ନୂଆଦିଲ୍ଲୀ,୧୦ା୨: ସମାଜବାଦୀ ପାର୍ଟି (ଏସ୍ପି) ମୁଖ୍ୟ ଅଖିଳେଶ ଯାଦବ ଏବଂ କଂଗ୍ରେସ ନେତା ରାହୁଲ ଗାନ୍ଧୀଙ୍କ ୫ ବର୍ଷ ତଳର କଟାକ୍ଷକୁ ଏ ଯାଏ ଭୁଲି ପାରିନାହାନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ୟୁପି ବିଧାନସଭାର ପ୍ରଥମ ପର୍ଯ୍ୟାୟ ନିର୍ବାଚନ ଅବ୍ୟବହିତ ପୂର୍ବରୁ ମୋଦି ନ୍ୟୁଜ୍ ଏଜେନ୍ସି ଏଏନ୍ଆଇକୁ ସାକ୍ଷାତ୍କାର ଦେଇ କହିଛନ୍ତି, ସେମାନେ ଆମକୁ ‘ଗୁଜରାଟର ଗଧ’ କହୁଥିଲେ। ଏହି ଦୁଇଜଣଙ୍କ ପ୍ରଦର୍ଶନକୁ ୟୁପି ଜନତା ଦେଖିସାରିଛନ୍ତି। ଦୁହିଁଙ୍କୁ ଲୋକେ ଉପଯୁକ୍ତ ଶିକ୍ଷା ଦେଇଛନ୍ତି। ଏପରି କି ଆଉ ଗୋଟିଏ ସମୟରେ ବୁଆଜୀ (ବହୁଜନ ସମାଜ ପାର୍ଟି ସୁପ୍ରିମୋ ମାୟାବତୀ) ମଧ୍ୟ ସେମାନଙ୍କ ସହ ମିଶି ଯାଇଥିଲେ। ହେଲେ ମିଛ ସମାଜବାଦ ଏବଂ ପାରିବାରିକ ରାଜନୀତି କାମ କରି ନ ଥିଲା ବୋଲି ମୋଦି କହିଛନ୍ତି।
ବୁଧବାର ଦେଇଥିବା ସାକ୍ଷାତ୍କାରରେ ଉତ୍ତରାଖଣ୍ଡ, ଗୋଆ, ପଞ୍ଜାବ ଓ ମଣିପୁର ବିଧାନସଭା ନିର୍ବାଚନ, କେନ୍ଦ୍ରର କୃଷି ଆଇନ ବିରୋଧରେ ଚାଷୀ ଆନ୍ଦୋଳନ ଏବଂ ଫିରୋଜପୁରରେ ତାଙ୍କ ସୁରକ୍ଷାରେ ହୋଇଥିବା ତ୍ରୁଟି ସମେତ ଅନ୍ୟ କେତେକ ପ୍ରସଙ୍ଗ ଉପରେ ମଧ୍ୟ ମତ ରଖିଛନ୍ତି। ଲଖିମପୁର ଖେରିରେ ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶିଷ ମିଶ୍ରା ଗାଡ଼ି ମଡ଼ାଇ ୪ ଚାଷୀ ଓ ଜଣେ ଖବରଦାତାଙ୍କୁ ହତ୍ୟା କରିବା ପ୍ରସଙ୍ଗରେ ପ୍ରଶ୍ନ କରାଯିବାରୁ ସେ କହିଛନ୍ତି, ଯୋଗୀ ଆଦିତ୍ୟନାଥ ସରକାର ସ୍ବଚ୍ଛତାର ସହ କାର୍ଯ୍ୟ କରୁଛନ୍ତି। ସେହିପରି ସିବିଆଇ, ଇଡି ଏବଂ ଆୟକର ବିଭାଗ ଭଳି କେନ୍ଦ୍ରୀୟ ସଂସ୍ଥାଗୁଡ଼ିକୁ ଲୋକଙ୍କ ବିରୋଧରେ ଲଗାଯାଉଥିବା ଅଭିଯୋଗକୁ ପ୍ରଧାନମନ୍ତ୍ରୀ ଖଣ୍ଡନ କରିଛନ୍ତି। ପଞ୍ଜାବର ଫିରୋଜପୁର ଗସ୍ତବେଳେ କୃଷକଙ୍କ ବିରୋଧ ଯୋଗୁ ଫ୍ଲାଏଓଭର ଉପରେ ୨୦ ମିନିଟ୍ ଫସି ରହି ଦିଲ୍ଲୀ ଫେରିବା ପ୍ରସଙ୍ଗରେ ସେ କହିଛନ୍ତି, ମନ୍ତବ୍ୟ ଦେଲେ ତଦନ୍ତ ପ୍ରଭାବିତ ହୋଇପାରେ। ସୁପ୍ରିମକୋର୍ଟ ଏହି ବିଷୟରେ ଗମ୍ଭୀରତାର ସହ ବିଚାର କରୁଛନ୍ତି। ୩ କୃଷି ଆଇନ କାର୍ଯ୍ୟକାରୀ ହୋଇଥିଲେ ଦେଶର ଚାଷୀ ଉପକୃତ ହୋଇଥାନ୍ତେ। ତେବେ ଜାତୀୟ ସ୍ବାର୍ଥ ଦୃଷ୍ଟିରୁ ସେଗୁଡ଼ିକୁ ଫେରାଇ ନିଆଗଲା ବୋଲି ସଫେଇ ଦେଇଛନ୍ତି। ସାକ୍ଷାତ୍କାରରେ ପ୍ରଧାନମନ୍ତ୍ରୀ ଭାଜପା ପାଇଁ ନିର୍ବାଚନ ପ୍ରଚାର ସୁଯୋଗକୁ ହାତଛଡ଼ା କରିନାହାନ୍ତି। ଭାଜପା ଏଥର ପୁଣି ଜିତୁଛି। ସବୁଠି ଗୈରିକ ଦଳର ହାଓ୍ବା। ୫ ରାଜ୍ୟରେ ବିପୁଳ ସଂଖ୍ୟାଗରିଷ୍ଠତା ମିଳିବା ନେଇ ସେ ଆଶାବାଦୀ ଥିବା କହିଛନ୍ତି।
