ନୂଆଦିଲ୍ଲୀ,୨୩।୧୨: ହରିୟାଣା-ଦିଲ୍ଲୀ ସୀମାରେ ପହଞ୍ଚିଛି କଂଗ୍ରେସର ‘ଭାରତ ଯୋଡୋ’ ଯାତ୍ରା। ଶନିବାର ଦିଲ୍ଲୀର ବଦରପୁର ସୀମାରୁ ଏହି ଯାତ୍ରା ଆଗକୁ ବଢ଼ିବ। ତେବେ ଏହି ଅବସରରେ ଭାରତର ସ୍ବର ସହ ରାଜାଙ୍କ ସିଂହାସନ ପର୍ଯ୍ୟନ୍ତ ପହଞ୍ଚିଛୁ ବୋଲି ରାହୁଲ ଗାନ୍ଧୀ କହିଛନ୍ତି। ଏଥିସହ ରାଜଧାନୀରେ ହେବାକୁ ଥିବା ଯାତ୍ରାରେ ସାମିଲ ହେବାକୁ ସେ ଲୋକଙ୍କୁ ନିବେଦନ କରିଛନ୍ତି।
ଟୁଇଟ୍ କରି ରାହୁଲ କହିଛନ୍ତି, ମହଙ୍ଗା ମାଡ଼ ହଟାନ୍ତୁ। ବେକାରୀ ଦୂର କରନ୍ତୁ। ଘୃଣା ବାଣ୍ଟନ୍ତୁ ନାହିଁ- ରାଜାଙ୍କ ସିଂହାସନ ଯାଏ ଭାରତବାସୀଙ୍କ ଏହି କଥାକୁ ନେଇ, ଦିଲ୍ଲୀ ଆସିଯାଇଛୁ । ଆସନ୍ତୁ ଏହାକୁ ଆହୁରୀ ଶାଣିତ କରିବା ଲାଗି ଆମ ସହ ଯୋଡ଼ି ହୁଅନ୍ତୁ।
महंगाई हटाओ। बेरोज़गारी मिटाओ। नफ़रत मत फैलाओ – हिंदुस्तान की ये आवाज़ ‘राजा’ के सिंघासन तक ले कर, दिल्ली आ गए हम।
आइये, इसे और बुलंद करने के लिए, हमसे राजधानी में जुड़िए। pic.twitter.com/XSGlmO5iHL
— Rahul Gandhi (@RahulGandhi) December 23, 2022
କହିରଖୁଛୁ ଯେ, ରାହୁଲଙ୍କ ଏହି ଯାତ୍ରା ଶନିବାର ସକାଳ ୬ଟାରେ ବଦରପୁର ସୀମାରୁ ଆରମ୍ଭ ହୋଇ ମଥୁରା ରାସ୍ତା ଦେଇ ଆଶ୍ରମ ଆଡକୁ ଯିବ। ଅପରାହ୍ନରେ ଏକ ବିରତି ଲାଗି ଆଶ୍ରମ ଚୌକରେ ଥିବା ଧର୍ମଶାଳାରେ ଅଟକିବ। ଏଣୁ ଏଠାରେ ହିଁ ରାହୁଲ ଗଣମାଧ୍ୟମକୁ ସମ୍ବୋଧିତ କରିବେ ବୋଲି ଆଶା କରାଯାଉଛି। ଏହାପରେ ଯାତ୍ରା ଜାକିର ହୁସେନ ମାର୍ଗ, ଇଣ୍ଡିଆ ଗେଟ୍, ତିଳକ ମାର୍ଗ, ଆଇଟିଓ ଦେଇ ଲାଲ କିଲା ଯାଏ ଯିବ। ସେଠାରୁ ସୁଭାଷ ମାର୍ଗ ଦେଇ ରାଜଘାଟ ଯାଏ ଯିବ ବୋଲି ଦିଲ୍ଲୀ କଂଗ୍ରେସ ନେତା କହିଛନ୍ତି।
