ମହାକାଳପଡ଼ା,୨୮ା୫(ଡି.ଏନ୍.ଏ.): ବାତ୍ୟା ୟାସ୍ ପ୍ରଭାବରେ ସମୁଦ୍ର ମୁହାଣ ଅଶାନ୍ତ ଯୋଗୁ ତଟାଞ୍ଚଳ ଚାଷଜମିରେ ଲୁଣାଜଳ ପ୍ରବେଶ କରିଛି। ଅନେକ ଚାଷଜମିରେ ସମୁଦ୍ର ଜଳ ଲହଡି ମାରୁଛି। ଦୁର୍ବଳ ଲୁଣା ଘେରିବନ୍ଧ ନିର୍ମାଣ ଯୋଗୁ ଘାଇ ସୃଷ୍ଟି ହୋଇଛି। ଚଳିତ ଖରିଫ ଋତୁରେ ଚାଷୀଙ୍କ ଧାନ ଚାଷ ନେଇ ଆଶଙ୍କା ପ୍ରକାଶ ପାଇଛି। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ବ୍ୟାପକ ପରିମାଣରେ ଲୁଣାଜଳ ପ୍ରବେଶ କରୁଥିବା ନେଇ ଚାଷୀଙ୍କ ମଧ୍ୟରେ ଆତଙ୍କ ଖେଳିଯାଇଛି। ବ୍ଲକ ଅଧୀନ ଜମ୍ବୁ, ଖରିନାସୀ, ରମନଗର, କେବିଦାଣ୍ଡୁଆ, ନାଞ୍ଜୁରା, ସୁନୀତି, ପେଟଚ୍ଛେଲା, ବଉଳକଣି, ବାରଡାଙ୍ଗ, ବତିଘର ଆଦି ଅଞ୍ଚଳରେ ଶତାଧିକ ହେକ୍ଟର ଜମିରେ ଲୁଣାଜଳ ପ୍ରବେଶ କରିଛି। ଆଗାମୀ ଖରିଫ ଚାଷ ନିମନ୍ତେ ତଳି ପକାଇବା ପାଇଁ ଚାଷୀଙ୍କ ଚିନ୍ତା ବଢ଼ିଛି। ସେହିପରି ବ୍ଲକ ତଳିଆ ଅଞ୍ଚଳରେ ଲୁଣା ଘେରିବନ୍ଧ ଭାଙ୍ଗି ଘାଇ ସୃଷ୍ଟି ହୋଇଛି। ଖରିନାସୀ ବାର ନମ୍ବର ଲୁଣାଘେରି ବନ୍ଧ, ବଡମଠ ଭିତର ଶୁବଳା, ବଗଗହଣ, ପଙ୍କପାଳ ଘେରିବନ୍ଧ, ସୁନୀତି, ବତିଘର ଆଦି ଅଞ୍ଚଳରେ ଅନେକ ଲୁଣା ଘେରିବନ୍ଧ ଭାଙ୍ଗି ସମୁଦ୍ର ଉଚ୍ଚ ଜୁଆର ଜଳ ପ୍ରବେଶ କରିଛି। ଅନେକ ଘେରିବନ୍ଧ ନିମ୍ନମାନର ଓ ଘେରିବନ୍ଧ ଦୁବଳ ଯୋଗୁ ଏଭଳି ଘାଇ ହୋଇଥିବା ସ୍ଥାନୀୟ ଚାଷୀ କହିଛନ୍ତି।