କୋକସରା,୨୭।୧୧(ଦୁଷ୍ମନ୍ତ କୁମାର ପାଟ୍ଟଯୋଶୀ): କଳାହାଣ୍ଡି ଜିଲାରେ ଗତ କିଛିଦିନ ହେବ କୋହଲା ପାଗ ଲାଗି ରହିଛି। ବର୍ତ୍ତମାନ ଖରିଫ ଋତୁ ଧାନ ପ୍ରାୟ ୬୦/୭୦ ପ୍ରତିଶତ ଅମଳ କରି ଖୋଲା ଆକାଶ ଧାନ ଖଳାରେ ରଖି ମଣ୍ଡି କେବେ ଖୋଲିବ ସେ ନେଇ ଚାଷୀମାନେ ଅପେକ୍ଷା କରି ରହିଥିବା ବେଳେ ବିଳମ୍ବିତ ମଣ୍ଡି ଚାଷୀଙ୍କ ଚିନ୍ତାକୁ ଦ୍ବିଗୁଣିତ କରିଛି। କୋକସରା ବ୍ଲକ ଏକ କୃଷି ପ୍ରଧାନ ଅଞ୍ଚଳ ହୋଇଥିବା ବେଳେ ୨୨ ପଞ୍ଚାୟତ ଚାଷୀମାନେ କେଳ ଧାନ ଚାଷ କରି ପରିବାର ପ୍ରତିପୋଷଣ ସହ ନିଜର ଆର୍ଥିକ ସ୍ଥିତି କରିଥାନ୍ତି। ବ୍ଲକରେ ଇନ୍ଦ୍ରାବତୀ ବାମ କେନାଲ ଓ ଉଠା ଜଳସେଚନ, ବେହେରା ଡ୍ୟାମ ପ୍ରକଳ୍ପରୁ ଅନେକ ପଞ୍ଚାୟତର ଚାଷୀମାନେ ଜଳସେଚନ ସୁବିଧା ପାଉଥିବା ବେଳେ କୃଷି ବିଭାଗ ଆକଳନ ଅନୁସାରେ ଚଳିତ ବର୍ଷ ୧୯ହଜାର ୫ଶହ ୩୦ ହେକ୍ଟର ଧାର୍ଯ୍ୟ ଲକ୍ଷ୍ୟ ରହିଥିବା ବେଳେ ୧୮ହଜାର ୭ଶହ ୮୬ ହେକ୍ଟର ଖରିଫ ଧାନ ଚାଷ ହୋଇଛି। ତେବେ ସ୍ବଳ୍ପ ମିଆଦି ଧାନ ସବୁ ଅମଳ ଶେଷ ହୋଇଥିବା ବେଳେ ଦୀର୍ଘ ମିଆଦି ଧାନ ଏବେ ଅମଳ କରୁଛନ୍ତି ଚାଷୀ। ଚଳିତବର୍ଷ ଜିଲା ପ୍ରଶାସନ ପକ୍ଷରୁ ଆସନ୍ତା ୨୯ ତାରିଖରୁ ମଣ୍ଡି ଖୋଲିବା ପାଇଁ ନିଷ୍ପତ୍ତି ନିଆଯାଇଛି। ଏ ପର୍ଯ୍ୟନ୍ତ ଧାନ ବିକ୍ରି ପଞ୍ଜୀକରଣ କରିଥିବା ଚାଷୀଙ୍କୁ ମଣ୍ଡିରେ ଧାନ ବିକ୍ରି କରିବା ପାଇଁ ଅନଲାଇନ ଟୋକନର ମେସେଜ ମଧ୍ୟ ଆସିନାହିଁ। କେବେ ଟୋକନ ମେସେଜ ଆସିବ ଓ କେବେ ଧାନ ବିକିବେ ଏହାକୁ ନେଇ ମଧ୍ୟ ଚାଷୀ ଆଶା ଓ ଆଶଙ୍କାରେ ରହିଛନ୍ତି। ତେବେ ଲାଗି ରହିଥିବା କୋହଲା ପାଗ ଯୋଗୁ ଚାଷୀ ଅମଳ କରି ଖଳାରେ ବିକ୍ରି ପାଇଁ ରଖିଥିବା ଧାନକୁ ନେଇ ଚିନ୍ତାରେ ପଡିଛନ୍ତି। ସମ୍ବଳ ଥିବା ଚାଷୀ ଧାନକୁ ସୁରକ୍ଷିତ ରଖିଥିବା ବେଳେ ଛୋଟ ଚାଷୀମାନେ ଧାନକୁ ଖୋଲା ଆକାଶ ତଳେ ପଲିଥିନ କିମ୍ବା ପାଳ ଢାଙ୍କି ରଖିଛନ୍ତି। ଚାଷୀଙ୍କ ସମସ୍ୟାକୁ ଦୃଷ୍ଟିରେ ରଖି ଜିଲା ପ୍ରଶାସନ ଶୀଘ୍ର ମଣ୍ଡି ଖୋଲିବାକୁ କୋକସରା ବ୍ଲକ ଅଞ୍ଚଳର ଚାଷୀ ଦାବି କରିଛନ୍ତି।