ଜୟପୁର,୨୩।୪ : ରାଜସ୍ଥାନର ପୂର୍ବତନ ଉପ-ମୁଖ୍ୟମନ୍ତ୍ରୀ ତଥା ଶକ୍ତିଶାଳୀ କଂଗ୍ରେସ ନେତା ସଚିନ ପାଇଲଟ ଆଜିକାଲି ନିଜ ସରକାରକୁ ନେଇ ଅସନ୍ତୋଷ ପ୍ରକାଶ କରୁଛନ୍ତି। ସଚିନ ପାଇଲଟ ଏବଂ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କ ମଧ୍ୟରେ ରାଜନୈତିକ ତିକ୍ତତା ଦିନକୁ ଦିନ ବଢ଼ିବାରେ ଲାଗିଛି। ଭାଜପା ସରକାରରେ ହୋଇଥିବା ଦୁର୍ନୀତି ପ୍ରସଙ୍ଗର ପ୍ରତିଶ୍ରୁତି ଦେଇ ଏହି ଆଧାରରେ ଭୋଟ ମାଗି ରାଜ୍ୟରେ କଂଗ୍ରେସ କ୍ଷମତାକୁ ଆସିଥିଲା, ତାହା ଏବେ କଂଗ୍ରେସ ପାଇଁ ଏକ ସମସ୍ୟା ପାଲଟିଛି। ଦୁର୍ନୀତି ସମ୍ପର୍କରେ ତଦନ୍ତ ଦାବି କରି ସଚିନ ପାଇଲଟ ଗତ କିଛି ମାସ ଧରି ଅଶୋକ ଗେହଲୋଟଙ୍କୁ କଡ଼ା ସମାଲୋଚନା ଜାରି ରଖିଛନ୍ତି। ରବିବାର ସଚିନ ପାଇଲଟ ଗଣମାଧ୍ୟମ ସହ କଥାବାର୍ତ୍ତା ବେଳେ ସମାନ କଥା ପୁନରାବୃତ୍ତି କରିଛନ୍ତି।
ଗଣମାଧ୍ୟମକୁ ସୂଚନା ଦେଇ ପାଇଲଟ କହିଛନ୍ତି, ଯେତେବେଳେ ଆମେ କ୍ଷମତାକୁ ଆସିଲୁ ସେତେବେଳେ କହିଥିଲୁ ବସୁନ୍ଧରା ରାଜେ ସରକାରରେ ଘଟିଥିବା ଦୁର୍ନୀତିକୁ ଆମେ ସାମ୍ନାକୁ ଆଣିବୁ ଏବଂ ସେଥିପାଇଁ ଲୋକମାନେ ଆମକୁ ଭୋଟ ଦେଇଥିଲେ। ବର୍ତ୍ତମାନ ଆସନ୍ତାିଧାନସଭା ନିର୍ବାଚନ ପଇଁ ବହୁତ କମ ସମୟ ବାକି ଅଛି। କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ। ଯଦି ଆମେ ଦୁର୍ନୀତି ଉପରେ କାର୍ଯ୍ୟ କରୁନାହୁଁ, ତେବେ ଏହା ଭୁଲ ହେବ।
ଏହି ପ୍ରସଙ୍ଗରେ ସଚିନ ପାଇଲଟ ଜୟପୁରରେ ଗୋଟିଏ ଦିନ ଧାରଣାରେ ବସିଥିଲେ। ଏହା ପରେ ଦଳର ବହୁ ନେତା ଓ ବିଧାୟକ ସଚିନ ପାଇଲଟଙ୍କ ସମର୍ଥନରେ ଛିଡ଼ା ହୋଇଥିବା ଦେଖିବାକୁ ମିଳିଥିଲା। ରାଜ୍ୟରେ ବିଧାନସଭା ନିର୍ବାଚନ ପୂର୍ବରୁ ଶାସକ ଦଳ କଂଗ୍ରେସର ଦୁଇ ଶକ୍ତିଶାଳୀ ନେତାଙ୍କ ମଧ୍ୟରେ ହୋଇଥିବା ଏହି ଆଭ୍ୟନ୍ତରୀଣ ମତଭେଦ ଏବଂ ରାଜନୈତିକ ବିବାଦର ସମାଧାନ ପାଇଁ ହାଇକମାଣ୍ଡ ଯଥାସମ୍ଭବ ଉଦ୍ୟମ କରୁଛନ୍ତି। ତେବେ ମଧ୍ୟ ସ୍ଥିତି ପୂର୍ବପରି ରହିଛି।