ଚେନ୍ନାଇ,୧୭।୨(ପି.ଟି.): ଦ୍ୱିତୀୟ ଟେଷ୍ଟରେ ବୃହତ୍ ବିଜୟ ହାସଲ କରିବା ପରେ ଭାରତୀୟ ଅଧିନାୟକ ବିରାଟ କୋହଲି ନିଜ ଖୁସିକୁ ଛପାଇ ରଖିପାରି ନାହାନ୍ତି। ଏହା ଆମ ପାଇଁ ଏକ ବଡ଼ ସଫଳତା। ତେବେ ଚେପକ୍ର ଏହି ପିଚ୍ ସ୍ପିନ୍ ବୋଲରଙ୍କୁ ସୁହାଉଥିବା ନେଇ ହେଉଥିବା ସମାଲୋଚନା ତଥା ଆକ୍ଷେପକୁ ସେ ପ୍ରତ୍ୟାଖାନ କରିଛନ୍ତି। ଏହି ଟେଷ୍ଟରେ ଆମ ଦଳର ସଦସ୍ୟମାନେ ଅଦମ୍ୟ ଧୈର୍ଯ୍ୟ, ସଂକଳ୍ପ ଓ ସାହସିକତା ପ୍ରଦର୍ଶନ କରିଛନ୍ତି ବୋଲି କୋହଲି ମ୍ୟାଚ୍ ପରେ କହିଛନ୍ତି। ତେବେ ଏହି ବିଜୟରେ ଟସ୍ର ଭୂମିକାକୁ ସେ ଏଡାଇ ଦେଇଛନ୍ତି। ଟସ୍ ନ ଜିତିଥିଲେ ମଧ୍ୟ ଆମେ ଭଲ ପ୍ରଦର୍ଶନ କରିଥାନ୍ତୁ ବୋଲି ସେ କହିଛନ୍ତି।
ପୂର୍ବରୁ ଏହି ପିଚ୍କୁ ଇଂଲଣ୍ଡ ପୂର୍ବତନ ଅଧିନାୟକ ମାଇକେଲ ଭନ ବେଶ୍ ସମାଲୋଚନା କରିଛନ୍ତି। ଟର୍ନ ଓ ବାଉନ୍ସ ଦେଖି ଆମେ ଡରିଯାଇ ନ ଥିଲୁ ଓ ସାହସର ସହିତ ପରିସ୍ଥିତିର ମୁକାବିଲା କରିଥିଲୁ। ମ୍ୟାଚ୍ରେ ଆମେ ୬୦୦ ରନ ସଂଗ୍ରହ କରିଛୁ। ଯଦି ସ୍କୋର ବୋର୍ଡରେ ରନ୍ ସଂଗ୍ରହ କରିବୁ ତା’ହେଲେ ବୋଲରମାନେ ଆମ ପାଇଁ ବାକି କାର୍ଯ୍ୟ କରିବେ ବୋଲି ଜାଣିଥିଲୁ ବୋଲି ସେ କହିଛନ୍ତି।
ପ୍ରଥମ ଦିବସରୁ ବଲ୍ ଟର୍ନ କରିବାରୁ ପୂର୍ବତନ ଇଂଲଣ୍ଡ ଅଧିନାୟକ କେଭିନ ପିଟରସନ ମଧ୍ୟ ଏହି ପିଚ୍କୁ ସମାଲୋଚାନ କରିଥିଲେ। ଯଦି ଟସ୍ ହାରି ଭାରତ ଦ୍ୱିତୀୟରେ ବ୍ୟାଟିଂ କରିଥାନ୍ତା ତାହାହେଲେ ନିଶ୍ଚିତ ଭାବେ ହାରିଥାନ୍ତା ବୋଲି ସେ କହିଛନ୍ତି। ତେବେ କୋହଲି ଏହାକୁ ଖଣ୍ଡନ କରିଛନ୍ତି। ଟସ୍ ହାରିଥିଲେ ମଧ୍ୟ ଆମେ ହାରି ନ ଥାନ୍ତୁ ବୋଲି ସେ ସ୍ପଷ୍ଟ କରିଛନ୍ତି। ଏହି ପିଚ୍ରେ ଦ୍ୱିତୀୟ ଇନିଂସରେ ମଧ୍ୟ ଆମେ ୩୦୦ ପାଖାପାଖି