ବାରିପଦା ଅଫିସ,୨।୨: ମୌଳିକ ସୁବିଧାରୁ ବଞ୍ଚିତ ମୟୂରଭଞ୍ଜ ଜିଲା ବଡ଼ସାହି ବ୍ଲକ ଅଧୀନ ପୂର୍ଣ୍ଣଚନ୍ଦ୍ରପୁର ପଞ୍ଚାୟତ କମଳାଶୋଳ ଗ୍ରାମବାସୀ ପଞ୍ଚାୟତ ନିର୍ବାଚନରେ ଭୋଟ ବର୍ଜନ କରିବେ ବୋଲି ଚେତାବନୀ ଦେଇଛନ୍ତି। ଏନେଇ ଶତାଧିକ ମହିଳା ପୁରୁଷ ବାରିପଦା ସଦର ଉପଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଜିଲାପାଳ ଓ ବଡ଼ସାହି ବିଡିଓଙ୍କୁ ମଧ୍ୟ ଅବଗତ କରି ବିହୀତ କାର୍ଯ୍ୟାନୁଷ୍ଠାନ ଲାଗି ଦାବି କରିଛନ୍ତି।
ଗ୍ରାମରେ ଥିବା ୮, ୯ ଏବଂ ୧୦ ନମ୍ବର ୱାର୍ଡରେ ୭ଶହରୁ ଊର୍ଦ୍ଧ୍ୱ ଭୋଟର ରହିଛନ୍ତି। ହେଲେ ଏହି ୱାର୍ଡ ଗୁଡ଼ିକରେ ଶିକ୍ଷା, ସ୍ବାସ୍ଥ୍ୟ, ପାନୀୟଜଳ, ଗମନାଗମନ, ବିଦ୍ୟୁତ୍ ଆଦି ସମସ୍ୟା ଦୀର୍ଘ ବର୍ଷ ଧରି ରହିଆସିଛି। ନିର୍ବାଚନ ଆସିଲେ ମାଳ ମାଳ ନେତାଙ୍କ ପ୍ରତିଶ୍ରୁତି ବ୍ୟତୀତ ଅନ୍ୟ କୌଣସି ମିଳି ନ ଥାଏ ବୋଲି ଗ୍ରାମର ରବୀନ୍ଦ୍ର ସିଂ, ସୁରେନ୍ଦ୍ର ସିଂ ପ୍ରକାଶ କରିଛନ୍ତି। ଉକ୍ତ ୱାର୍ଡର ବହୁ ହିତାଧିକାରୀ ବିଜୁ ପକ୍କାଘର ଓ ପ୍ରଧାନମନ୍ତ୍ରୀ ଆବାସ ଯୋଜନାରୁ ବଞ୍ଚିତ ହୋଇ ଚାଳଛପର ଘରେ ଦିନ ବିତାଉଛନ୍ତି। ୨୨ନମ୍ବର ଜିଲାପରିଷଦ ଜୋନ ଅଧୀନରେ ଏହି ୩ଟି ୱାର୍ଡ ରହିଥିବା ବେଳେ ବିଭିନ୍ନ ପଦବୀରେ ନିର୍ବାଚିତ ଜନପ୍ରତିନିଧି ପରବର୍ତ୍ତୀ ସମୟରେ ନିଜ ସ୍ବାର୍ଥପ୍ରତି ଧ୍ୟାନ ଦେଉଥିବା ଗ୍ରାମବାସୀ ଶୁକଦେବ ସିଂ, ରାମ ସିଂ, ଦେବ ସିଂ ପ୍ରମୁଖ ଅଭିଯୋଗ କରିଛନ୍ତି। ଏନେଇ ଭୋଟ ବର୍ଜନ କରିବାକୁ ନିଷ୍ପତ୍ତି ନେଇଥିବା ଗ୍ରାମବାସୀ କହିଛନ୍ତି।