ପଟ୍ଟାଙ୍ଗୀ,୮ା୭(ଡି.ଏନ.ଏ.): ଆମେ ଓଡ଼ିଶା ସରକାରଙ୍କ ଅଧୀନରେ ବସବାସ କରୁଥିଲେ ମଧ୍ୟ ସରକାରଙ୍କଠାରୁ କୌଣସି ସୁବିଧା ପାଉନାହୁଁ। ଗ୍ରାମକୁ ରାସ୍ତାଟିଏ ନାହିଁ। ପାନୀୟ ଜଳ, ଶିକ୍ଷା ଓ ସ୍ବାସ୍ଥ୍ୟସେବା ସୁବିଧା କିଛି ପାଉନାହୁଁ। ଆନ୍ଧ୍ରପ୍ରଦେଶ ସାଲୁର ବିଧାୟକ ରାଜନ ଦୋରାଙ୍କ ନିକଟରେ ଏଭଳି ଅଭିଯୋଗ କରିବା ସହ ଆନ୍ଧ୍ରରେ ମିଶିବାକୁ ଅନୁରୋଧ କରିଛନ୍ତି କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ରାଲେଗଡା ପଞ୍ଚାୟତ ତଥା ଆନ୍ଧ୍ର ସୀମାନ୍ତର ୮ଟି ଗ୍ରାମର ଲୋକେ। ବିଧାୟକ ଦୋରା ଗ୍ରାମବାସୀଙ୍କ ପ୍ରସ୍ତାବକୁ ବିଧାନସଭାରେ ଉଠାଇବେ ବୋଲି ପ୍ରତିଶ୍ରୁତି ଦେଇଛନ୍ତି।
ଗୁରୁବାର ରାଲେଗଡା ପଞ୍ଚାୟତର କାରେଡି, ବିଟ୍ରା, ବିଲକାବିଟ୍ରା, ଜଙ୍ଗଲବାଲାସା, ଆଡୁବାଡାବାଲାସା,ବରାନାଉଡି, କାଇରୁବାଡୁ ସହ ଅନ୍ୟ ଏକ ଗ୍ରାମର ୨ଶହରୁ ଉର୍ଦ୍ଧ୍ୱ ଗ୍ରାମବାସୀ ସାଲୁର ବ୍ଲକର ପାଚିପେଣ୍ଟାପି କାନାବାଲାସା ପଞ୍ଚାୟତରେ ଏକାଠି ହୋଇ ବିଧାୟକ ଦୋରାଙ୍କୁ ଭେଟିଥିଲେ। ଏହି ସମୟରେ ପାର୍ବତୀପୁରମ୍ ଆଇଟିଡିଏର ପିଏ କୋରମ ନାଥ ଉପସ୍ଥିତ ଥିଲେ।