ନୂଆଦିଲ୍ଲୀ,୧୬।୭(ପି.ଟି.): କୋଭିଡ୍-୧୯ ମହାମାରୀର ପ୍ରକୋପ ବଢିବାରେ ଲାଗିଛି। ଏପରିସ୍ଥଳେ ତରବର ହୋଇ କ୍ରୀଡ଼ା କାର୍ଯ୍ୟକଳାପ ଆରମ୍ଭ ନ କରିବାକୁ କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ ରାଜ୍ୟଗୁଡିକୁ ପରାମର୍ଶ ଦେଇଛନ୍ତି। ଆଗାମ ୨-୩ ମାସ ମଧ୍ୟରେ କୌଣସି କ୍ରୀଡ଼ା କାର୍ଯ୍ୟକଳାପ ଆରମ୍ଭ ନ କରିବାକୁ ସେ କହିଛନ୍ତି। ରାଜ୍ୟଗୁଡିକ ସ୍ବାଧୀନ ଭାବେ କ୍ରୀଡ଼ା ଆରମ୍ଭ କରିପାରିବେ। କିନ୍ତୁ ପରିସ୍ଥିତକୁ ଦୃଷ୍ଟିରେ ରଖି ୨ରୁ ୩ ମାସ ପରେ କ୍ରୀଡ଼ା ଆରମ୍ଭ କରିବାକୁ ନିବେଦନ କରୁଛି ବୋଲି ରିଜିଜୁ କହିଛନ୍ତି।
ଦୁଇ ଦିନଧରି ସବୁ ରାଜ୍ୟ କେନ୍ଦ୍ର ଶାସିତ କ୍ରୀଡ଼ାମନ୍ତ୍ରୀମାନଙ୍କ ସହ ଭର୍ଚୁଆଲ ମିଟିଂ ଶେଷ ହେବା ପରେ ସେ ଏହି କଥା କହିଛନ୍ତି। ପରିସ୍ଥିତି ସୁଧୁରିଲେ ନନ୍ କଣ୍ଟାକ୍ଟ ସ୍ପୋଟର୍ସ ବା ଶାରୀରିକ ସମ୍ପର୍କରେ ଆସୁ ନ ଥିବା କ୍ରୀଡ଼ା ଆରମ୍ଭ କରିବା ଉପରେ ସେ ଗୁରୁତ୍ୱ ଦେଇଛନ୍ତି। ନନ୍ କଣ୍ଟାକ୍ଟ ସ୍ପୋଟର୍ସଗୁଡିକୁ ସୀମିତ ଭାବେ ଆରମ୍ଭ କରିବାରେ କୌଣସି ଅସୁବିଧା ନାହିଁ। କେତେକ ରାଜ୍ୟରେ ସ୍ପୋଟର୍ସ ଟ୍ରେନିଂ ମଧ୍ୟ ଆରମ୍ଭ ହେଲାଣି। ଯଦି ସ୍ଥିତିରେ ଆହୁରି ସୁଧାର ଆସେ ତା’ହେଲେ ଅନ୍ ଫିଲ୍ଡ ସ୍ପୋର୍ଟ୍ସର ପ୍ରତ୍ୟାବର୍ତ୍ତନ ପାଇଁ ପ୍ରୟାସ କରିବୁ ବୋଲି ସେ କହିଛନ୍ତି। ଉଲ୍ଲେଖଥାଉ କି, କୋଭିଡ୍-୧୯ ମହାମାରୀ କାରଣରୁ ସାରା ଦେଶରେ ଲକ୍ଡାଉନ୍ ଜାରି କରାଯିବା ପରେ କ୍ରୀଡ଼ା କାର୍ଯ୍ୟକଳାପ ଠପ୍ ହୋଇଯାଇଥିଲା। କାରୋନା ଭାଇରସ୍ ବିରୋଧରେ ଲଢେଇ ପାଇଁ କେନ୍ଦ୍ର ଓ ରାଜ୍ୟ ମିଳିତ ଭାବେ ଏକାଠି କାର୍ଯ୍ୟ କରିବେ ଓ ଏକ କୋଟି ସ୍ବେଚ୍ଛାସେବୀଙ୍କୁ ପ୍ରସ୍ତୁତ କରିବେ ବୋଲି ସେ କହିଛନ୍ତି। ଫିଟ୍ ଇଣ୍ଡିଆ ମୁଭ୍ମେଣ୍ଟ ଉପରେ ମଧ୍ୟ ସେ ଆଲୋକପାତ କରିଥିଲେ।
