ଚଣ୍ଡିଗଡ଼,୫।୧: ସୁରକ୍ଷା ବ୍ୟବସ୍ଥାରେ ବଡ଼ ଧରଣର ଢ଼ିଲା କାରଣରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଞ୍ଜାବର ଫିରୋଜପୁର ରାଲିକୁ ବାତିଲ କରି ଦିଆଯାଇଛି। ଏହି ଘଟଣାକୁ କେନ୍ଦ୍ର କରି କଂଗ୍ରେସ ଉପରେ ବର୍ଷିଛନ୍ତି ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ସ୍ମ୍ରିତି ଇରାନୀ।
“ଆମକୁ ଜଣାଅଛି କଂଗ୍ରେସ ପ୍ରଧାନମନ୍ତ୍ରୀ ମୋଦିଙ୍କୁ ଘୃଣା କରେ। ଆଜି ସେମାନେ ଦେଶର ପ୍ରଧାନମନ୍ତ୍ରୀଙ୍କ କ୍ଷତି କରିବାକୁ ଉଦ୍ୟମ କରିଛନ୍ତି” ବୋଲି ସେ କହିଛନ୍ତି।
ପ୍ରଧାନମନ୍ତ୍ରୀ ଯାଉଥିବା ରାସ୍ତାରେ ବିକ୍ଷୋଭର ସମୟ ଉପରେ ସେ ପ୍ରଶ୍ନ ଉଠାଇଛନ୍ତି। “ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ପ୍ରବଳ ସଂଖ୍ୟାରେ ବିକ୍ଷୋଭକାରୀ ପହଞ୍ଚିବା ସଂଯୋଗ ନୁହେଁ। ଏହା ଏକ ଷଡ଼ଯନ୍ତ୍ର। ସୁରକ୍ଷା ବ୍ୟବସ୍ଥାରେ ଏଭଳି ଢ଼ିଲା ପାଇଁ ଦାୟୀ କିଏ? ପଞ୍ଜାବ ପୋଲିସ ନିରବ ଦ୍ରଷ୍ଟା ସାଜି ଛିଡ଼ା ହୋଇଥିଲେ। ସୁରକ୍ଷା ବ୍ୟବସ୍ଥାର କୌଣସି ପ୍ରୋଟୋକଲ ପାଳନ କରାଯାଇ ନ ଥିଲା” ବୋଲି ଇରାନୀ କହିଛନ୍ତି।
ଫିରୋଜପୁରରେ ଆୟୋଜିତ ରାଲିରେ ଯୋଗ ଦେବା ପାଇଁ ପ୍ରଧାନମନ୍ତ୍ରୀଙ୍କ କନଭେ ଯାଉଥିବା ବେଳେ ବିକ୍ଷୋଭ କାରଣରୁ ପ୍ରାୟ ୨୦ ମିନିଟ୍ ପାଇଁ ଏକ ଫ୍ଲାଏଓଭରରେ ଅଟକି ରହିଥିଲେ। ପ୍ରଧାନମନ୍ତ୍ରୀଙ୍କ ଗାଡ଼ି ଫଶି ରହିଥିବା ସମୟରେ ଫ୍ଲାଏଓଭରରେ ଚଳାଚଳ କରୁଥିଲା ବେସରକାରୀ ଗାଡ଼ି। ସୁରକ୍ଷା ବ୍ୟବସ୍ଥାରେ ଏହା ସବୁଠୁ ବଡ଼ ତ୍ରୁଟି ଥିଲା। ଏଭଳି ଢ଼ିଲା ସୁରକ୍ଷା ବ୍ୟବସ୍ଥା ଯୋଗୁ ମୋଦି ଭଟିଣ୍ଡା ବିମାନ ବନ୍ଦରକୁ ଫେରି ଯାଇଥିଲେ। ଏହି ଘଟଣା ଯୋଗୁ ବିଧାନସଭା ନିର୍ବାଚନ ତାରିଖ ଘୋଷଣା ହେବା ପୂର୍ବରୁ କେନ୍ଦ୍ର ସରକାର ଓ କଂଗ୍ରେସ ଶାସିତ ରାଜ୍ୟ ମଧ୍ୟରେ ବିବାଦ ଘନେଇଛି।
