ଜୁନାଗଡ଼,୧୫।୩(ଡି.ଏନ.ଏ.): କଳାହାଣ୍ଡି ଜିଲା ଜୁନାଗଡ ସହର ହଣ୍ଡାଖାଲପଡାର ଡାକ୍ତରୀ ଛାତ୍ର ଶାନ୍ତି କୁମାର ନାୟକ ୟୁକ୍ରେନରୁ ରବିବାର ଘରକୁ ଫେରିଛନ୍ତି। ଫଳରେ ଶାନ୍ତିଙ୍କ ମା, ବାପା ଓ ପରିବାରବର୍ଗଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ଶାନ୍ତି ୟୁକ୍ରେନ୍ର ଖାରକିଭ୍ ନ୍ୟାଶନାଲ ମେଡିକାଲ ୟୁନିଭରସିଟିର ଦ୍ୱିତୀୟ ବର୍ଷର ଛାତ୍ର।
ସୋମବାର ଶାନ୍ତି ୟୁକ୍ରେନର ଅନୁଭୁତି ବିଷୟରେ କହିଛନ୍ତି। ତାଙ୍କ କହିବାନୁଯାୟୀ, ରୁଷିଆର ତୁହାକୁ ତୁହା ବୋମା, ମିସାଇଲ ମାଡ ବିଶେଷ କରି ଖାରକିଭ୍ରେ ପ୍ରଭାବ ଅଧିକ ଦେଖିବାକୁ ମିଳିଥିଲା। ରହୁଥିବା ଆପାର୍ଟମେଣ୍ଟ ନିକଟରେ ମିସାଇଲ ମାଡ ଯୋଗୁ ଭୟରେ ସେ ଓ ତାଙ୍କ ସାଙ୍ଗମାନେ ନିକଟ ମେଟ୍ରୋ ରେଲୱେ ଟନେଲକୁ ଚାଲିଆସିଥିଲେ। ଏହି ଘଟଣାରେ ପରେ ସେଠାରେ ଦୋକାନ, ବଜାରଗୁଡିକ ବନ୍ଦ ହୋଇଯିବାରୁ ସେମାନଙ୍କୁ ୯ ଦିନ ଭୋକରେ ରହିବାକୁ ପଡିଥିଲା। ଭୋକରେ ମରିବା ଅପେକ୍ଷା ସେ ଓ ତାଙ୍କ କେତେଜଣ ସାଙ୍ଗ ୟୁକ୍ରେନ୍ ସହ ଯୁଦ୍ଧରେ ସାମିଲ ହେବା ପାଇଁ ମନ ବଳାଇଥିଲେ। ତେବେ ପାଖରେ ଟଙ୍କା ନ ଥିବାରୁ ଉକ୍ତ ସ୍ଥାନକୁ ସେମାନେ ଯାଇ ନ ପାରିଥିଲେ। ଏପରିସ୍ଥଳେ ରାଜ୍ୟ ସରକାରଙ୍କ ଉଦ୍ୟମକ୍ରମେ ଗ୍ଲୋବାଲ ଫୋକସ୍ ଅରଗାନାଇଜେଶନ ପକ୍ଷରୁ ସେଠାରେ ରହୁଥିବା ଭାରତୀୟ ଛାତ୍ରଙ୍କୁ ରୁମାନିଆ ବୋର୍ଡର ପର୍ଯ୍ୟନ୍ତ ନେବା ପାଇଁ ଏକ ସ୍ବତନ୍ତ୍ର ବସ୍ ପୋଷାଚୀନରେ ରହିଥିଲା। ଫଳରେ ଶାନ୍ତି ଓ ତାଙ୍କ ସାଙ୍ଗମାନେ ଖାରକିଭ୍ରୁ ୨୫ କି.ମି. ଦୂର ପର୍ଯ୍ୟନ୍ତ ଚାଲି ଆସିଥିଲେ। ସେଠାରୁ ବସ୍ ଯୋଗେ ୨ ଦିନ ଯାତ୍ରା ପରେ ସେମାନେ ରୁମାନିଆ ବୋର୍ଡରରେ ପହଞ୍ଚତ୍ଥିଲେ। ପରେ ଭାରତ ସରକାରଙ୍କ ଅପ୍ରେଶନ ଗଙ୍ଗା ପକ୍ଷରୁ ଏକ ସ୍ବତନ୍ତ୍ର ବିମାନରେ ନୂଆଦିଲ୍ଲୀ ଆସିଥିଲେ। ସେଠାରୁ ସେ ରବିବାର ଘରେ ପହଞ୍ଚତ୍ଛନ୍ତି। ଶାନ୍ତି ଜୁନାଗଡ ସହର ହଣ୍ଡାଖାଲପଡାର ଶିକ୍ଷକ ପ୍ରବୀର କୁମାର ନାୟକ ଓ ମା’ ପ୍ରିୟତମାଙ୍କ ଏକମାତ୍ର ପୁଅ। ନିଜ ସାଙ୍ଗମାନଙ୍କ ସହ ସୁରକ୍ଷିତ ଭାବେ ସେ ଘରକୁ ଫେରିଥିବାରୁ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ କୃତଜ୍ଞତା ଜଣାଇଛନ୍ତି।