ଯେଉଁ ଗୋପାଳକମାନେ ଗାଈ ପାଳିଛନ୍ତି, ସେମାନେ ଚାହାନ୍ତି ସେମାନଙ୍କ ଗାଈ କେମିତି ଅଧିକରୁ ଅଧିକ କ୍ଷୀର ଦେଉ। ଆଉ ସେମାନେ ଏହାକୁ ବିକ୍ରି କରି ଲାଭବାନ ହୁଅନ୍ତୁ। ଏମିତିରେ ବଜାରରେ ଅଧିକ କ୍ଷୀର ଦେଉଥିବା ଗାଈଙ୍କ ମୂଲ୍ୟ ମଧ୍ୟ ସର୍ବାଧିକ ରହିଥାଏ।
ଏପରି ସ୍ଥିତିରେ, ଜଣେ ବ୍ୟକ୍ତି ଏମିତି ଏକ କୌଶଳ ଅପାଣାଇଛନ୍ତି; ଯାହା ଦ୍ୱାରା ଗାଈମାନେ ସ୍ବଳ୍ପ ଖର୍ଚ୍ଚରେ ଅଧିକ କ୍ଷୀର ଦେଉଛନ୍ତି। ତୁର୍କୀର ଜଣେ ଗୋପାଳକ ଅଧିକ କ୍ଷୀର ପାଇବା ପାଇଁ ଟେକ୍ନୋଲୋଜି ବ୍ୟବହାର କରିଛନ୍ତି। ଗାଈଟିକୁ ସେ ହାଇଟେକ୍ କରିଦେଇଛନ୍ତି। ଫଳରେ ଗାଈଟି ଯେତିକି କ୍ଷୀର ଦେଉଥିଲା ତା’ଠାରୁ ୫ ଲିଟର ଅଧିକ କ୍ଷୀର ଦେବା ଆରମ୍ଭ କରିଛି।
ତୁର୍କୀ ଅକ୍ସାରାୟାର ବାସିନ୍ଦା ଇଜ୍ଜତ କୋକାକ୍ ଗାଈକୁ ଭର୍ଚୁଆଲ ରିଅଲିଟି ଚଷମା ପିନ୍ଧାଇଥିଲେ। ବର୍ତ୍ତମାନ ଏକ ଖୋଲା ସବୁଜ ପଡ଼ିଆରେ ଗାଈ ଚରିବାକୁ ଲାଗିଲା। ସେ ଅନୁଭବ କଲା ଏକ ବଡ଼ କ୍ଷେତରେ ଚରୁଛି। କିନ୍ତୁ ବାସ୍ତବରେ ସେପରି ନୁହେଁ, ଗୋପାଳକ ଜଣକ ଗାଈଟିକୁ ତାଙ୍କ ଘର ନିକଟ ଏକ ଖୁଣ୍ଟରେ ବାନ୍ଧି ଦେଇଥିଲେ। ଏମିତି କରିବା ଦ୍ୱାରା ଗାଈଟି ଅଧିକ କ୍ଷୀର ଦେବାକୁ ଲାଗିଲା। ଏହା ଦେଖି ଅନ୍ୟ ଗୋପାଳକମାନେ ମଧ୍ୟ ସେପରି ପନ୍ଥା ଆପଣାଇବାରେ ଲାଗିଲେ। ପରୀକ୍ଷାମୂଳକ ଭାବରେ ଦେଖାଯାଇଛି ଏପରି ଚଷମା ପିନ୍ଧୁଥିବା ଗାଈ ଅଧିକରୁ ଅଧିକ କ୍ଷୀର ଦେଉଛନ୍ତି। ଫଳରେ ଗୋପାଳମାନେ ବେଶ୍ ଦୁଇ ପଇସା ରୋଜଗାର କରିପାରୁଛନ୍ତି।
