ବରୀ, ୨୪।୮(ଡି.ଏନ୍.ଏ.): ଲଗୁଚାପ ଜନିତ ଲଗାଣ ବର୍ଷା ଯୋଗୁ ବରୀ ବ୍ଲକ ଅଞ୍ଚଳ ଦେଇ ପ୍ରବାହିତ ନଦୀରେ ଜଳସ୍ତର ବୃଦ୍ଧି ପାଉଥିବା ବେଳେ ବନ୍ୟା ଆଶଙ୍କା ବଢ଼ିବାରେ ଲାଗିଛି। ଗତ ୨୩ ତାରିଖରେ ବଙ୍ଗୋପସାଗରରେ ଆଉ ଏକ ଲଘୁଚାପ ସୃଷ୍ଟି ହୋଇଥିବାରୁ ଆସନ୍ତା ୪ ଦିନ ପର୍ଯ୍ୟନ୍ତ ଯାଜପୁର ଜିଲାରେ ପ୍ରବଳ ବର୍ଷା ହେବା ସମ୍ଭାବନା ରହିଛି। ତେବେ ବରୀ ବ୍ଲକ ଅଞ୍ଚଳ ଦେଇ ପ୍ରବାହିତ ବିଭିନ୍ନ ନଦୀ ବନ୍ଧଗୁଡ଼ିକର ଦୁର୍ବଳ ଅବସ୍ଥା ଯୋଗୁ ତଳିଆ ଅଞ୍ଚଳବାସୀଙ୍କ ନିଦ ହଜିଯାଇଛି।
ବ୍ରାହ୍ମଣୀ ନଦୀବନ୍ଧ ଦକ୍ଷୀଣ ପାର୍ଶ୍ୱର କୁଶବଟଠାରୁ ମାଟିଆପଡ଼ା ପର୍ଯ୍ୟନ୍ତ ଓ ଅଣିକଣାଠାରୁ କୃଷ୍ଣନଗର ପର୍ଯ୍ୟନ୍ତ ବିଭିନ୍ନ ସ୍ଥାନରେ ଗର୍ତ୍ତ ସୃଷ୍ଟି ହୋଇଛି। ବିଗତ ବର୍ଷଗୁଡ଼ିକରେ ବ୍ରାହ୍ମଣୀରେ ବନ୍ୟା ଅସିଲେ ଉକ୍ତ ସ୍ଥାନଗୁଡ଼ିକରେ ଘାଇ ସୃଷ୍ଟି ହେଉଥିବାରୁ ଆଖପାଖ ଅଞ୍ଚଳବାସୀ ଆଶଙ୍କାରେ ଦିନ କାଟୁଛନ୍ତି। ନଦୀବନ୍ଧଗୁଡ଼ିକ ଦୁର୍ବଳ ରହିଥିଲେ ବି ବିଭାଗୀୟ କର୍ତ୍ତୃପକ୍ଷ ଏ ଦିଗରେ ଦୃଷ୍ଟି ଦେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏହାବ୍ୟତୀତ ଖରସ୍ରୋତାର ଶାଖା ଦୁଧେଇ ନଦୀର ଜଳପତ୍ତନ ବୃଦ୍ଧି ପାଉଥିବା ବେଳେ ନଦୀବନ୍ଧ ଦୀର୍ଘବର୍ଷ ଧରି ମରାମତି କରାଯାଇନି। ଫଳରେ କଳାମାଟିଆ, ଅନ୍ୟାସିପୁର, ବାଲିବିଲ, ଅରଙ୍ଗାବାଦ, ଅଙ୍ଗାଳୋ, ବୋଦୁଅ ଓ ଭଅଁରା ପଞ୍ଚାୟତର ବହୁ ରାଜସ୍ବ ଗ୍ରାମଗୁଡ଼ିକ ବନ୍ୟା ଭୟରେ ରହିଛନ୍ତି। ଦୁଧେଇ ନଦୀର ଦକ୍ଷିଣପାର୍ଶ୍ୱ ନଦୀବନ୍ଧଗୁଡ଼ିକ ଦୀର୍ଘଦିନ ଧରି ମରାମତି ହୋଇ ନ ଥିବା ବେଳେ ଲଘୁଚାପଜନିତ ବର୍ଷା ଯୋଗୁ କେତେକ ସ୍ଥାନରେ ଗର୍ତ୍ତ ସୃଷ୍ଟି ହୋଇଛି। ସାମ୍ଭାବ୍ୟ ବନ୍ୟା ପରିସ୍ଥିତିକୁ ଆଖିଆଗରେ ରଖି ବରୀ ବିଧାୟିକା ସୁନନ୍ଦା ଦାସ, ଅତିରିକ୍ତ ତହସିଲଦାର ଭାନୁମତୀ ମାଝି ଓ କୃଷି ବିଭାଗ କର୍ମଚାରୀମାନେ ଅନ୍ୟାସୀପୁର, ବାଲିବିଲ, ଅରଙ୍ଗାବାଦ, କଳାମାଟିଆ ପ୍ରଭୃତି ପଞ୍ଚାୟତର ବିଭିନ୍ନ ଗ୍ରାମ ପରିଦର୍ଶନ କରି ଫେରିଛନ୍ତି। ନଦୀରେ ବନ୍ୟା ଜଳ ବୃଦ୍ଧି ପାଉଥିବା ବେଳେ ଲୋକମାନଙ୍କର ଯେପରି କୌଣସି ଅସୁବିଧା ନ ହୁଏ ସେ ନେଇ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରାଯାଇ ସମସ୍ତ ପ୍ରକାର ପଦକ୍ଷେପ ନିଆଯିବ ବୋଲି ବିଧାୟିକା ଦାସ କହିଛନ୍ତି।