯାକ ଓ୍ବେ ବ୍ରିଜ୍ କଳଙ୍କି ଲାଗି ଅବ୍ୟବହାର ହୋଇପଡ଼ିଛି। ଏନେଇ ଏନ୍ଏଚ୍ଏଆଇ ପକ୍ଷରୁ କିମ୍ବା ଟୋଲ ଆଦାୟରେ ବ୍ୟସ୍ତ ଠିକା କମ୍ପାନୀ ମଧ୍ୟ ଏହି ଦୁଇ ଓ୍ବେ ବ୍ରିଜ୍ର କୌଣସି ରକ୍ଷଣାବେକ୍ଷଣ ବ୍ୟବସ୍ଥା କରୁ ନ ଥିବାରୁ ଲୋକେ ଅସନ୍ତୋଷ ପ୍ରକାଶ କରିଛନ୍ତି। ଏପରିକି ଏହି ସ୍ଥାନ ଦ୍ୱୟ ଅସୁରକ୍ଷିତ ଅବସ୍ଥାରେ ରହିଥିବାରୁ ଦୁର୍ଘଟଣା ଘଟିଲେ ବହୁ କ୍ଷୟକ୍ଷତି ହେବ ବୋଲି ସାମାଜିକ କର୍ମୀ ନିର୍ମଳ ନାୟକ କହିଛନ୍ତି।
ସୂଚନାଯୋଗ୍ୟ, କେନ୍ଦୁଝର ଜିଲାର ଏହି ରାସ୍ତା ଦେଇ ଦୈନିକ ବହୁ ସଂଖ୍ୟାରେ ଓଭରଲୋଡ୍ ଟ୍ରକ୍, ହାଇଓ୍ବା, ଟ୍ରେଲର ଚଳାଚଳ କରୁଥିଲେ ହେଁ ସେସବୁର ଧରପଗଡ଼ କରି ସୁବିଧା ଥିବା ସତ୍ତ୍ୱେ ଓଜନ କରାଯାଉନାହିଁ। ଫଳରେ ରାସ୍ତା ଦୁର୍ଘଟଣା ଘଟିବା ସହ ରାସ୍ତା ଭାଙ୍ଗୁଛି। ଏଣୁ ଏହି ଦୁଇ ଓ୍ବେ ବ୍ରିଜ୍କୁ ବ୍ୟବହାର ଯୋଗ୍ୟ କରିବା ସହ ଏହାର ଦାୟିତ୍ୱରେ ଥିବା ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି କ୍ଷତିପୂରଣ ଆଦାୟ କରାଯାଉ ବୋଲି ବ୍ରଜ କିଶୋର ରାୟ କହିଛନ୍ତି।
