ନୂଆଦିଲ୍ଲୀ, ୪।୫: ଆଇପିଏଲରେ ଅଂଶଗ୍ରହଣ କରିଥିବା ବିଦେଶୀ ଖେଳାଳିଙ୍କୁ ଯେମିତି ହେଲେ ଘରକୁ ପଠାଯିବ। କୋଭିଡ୍-୧୯ ମହାମାରୀ କାରଣରୁ ଚଳିତ ସିଜନକୁ ବାତିଲ ହେବା ପରେ ଆଇପିଏଲ ଚେୟାରମ୍ୟାନ ବ୍ରିଜେଶ ପଟେଲ ଏଭଳି କହିଛନ୍ତି।
ସନରାଇଜର୍ସ ହାଇଦ୍ରାବାଦ୍ ଉଇକେଟକିପର ରିଦ୍ଧିମାନ ଶାହ ଓ ଦିଲ୍ଲୀ କ୍ୟାପିଟାଲ୍ସର ଲେଗ୍ ସ୍ପିନର ଅମିତ୍ ମିଶ୍ରା ପଜିଟିଭ୍ ଚିହ୍ନଟ ହେବା ପରେ ଆଇପିଏଲ-୧୪କୁ ବାତିଲ କରିବାକୁ ନିଷ୍ପତ୍ତି ନେଇଛି ବିସିସିଆଇ। ବିଦେଶୀ ଖେଳାଳି କେଉଁ ଭଳି ସ୍ବଦେଶ ଫେରିବେ ବୋଲି ପ୍ରଶ୍ନ କରାଯାଇଥିଲା। ଉତ୍ତରରେ ବ୍ରିଜେଶ କହିଥିଲେ, ସେମାନଙ୍କୁ ଘରକୁ ପଠାଇବା ଦରକାର। ଆମ ବାଟ ଖୋଜି ବାହର କରିବୁ। ଏହା ଛଡ଼ା ଆଉ କିଛି କହି ନାହାନ୍ତି।
ଭାରତରୁ ବିମାନ ଚଳାଚଳ ଉପରେ ପ୍ରତିବନ୍ଧକ ଲାଗିଥିବାରୁ ସବୁଠୁ ଲୋକପ୍ରିୟ କ୍ରିକେଟ ଲିଗ୍ରେ ଅଂଶଗ୍ରହଣ କରିଥିବା ବିଦେଶୀ ଖେଳାଳି ସ୍ବଦେଶ ଫେରିବା ଲାଗି ଚିନ୍ତିତ ଥିଲେ। ସେମାନଙ୍କୁ ସୁରକ୍ଷିତ ସ୍ବଦେଶରେ ଛାଡ଼ିବା ପାଇଁ ଆଶ୍ୱାସନା ଦେଇଥିଲା ବିସିସିଆଇ। ଅଷ୍ଟ୍ରେଲିଆର ୩ ଖେଳାଳି ଓହରିଯିବା ପରେ ଆଉ ୧୪ ଜଣ ଖେଳାଳି ଆଇପିଏଲରେ ଖେଳୁଥିଲେ। ବିଦେଶୀ ଖେଳାଳିଙ୍କ ତାଲିକାରେ ନ୍ୟୁଜିଲାଣ୍ଡର ୧୦, ଇଂଲଣ୍ଡ ଓ ଦକ୍ଷିଣ ଆଫ୍ରିକାର ୧୧, ଓ୍ବେଷ୍ଟଇଣ୍ଡିଜର ୯, ଆଫଗାନିସ୍ତାନର ୩ ଓ ବାଂଲାଦେଶର ୨ ଖେଳାଳି ରହିଛନ୍ତି।