ରନ୍ ସଂଗ୍ରହ କରିଥିଲୁ। ସ୍ପିନ୍ ହେଉ ବା ସିମ୍ ହେଉ ପିଚ୍ ଦୁଇ ଦଳ ପାଇଁ ସମାନ ରହିଥିଲା। ଚେନ୍ନାଇରେ ଘରୋଇ ଦର୍ଶକଙ୍କ ସମ୍ମୁଖରେ ଏହି ବିଜୟ ନିଶ୍ଚିତ ଭାବେ ଗୁରୁତ୍ୱ ବହନ କରୁଛି। ଦର୍ଶକମାନେ ଉତ୍ସାହିତ କରିଥିଲେ ଓ ଏମାନେ ଆମ ପାଇଁ ଯଥେଷ୍ଟ ଗୁରୁତ୍ୱ ବହନ କରୁଛନ୍ତି ବୋଲି ସେ କହିଛନ୍ତି।
କୋଭିଡ୍-୧୯ କାରଣରୁ ଏଠାରେ ପ୍ରଥମ ମ୍ୟାଚ୍ ରୁଦ୍ଧଦ୍ୱାରରେ ଆୟୋଜିତ ହୋଇଥିଲା। କୋହଲିଙ୍କ ନେତୃତ୍ୱରେ ଭାରତ ଏବେ ୨୧ଟି ଟେଷ୍ଟରେ ବିଜୟୀ ହୋଇଛି। ଏହି ଟେଷ୍ଟ ଆମ ପାଇଁ ଆଦୌ ସହଜ ନ ଥିଲା। ବରଂ ବିଜୟୀ ହେବାକୁ ଆମକୁ ଅଧିକ ପରିଶ୍ରମ କରିବାକୁ ପଡିଥିଲା। ଏହା ଏକ ସ୍ବୟଂସମ୍ପୂର୍ଣ୍ଣ ମ୍ୟାଚ୍ ଥିଲା। ଉଇକେଟକିପର ରିଷଭ ପନ୍ତ କିପିଂରେ ବହୁତ ଉନ୍ନତି କରିଛନ୍ତି। ଗତ ଅଷ୍ଟ୍ରେଲିଆ ଗସ୍ତରେ ସେ କଠିନ ପରିଶ୍ରମ କରିଥିଲେ। ଓଜନ କମାଇବା ସହ ପ୍ରଦର୍ଶନରେ ଉନ୍ନତି ଆଣିବା ପାଇଁ ସେ ପ୍ରୟାସ ଜାରି ରଖିଛନ୍ତି। ଟର୍ନ ଓ ବାଉନ୍ସ ବଲ୍ରେ ଭଲ କିପିଂ କରିଛନ୍ତି। ଜଣେ କିପର ହିସାବରେ ସେ ଆହୁରି ଉନ୍ନତି କରିବାକୁ ଚାହିଁବା ବଡ଼ କଥା ବୋଲି କୋହଲି କହିଛନ୍ତି।
ଅପରପକ୍ଷରେ ଭାରତ ଆମକୁ ସବୁ ବିଭାଗରେ ପରାସ୍ତ କରିଛି ବୋଲି ଇଂଲଣ୍ଡ ଅଧିନାୟକ ଜୋ ରୁଟ୍ ମ୍ୟାଚ୍ ପରେ କହିଛନ୍ତି। ଏହି ପରାଜୟରୁ ଆମେ ବହୁତ କିଛି ଶିକ୍ଷା କରିବୁ। କଷ୍ଟକର ପରିସ୍ଥିତିରେ କିଭଳି ରନ୍ ସଂଗ୍ରହ କରିବାକୁ ହେବ ଓ କ୍ରିଜ୍ରେ ତିଷ୍ଠି ରହିବାକୁ ହେବ ତାହା ଆମକୁ ଶିକ୍ଷା କରିବାକୁ ହେବ। ଦ୍ୱିତୀୟ ଦିନରୁ ଏହି ପିଚ୍ରେ ବ୍ୟାଟିଂ କରିବା କଷ୍ଟକର ଥିଲା। ତେବେ ଆଗକୁ ଆମକୁ ଏଭଳି ସ୍ଥିତିରେ ଭଲ ଖେଳିବାକୁ ହେବ ବୋଲି ରୁଟ୍ କହିଛନ୍ତି।