ବେଜିଂ, ୨୪ା୧୧: ଆମେରିକା ରାଷ୍ଟ୍ରପତି ନିର୍ବାଚନରେ ଜୋ ବାଇଡେନ୍ ବାଜିମାରିବା ପରେ ଚାଇନା ଅଧିକ ଚିନ୍ତିତ ହୋଇପଡ଼ିଛି। ବାଇଡେନ୍ ବିଜୟୀ ହେବା ପରେ ବେଜିଂ ସହ ଆମେରିକାର ସମ୍ପର୍କ ସୁଧୁରିବ ଭାବିବା ଠିକ୍ ନୁହେଁ ବୋଲି ଚାଇନାର ବୈଦେଶିକ ନୀତି ଉପଦେଷ୍ଟା ଝେଙ୍ଗ୍ ୟୋଙ୍ଗନିଆନ୍ କହିଛନ୍ତି। ଆମେରିକା ବିରୋଧରେ ସତର୍କ ରହିବା ଓ ପ୍ରତ୍ୟେକ ସୁଯୋଗର ଲାଭ ଉଠାଇବା ପାଇଁ ଚାଇନା ସରକାର ସର୍ବଦା ପ୍ରସ୍ତୁତ ରହିବାକୁୂ ସେ ପରାମର୍ଶ ଦେଇଛନ୍ତି।
ଥିଙ୍କ୍ଟ୍ୟାଙ୍କ୍ ‘ଆଡ୍ଭାନ୍ସଡ୍ ଇନ୍ଷ୍ଟିଚ୍ୟୁଟ୍ ଅଫ୍ ଗ୍ଲୋବାଲ ଆଣ୍ଡ୍ କଣ୍ଟେପରାରି ଚାଇନା ଷ୍ଟଡିଜ୍’ର ଡିନ୍ ଝେଙ୍ଗ୍ କହିଛନ୍ତି, ପୁରୁଣା ଭଲଦିନ ଆଉ ନାହିଁ। ଶୀତଳ ଯୁଦ୍ଧ ମାନସିକତା ଆମେରିକାର ରହିଛି। ହ୍ବାଇଟ୍ହାଉସ୍କୁ ଆସିବା ପରେ ବାଇଡେନ୍ ସୁଯୋଗର ଫାଇଦା ଉଠାଇବା ଲାଗି ପ୍ରୟାସ କରିବେ। ସେ ଆମେରିକାର ଜଣେ ଦୁର୍ବଳ ଓ ସବୁଠୁ ବୟସ୍କ ରାଷ୍ଟ୍ରପତି ହେବାକୁ ଯାଉଛନ୍ତି। ଘରୋଇ ସମସ୍ୟାର ସମାଧାନ ଲାଗି କୂଟନୈତିକ ପଦକ୍ଷେପ ସେ ଗ୍ରହଣ କରି ଚାଇନା ବିରୋଧରେ କଠୋର ପଦକ୍ଷେପ ନେଇପାରନ୍ତି। ଟ୍ରମ୍ପ ଯୁଦ୍ଧ ଲାଗି ଆଗ୍ରହୀ ନ ଥିଲେ, ହେଲେ ବାଇଡେନ ଯୁଦ୍ଧ କରିପାରନ୍ତି ବୋଲି ଝେଙ୍ଗ୍ ଆଶଙ୍କା ବ୍ୟକ୍ତ କରିଛନ୍ତି। ପୂର୍ବରୁ ବାଇଡେନ୍ ଚାଇନାକୁ ଦୋଷ ଦେବା ସହ ରାଷ୍ଟ୍ରପତି ଶି ଜିନ୍ପିଙ୍ଗଙ୍କୁ ହତ୍ୟାକାରୀ କହିଥିଲେ। କୋଭିଡ୍-୧୯, ମାନବାଧିକାର ପ୍ରସଙ୍ଗ ଓ ବାଣିଜ୍ୟ ଯୁଦ୍ଧକୁ ନେଇ ଦୁଇଦେଶ ମଧ୍ୟରେ ସମ୍ପର୍କ ତିକ୍ତ ରହିଛି। କଂଗ୍ରେସରେ ଚାଇନା ବିରୋଧରେ ୩୦୦ ଅଲଗା ଅଲଗା ବିଲ୍ ପଡ଼ିରହିଛି। ରିପବ୍ଲିକାନ୍ ଓ ଡେମୋକ୍ରାଟ୍ ଏହାକୁ ସମର୍ଥନ କରିଆସୁଛନ୍ତି। ତେଣୁ ବାଇଡେନ୍ଙ୍କ ରାଷ୍ଟ୍ରପତିତ୍ୱ କାଳରେ ଆମେରିକା- ଚାଇନା ସମ୍ପର୍କ ବିଗିଡ଼ିବା ଆଶଙ୍କା ରହିଛି। ଏସବୁକୁ ନେଇ ଚାଇନା ସତର୍କତାର ସହ କାର୍ଯ୍ୟ କରିବାକୁ ବୈଦେଶିକ ନୀତି ବିଶେଷଜ୍ଞ ଝେଙ୍ଗ୍ ପରାମର୍ଶ ଦେଇଛନ୍ତି।