ନୂଆଦିଲ୍ଲୀ,୬।୮: ହିନ୍ଦୀ ଭାଷାକୁ ନେଇ ପୁଣି ଥରେ ବିତର୍କ ଆରମ୍ଭ ହୋଇଛି। ହିନ୍ଦୀ ଭାଷାକୁ ଗ୍ରହଣ ପାଇଁ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ‘ସାହସିକ ଉଦ୍ୟମ’କୁ ନିନ୍ଦା କରି ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ କହିଛନ୍ତି ଯେ, ଆମେ ହିନ୍ଦୀର ଗୋଲାମ ହେବୁ ନାହିଁ।
ଏମ.କେ ଷ୍ଟାଲିନ ଟୁଇଟ୍ କରି କହିଛନ୍ତି, ମୁଁ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ହିନ୍ଦୀ ଭାଷାକୁ ଗ୍ରହଣ କରିବାକୁ ଅହେତୁକ ପ୍ରୟାସକୁ ଦୃଢ ନିନ୍ଦା କରୁଛି। ଅଣ-ହିନ୍ଦୀ ଭାଷାଭାଷୀ ଲୋକଙ୍କୁ ବଶୀଭୂତ କରିବା ପାଇଁ ଏହା ଏକ ଖୋଲା ପ୍ରୟାସ। ତାମିଲନାଡୁ କୌଣସି ପ୍ରକାରର ହିନ୍ଦୀ ଆଧିପତ୍ୟକୁ ପ୍ରାଧାନ୍ୟ ଦେବ ନାହିଁ। ଭାଷା ଏବଂ ଐତିହ୍ୟ ଆମକୁ ପରିଭାଷିତ କରେ। ଆମେ ହିନ୍ଦୀର ଗୋଲାମ ହେବୁ ନାହିଁ।
ରିପୋର୍ଟ ଅନୁଯାୟୀ, ଗତ ଶୁକ୍ରବାର କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ନୂଆଦିଲ୍ଲୀରେ ସରକାରୀ ଭାଷା ଉପରେ ସଂସଦ କମିଟିର ୩୮ତମ ବୈଠକରେ ଅଧ୍ୟକ୍ଷତା କରିଥିଲେ। ସେ କହିଥିଲେ ଯେ, ହିନ୍ଦୀକୁ ବିରୋଧ ନ କରି ଗ୍ରହଣ କରାଯିବା ଉଚିତ। ହିନ୍ଦୀ ଅନ୍ୟ ଭାଷା ସହିତ ପ୍ରତିଦ୍ୱନ୍ଦ୍ୱିତା କରୁନାହିଁ ଏବଂ ସମସ୍ତ ଭାରତୀୟ ଭାଷାକୁ ପ୍ରୋତ୍ସାହିତ କରି ଦେଶକୁ ସଶକ୍ତ କରାଯିବ।