ପଦ୍ମପୁର,୨।୧୧(ଡି.ଏନ.ଏ.): ସ୍ବାଧୀନତାର ୭୫ବର୍ଷ ପୂର୍ତ୍ତି ଅବସରରେ ଦେଶ ଅମୃତ ମହୋତ୍ସବ ପାଳନ କରୁଛି। ଅଥଚ ଦେଶର ଚାଷୀମାନେ ଆଜି ମଧ୍ୟ ଶୋଷିତ, ଋଣଗ୍ରସ୍ତ ଏବଂ ଅବହେଳିତ ଅବସ୍ଥାରେ ରହିଛନ୍ତି। କୃଷକଙ୍କ ବୃତ୍ତି ଓ ଭବିଷ୍ୟତ ପୁଞ୍ଜିପତିଙ୍କ ହାତରେ ବନ୍ଧା ପଡ଼ିଛି। ସରକାରଙ୍କ ଭୁଲନୀତି ଯୋଗୁ କୃଷକଙ୍କୁ ତାର ହକ୍ ମିଳୁନାହିଁ। ହକ୍ ପାଇଁ ସେମାନଙ୍କୁ ଲଢ଼େଇ କରିବାକୁ ପଡ଼ୁଛି। ବରଗଡ଼ ଜିଲା ପଦ୍ମପୁର ଗୋରୁ ବଜାରରେ ମଙ୍ଗଳବାର ରାଜବୋଡ଼ାସମ୍ବର କୃଷକ ସଙ୍ଗଠନ ନେତୃତ୍ୱରେ ହୋଇଥିବା କୃଷକ ଚେତାବନୀ ସମାବେଶରେ ଚାଷୀନେତାମାନେ ଉଦ୍ବୋଧନ ଦେଇ କ୍ଷୋଭ ପ୍ରକାଶ କରିଛନ୍ତି। ଚାଷୀଙ୍କ ପ୍ରତି ଏଭଳି ଅତ୍ୟାଚାର, ଅଣଦେଖାକୁ ବରଦାସ୍ତ କରାଯିବନାହିଁ ବୋଲି ଚେତାବନୀ ଦିଆଯାଇଛି। ସମାବେଶ ସରିବା ପରେ ଚାଷୀ ପ୍ରତିନିଧିମାନେ ପଦ୍ମପୁର ଉପଜିଲାପାଳଙ୍କ ଅଫିସ ଆଗରେ ଧାରଣା ଦେଇଥିଲେ। ଚାଷୀମାନେ ରାଜ୍ୟ ଓ କେନ୍ଦ୍ର ସରକାରଙ୍କ କୃଷକମାରଣ ନୀତିକୁ କଠୋର ସମାଲୋଚନା କରିବା ସହ ଆଗାମୀ ପଦ୍ମପୁର ଉପନିର୍ବାଚନରେ ଏହାର ଉଚିତ ଜବାବ ଦିଆଯିବ ବୋଲି ପ୍ରକାଶ କରିଥିଲେ। ଚାଷୀଙ୍କୁ ଯେତେଦିନ ପର୍ଯ୍ୟନ୍ତ ବୀମା କ୍ଷତିପୂରଣ ଏବଂ ଇନପୁଟ୍ ସବସିଡ଼ି ନ ମିଳିଛି, ସେତେଦିନ ଯାଏ ଧାରଣା ଜାରି ରହିବ ବୋଲି ସଙ୍ଗଠନ ପକ୍ଷରୁ ସୂଚନା ଦିଆଯାଇଛି।
ମଙ୍ଗଳବାର ସକାଳ ୧୦ଟାରେ ରାଜବୋଡାସମ୍ବର କୃଷକ ସଙ୍ଗଠନ ନେତୃତ୍ୱରେ ଚାଷୀମାନେ ପାରମ୍ପରିକ ବାଦ୍ୟ, ଲଙ୍ଗଳ, ଦା’ ଧରି ସହର ପରିକ୍ରମା କରିଥିଲେ। ଶୋଭାଯାତ୍ରାରେ କୋଶଲ ମୁକ୍ତି ମୋର୍ଚ୍ଚା, କୋଶଲ ସେନା ଓ ଅନେକ ଗ୍ରାମ୍ୟ କୃଷକ ସଙ୍ଗଠନ ସାମିଲ ହୋଇଥିଲେ। ପରେ ଗୋରୁବଜାର ପ୍ରାଙ୍ଗଣରେ ସଙ୍ଗଠନ ସଭାପତି ବାଞ୍ଛାନିଧି ନାୟକଙ୍କ ଅଧ୍ୟକ୍ଷତାରେ ବୀମା କ୍ଷତିପୂରଣ ଓ ଇନ୍ପୁଟ ସବ୍ସିଡି ସମେତ ୧୩ ଦଫା ଦାବିରେ ଚେତାବନୀ ସମାବେଶ ଅନୁଷ୍ଠିତ ହୋଇଥିଲା। ରାଜବୋଡାସମ୍ବର କୃଷକ ସଙ୍ଗଠନ ଆବାହକ ଅଶୋକ ସାହୁ ଅତିଥି ପରିଚୟ ପ୍ରଦାନ କରିଥିଲେ। ରମେଶ ମହାପାତ୍ର ଓ ଲିଙ୍ଗରାଜ ପ୍ରଧାନ ଉଦ୍ଦେଶ୍ୟ ଜ୍ଞାପନ କରିଥିଲେ। ସମାବେଶରେ ବରିଷ୍ଠ ସାମ୍ବାଦିକ ରତ୍ନମଣି ଶତପଥିଙ୍କୁ ସମର୍ପିତ ସେବା ସମ୍ମାନ-୨୦୨୨, ବିପ୍ଲବୀ କବି ନୀତିଶ ଆଚାର୍ଯ୍ୟଙ୍କୁ କମିହାଁ କବି ସମ୍ମାନ-୨୦୨୨ ଓ ଯୁବଚାଷୀ ଅଜିତ ବିଶ୍ୱାଳଙ୍କୁ ଆଦର୍ଶ ଯୁବ କୃଷକ ସମ୍ମାନ-୨୦୨୨ରେ ସମ୍ମାନିତ କରାଯାଇଥିଲା। ପଶ୍ଚିମ ଓଡିଶା କୃଷକ ସଙ୍ଗଠନ ସମନ୍ବୟ ସମିତିର ନିରଞ୍ଜନ ବିଦ୍ରୋହୀ, ଅଶୋକ ପଧାନ, ବ୍ୟୋମକେଶ ଠାକୁର, ପ୍ରବକ୍ତା ସରୋଜ ମହାନ୍ତି, ଦେବେନ ପ୍ରଧାନ, ମୁରାରୀ ପୁରୋହିତ, ଠାକୁରରାମ ପଟେଲ, ଉତ୍ପନ୍ନ ଭୋଇ, ଆଇନ ପରାମର୍ଶଦାତା ଅଜିତ ଶତପଥି, ଅଶୋକ ସାହୁ, ଉପଖଣ୍ଡ ଅଧୀନ ସମସ୍ତ ବ୍ଲକ ସଙ୍ଗଠନ ସଭାପତିଗଣ ଉପସ୍ଥିତ ଥିଲେ।