ୟୁପି ନିର୍ବାଚନ: ଗଧ ଉପାଖ୍ୟାନ
୨୦୧୭ ବିଧାନସଭା ନିର୍ବାଚନ ବେଳେ ସମାଜବାଦୀ ପାର୍ଟି ଶାସିତ ୟୁପିରେ ହଠାତ୍ ଗଧ ଉପାଖ୍ୟାନକୁ ନେଇ ଚର୍ଚ୍ଚା ଜୋର୍ ଧରିଥିଲା। ମୁଖ୍ୟମନ୍ତ୍ରୀ ଥିଲେ ଏସ୍ପି ପ୍ରତିଷ୍ଠାତା ମୁଲାୟମ ସିଂ ଯାଦବଙ୍କ ପୁଅ ଅଖିଳେଶ ଯାଦବ। ବିଧାନସଭା ନିର୍ବାଚନ ପ୍ରଚାର ଜୋର୍ ଧରି ଆସୁଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତତ୍କାଳୀନ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ୟୁପିକୁ ତୋଫାନୀ ଗସ୍ତ କରୁଥିଲେ। ମୁଖ୍ୟମନ୍ତ୍ରୀ ଅଖିଳେଶ ଫେବୃୟାରୀ ୨୧ରେ ମୋଦି-ଶାହାଙ୍କୁ କଟାକ୍ଷ କରି ‘ଗୁଜରାଟ କେ ଗଧେ’ କହିଥିଲେ। ଏସ୍ପି ସହ ମେଣ୍ଟ କରି ନିର୍ବାଚନ ଲଢ଼ିଥିବା କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ କେତେକ ସଭାରେ ଗଧ କଥା ଉଠାଇ ପ୍ରଚାର କରିଥିଲେ। ସେତେବେଳେ ଟିଭିରେ ଗୁଜରାଟ ସରକାରଙ୍କ ଏକ ବିଜ୍ଞାପନ ଦେଖିବାକୁ ମିଳୁଥିଲା। ଗୁଜରାଟ ପର୍ଯ୍ୟଟନ ବିଭାଗର ବ୍ରାଣ୍ଡ୍ ଆମ୍ବାସାଡର ଅଭିନେତା ଅମିତାଭ ବଚ୍ଚନ ଗଧଙ୍କୁ ନେଇ ପ୍ରସ୍ତୁତ ଏକ ଭିଡିଓ ଜରିଆରେ ଟୁରିଜମ୍ କ୍ୟାମ୍ପେନ୍କୁ ଆଗକୁ ବଢ଼ାଇଥିଲେ। ଏହି ପରିପ୍ରେକ୍ଷୀରେ ଅଖିଳେଶ ଗୁଜରାଟର ଗଧଙ୍କ ପାଇଁ ପ୍ରଚାର ନ କରିବାକୁ ବିଗ୍ ବିଙ୍କୁ ପରାମର୍ଶ ଦେଇଥିଲେ। ସମାଜବାଦୀ ପାର୍ଟିର ନେତୃତ୍ୱକୁ ନେଇ ସେତେବେଳେ ଅଖିଳେଶ ଓ ମୁଲାୟମଙ୍କ ମଧ୍ୟରେ ଟଣାଓଟରା ଲାଗି ରହିଥିବାରୁ ଏହାର ଦୁଇ ଦିନ ପରେ ମୋଦି ଜବାବ ରଖିଥିଲେ, ଗୁଜରାଟର ଗଧମାନେ ବିଶ୍ୱସ୍ତ ଓ ପରିଶ୍ରମୀ। ବାପାଙ୍କ ସହ ବିଶ୍ୱାସଘାତ କରିଥିବା ଅଖିଳେଶ ଗୁଜରାଟର ଗଧଙ୍କଠାରୁ ବିଶ୍ୱସ୍ତ ହେବା ଶିଖନ୍ତୁ ବୋଲି ମୋଦି କହିଥିଲେ। ଏହା କେବଳ ୟୁପି ନୁହେଁ, ଜାତୀୟ ରାଜନୀତିରେ ମଧ୍ୟ କୌତୂହଳ ସୃଷ୍ଟି କରିଥିଲା। ଅଖିଳେଶଙ୍କ ୫ ବର୍ଷ ତଳର ଗଧ ଉପାଖ୍ୟାନକୁ ପ୍ରଧାନମନ୍ତ୍ରୀ ମୋଦି ୟୁପି ନିର୍ବାଚନର ଅବ୍ୟବହିତ ପୂର୍ବରୁ ସ୍ମରଣ କରିଛନ୍ତି।