ଭୁବନେଶ୍ୱର,୨୧।୨(ବ୍ୟୁରୋ): ଗୋଟିଏ ପଟେ ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡକୁ ନେଇ ରାଜ୍ୟ ରାଜନୀତି ସରଗରମ ରହିଥିବା ବେଳେ ଏନେଇ ଝିଅ ଦୀପାଳି ଦାସଙ୍କ ପ୍ରତିକ୍ରିୟା ଚର୍ଚ୍ଚାକୁ ଆସିଛି। ବାପାଙ୍କ ମୃତ୍ୟୁକୁ ନେଇ କୌଣସି ରାଜନୀତି କରା ନ ଯାଉ ବୋଲି ସେ ମଙ୍ଗଳବାର ଗଣମାଧ୍ୟମ ସମ୍ମୁଖରେ ବୟାନ ଦେଇଥିଲେ। ଏଭଳି ବୟାନ ପ୍ରାୟୋଜିତ ବୋଲି ଭାଜପା କହିଛି। ଏଥିସହ ସରକାରୀ ଦଳର ନେତା ଓ ଘଟଣାରେ ସମ୍ପୃକ୍ତ ଥିବା ଅଧିକାରୀଙ୍କୁ ସୁରକ୍ଷା ଦେବା ଲାଗି ଦୀପାଳି ଏଭଳି ମନ୍ତବ୍ୟ ଦେଇଥିବା ବିରୋଧୀ ଦଳ ମୁଖ୍ୟ ସଚେତକ ତଥା ବିଧାୟକ ମୋହନ ମାଝି କହିଛନ୍ତି।
ମୋହନ କହିଛନ୍ତି, ଆମେ ଏହାକୁ ନେଇ ରାଜନୀତି କରୁନାହୁଁ। ଓଡ଼ିଶା ପୋଲିସ ଏହି ଘଟଣାକୁ ଚାପି ଦେବାକୁ ବସିଛି। କିନ୍ତୁ ଆମେ ସେ କାମ କରାଇ ଦେବୁନାହିଁ। ପ୍ରକୃତ ହତ୍ୟାକାରୀକୁ ଖୋଜିବାକୁ ସେ ଯଦି ନ ଚାହାନ୍ତି ତେବେ କିଛି କହିବାର ନାହିଁ। କାରଣ କ୍ରାଇମବ୍ରାଞ୍ଚର ପୂର୍ବ ରେକର୍ଡ ଭଲ ନାହିଁ। ତଦନ୍ତ କେବଳ ଗୋପାଳ ପାଖରେ ଅଟକିଛି, ଅନ୍ୟ କାହାକୁ ଏହାର ପରିସରକୁ ଅଣାଯାଉନାହିଁ। ଏଣୁ ଭାଜପାର ସନ୍ଦେହ ହେବା ସ୍ବାଭାବିକ। ପ୍ରକୃତ ହତ୍ୟାକାରୀ କିଏ ତାହା ଜାଣିବାକୁ ଓଡ଼ିଶାବାସୀ ଚାହୁଁଛନ୍ତି। ସିବିଆଇ ତଦନ୍ତ ଆମର ଦାବି, ଏହାକୁ ନେଇ ରାଜନୀତି କରୁନାହୁଁ ବୋଲି ମୋହନ କହିଛନ୍ତି।
ପ୍ରକାଶ ଯେ, ଝାରସୁଗୁଡ଼ାରେ ଗଣମାଧ୍ୟମ ସମ୍ମୁଖରେ ଦୀପାଳି କହିଥିଲେ ଯେ ବାପାଙ୍କ ମୃତ୍ୟୁ ପରେ ଆମ ପରିବାର ସମ୍ପୂର୍ଣ୍ଣ ଭାଙ୍ଗି ପଡ଼ିଛି। ଏଭଳି ଏକ ଅଘଟଣ ଘଟିବ ବୋଲି ଆମେ କେବେ ଆଶା କରି ନ ଥିଲୁ। ତେଣୁ ବାପାଙ୍କ ମୃତ୍ୟୁକୁ ନେଇ କୌଣସି ରାଜନୀତି ନ କରିବାକୁ ସମସ୍ତଙ୍କୁ ଅନୁରୋଧ କରୁଛି। ବାପାଙ୍କ ହତ୍ୟା ଘଟଣାର ତଦନ୍ତ କ୍ରାଇମ୍ବ୍ରାଞ୍ଚ କରୁଛି। ଏହି ତଦନ୍ତକୁ ଜଣେ ପୂର୍ବତନ ବିଚାରପତି ଅନୁଧ୍ୟାନ କରୁଛନ୍ତି। ତଦନ୍ତ ଚାଲିଥିବାରୁ ଏନେଇ ଅଧିକ କିଛି କହିପାରିବି ନାହିଁ। ହେଲେ ମୁଖ୍ୟମନ୍ତ୍ରୀଙ୍କ ଆଶୀର୍ବାଦ ଆମ ପରିବାର ଉପରେ ରହିଛି। ଆମେ ନିଶ୍ଚିତ ଭାବେ ନ୍ୟାୟ ପାଇବୁ ବୋଲି ଆଶା ରଖିଛୁ ବୋଲି ଦୀପାଳି କହିଥିଲେ।
