ନୂଆଦିଲ୍ଲୀ,୧୮।୮: ଦିଲ୍ଲୀର ୭ଟି ଲୋକ ସଭା ଆସନରେ ଆମ ଆଦମୀ ପାର୍ଟି (ଏଏପି) ସହିତ ମିଳିତ ମେଣ୍ଟ କରିବାକୁ ନେଇ କଂଗ୍ରେସ ଚିନ୍ତାରେ ଅଛି। ଏଏପି ସହ ମେଣ୍ଟ କରିବ ନ ଏକୁଟିଆ ଲଢିବ ସେନେଇ କଂଗ୍ରେସ ଏବେ ଅଡ଼ୁଆ ସ୍ଥିତିରେ ଅଛି। ନିକଟରେ କଂଗ୍ରେସ ନେତା ସନ୍ଦୀପ ଦୀକ୍ଷିତ କଂଗ୍ରେସ ଏକୁଟିଆ ଲଢିବ ବୋଲି ସୂଚନା ଦେଇଥିଲେ। ତାଙ୍କ ମନ୍ତବ୍ୟ ପରେ ବିରୋଧୀ ମେଣ୍ଟ ‘ଇଣ୍ଡିଆ’କୁ ନେଇ ପ୍ରଶ୍ନବାଚୀ ଉଠିଛି। କାରଣ ଏହି ମେଣ୍ଟରେ ଉଭୟ କଂଗ୍ରେସ ଏବଂ ଏଏପି ଅଛନ୍ତି।
ଦୀକ୍ଷିତ ନିଜ ମନ୍ତବ୍ୟକୁ ସୁଧାରିବାକୁ ଯାଇ ଶୁକ୍ରବାର କହିଛନ୍ତି, ଦିଲ୍ଲୀର ସମସ୍ତ ୭ଟି ଆସନରେ ଲୋକ ସଭା ଆସନରେ ପ୍ରତିଦ୍ୱନ୍ଦ୍ୱିତା କରିବ ବୋଲି କଂଗ୍ରେସ କହି ନାହିଁ। ଆମ ଦଳ କହିଛି ଯେ ଆମେ ସମସ୍ତ ୭ଟି ଆସନ ପାଇଁ ପ୍ରସ୍ତୁତ ହେବୁ। ପ୍ରତ୍ୟେକ ଦଳ ଦ୍ୱାରା ନିର୍ବାଚନ ପ୍ରସ୍ତୁତି କରାଯାଇଥାଏ। ମିଳିତ ମେଣ୍ଟ ପରେ, କେଉଁ ଆସନରେ କିଏ ପ୍ରତିଦ୍ୱନ୍ଦ୍ୱିତା କରିବେ ତାହା ସ୍ଥିର ହେବ। ଦୁଇ ଦିନ ପୂର୍ବେ ହୋଇଥିବା କଂଗ୍ରେସ ନେତାଙ୍କ ବୈଠକ ଆମ ଦଳକୁ ମଜଭୁତ କରିବା ବିଷୟରେ ଥିଲା। ସେହି କଂଗ୍ରେସ ବୈଠକରେ ମିଳିତ ମେଣ୍ଟ ଉପରେ ଆଲୋଚନା ହୋଇ ନ ଥିଲା।
୨୦୨୪ ଲୋକ ସଭା ନିର୍ବାଚନରେ କଂଗ୍ରେସ ନେତା ସନ୍ଦୀପ ଦୀକ୍ଷିତ ଆହୁରି କହିଛନ୍ତି ଯେ, ଆମେ ଏହି ଦଳ (ଏଏପି) ଉପରେ ଭରସା କରିପାରିବୁ ନାହିଁ। ସେମାନଙ୍କ ରାଜନୀତିରେ ଦୁର୍ନୀତି ରହିଛି। ଆମ ଆଦମୀ ପାର୍ଟି ଅବୁଝା। ସେ ଆମ ଭାଷା ବୁଝିପାରନ୍ତି ନାହିଁ।
ବୁଧବାର କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ଏବଂ ଏମ୍ପି ରାହୁଲ ଗାନ୍ଧୀ ଦିଲ୍ଲୀର ବରିଷ୍ଠ ଦଳର ନେତାଙ୍କ ସହ ଏକ ବୈଠକ କରିଥିଲେ। ସନ୍ଦୀପ ଦୀକ୍ଷିତ ମଧ୍ୟ ଏହି ବୈଠକରେ ଭାଗ ନେଇଥିଲେ।