ବର୍ତ୍ତମାନ ନିଜ ତ୍ୱଚାକୁ ସୁନ୍ଦର ଏବଂ ଆକର୍ଷଣୀୟ କରିବା ଲାଗି ଅନେକେ ବିଭିନ୍ନ ପ୍ରକାର ଫେସ୍ ମାସ୍କ ବ୍ୟବହାର କରୁଥିବା ଦେଖିବାକୁ ମିଳୁଛି। ହେଲେ ଏହାକୁ ଲଗାଇବା ପରେ ବି ତ୍ୱଚାରେ ଇଚ୍ଛା ମୁତାବକ ଗ୍ଲୋ ଆସୁ ନ ଥିବା ଅଭିଯୋଗ କେତେକଙ୍କର ରହିଛି। ତେବେ ଏଥିପାଇଁ କ’ଣ ଦାୟୀ ଏବଂ କିପରି ଏହାକୁ ସୁଧାରିବେ ଜାଣି ରଖନ୍ତୁ ସେ ସମ୍ପର୍କରେ…
ଅନେକେ ଭାବନ୍ତି ଆମେ ଯେତେ ଅଧିକ ଫେସ୍ ମାସ୍କ ବ୍ୟବହାର କରିବା ମୁହଁ ସେତେ ଅଧିକ ଗ୍ଲୋ କରିବ। ହେଲେ ଏହା ଏକ ଭ୍ରାନ୍ତ ଧାରଣା। କାରଣ ଆବଶ୍ୟକରୁ ଅଧିକ ଫେସ୍ ମାସ୍କ ବ୍ୟବହାର କରିବା ବି ତ୍ୱଚା ପାଇଁ ଠିକ୍ ନୁହେଁ। ତେଣୁ ଫେସ୍ ମାସ୍କ ବ୍ୟବହାର କରିବା ପୂର୍ବରୁ ଏହାକୁ କେତେ ପରିମାଣରେ ଏବଂ କେତେ ସମୟ ପର୍ଯ୍ୟନ୍ତ ଲଗାଇଲେ ଉପକୃତ ହେବେ ସେ ସମ୍ପର୍କରେ କୌଣସି ବ୍ୟୁଟିସିଆନ୍ଙ୍କଠାରୁ ବୁଝି ନିଅନ୍ତୁ।
ଫେସ୍ ମାସ୍କ ବ୍ୟବହାର କରିବା ଲାଗି ଯଦି ବ୍ରସ୍ ବ୍ୟବହାର କରୁଛନ୍ତି ତେବେ ଏହାକୁ ସର୍ବଦା ପରିଷ୍କାର ରଖିବାକୁ ଚେଷ୍ଟା କରନ୍ତୁ କିମ୍ବା ହାତରେ ଲଗାଉଥିଲେ ପ୍ରଥମେ ହାତକୁ ଭଲ ଭାବେ ସଫା କରନ୍ତୁ। କାରଣ ଏପରି ନ କଲେ ହାତ କିମ୍ବା ବ୍ରସ୍ରେ ଥିବା ଅପରିଷ୍କାର ଜୀବାଣୁ ତ୍ୱଚାରେ ଲାଗିବା ଦ୍ୱାରା ବ୍ରଣ ସହ ତ୍ୱଚାର ଅନ୍ୟାନ୍ୟ ସମସ୍ୟା ମଧ୍ୟ ସୃଷ୍ଟି କରିଥାଏ।
ନିଜ ତ୍ୱଚାର ପ୍ରକାର ଯଥା- ଅଏଲି, ଡ୍ରାଏ କିମ୍ବା ନର୍ମାଲ ଜାଣିବା ପରେ ଫେସ୍ ମାସ୍କ ବାଛିବା ଆବଶ୍ୟକ। ନ ହେଲେ ଏହାକୁ ଲଗାଇବାର ସୁଫଳ ମିଳିବା ବଦଳରେ ତ୍ୱଚା ଡ୍ରାଏ ଲାଗିବା ସହ ଗ୍ଲୋ କମିଯିବା ଭଳି ସମସ୍ୟା ଦେଖାଦେଇଥାଏ।
ଫେସ୍ ମାସ୍କକୁ ବେଶି ସମୟ ଲଗାଇଲେ ତ୍ୱଚା ଅଧିକ ଗ୍ଲୋ କରିବ, ଏଭଳି ମାନସିକତା ଅନେକଙ୍କର ରହିଛି; ଯାହା କି ସେମାନଙ୍କଠାରେ ତ୍ୱଚା ରୁକ୍ଷ ହେବାପାଇଁ ଦାୟୀ। ତେଣୁ ମାସ୍କ ଶୁଖିଆସିଲେ ଏହାକୁ ଓଦା କରି ଆଙ୍ଗୁଠି ଟିପ ସାହାଯ୍ୟରେ ଧୀରେ ଧୀରେ ଛଡ଼ାନ୍ତୁ। ମନେରଖନ୍ତୁ ମାସ୍କ ଛଡ଼ାଇବା ବେଳେ ଆଦୌ ରଗଡ଼ନ୍ତୁ ନାହିଁ।