ଜଗତ୍ସିଂହପୁର, ୨୯ା୮(ପ୍ରମୋଦ ନାୟକ): କୌଣସି ନାଗରିକଙ୍କୁ ସୂଚନା ଅଧିକାର (ଆର୍ଟିଆଇ)ରୁ ବଞ୍ଚତ୍ତ କରାଯାଇପାରିବ ନାହିଁ। ତେଣୁ ନିର୍ଦ୍ଦେଶ ପାଇବାର ୬୦ ଦିନ ଭିତରେ ଅଫିସିଆଲ ୱେବସାଇଟ୍ ଅପଡେଟ୍ କର। ଜଗତ୍ସିଂହପୁର ପୌର ପରିଷଦକୁ ୭ ମାସ ପୂର୍ବରୁ ଏଭଳି ନିର୍ଦ୍ଦେଶ ଦେଇଥିଲେ ରାଜ୍ୟ ସୂଚନା କମିଶନର (ଏସ୍ଆଇସି) ଦିଲୀପ କୁମାର ବିଶୋଇ। କିନ୍ତୁ ଏହି ନିର୍ଦ୍ଦେଶ କାର୍ଯ୍ୟକାରିତାରେ ବିଳମ୍ବକୁ ନେଇ ନାନା କଥା ଆଲୋଚନା ହେଉଛି।
ଅଧିକାର ଅଧିନିୟମ ୨୦୦୫ ଧାରା ୬(୧) ଅନୁଯାୟୀ ଦେଶର ପ୍ରତ୍ୟେକ ନାଗରିକ ସୂଚନା ପାଇବାର ଅଧିକାର ଅଛି। ଦରଖାସ୍ତ ପାଇବାର ୩୦ ଦିନ ଭିତରେ ଜନସୂଚନା ଅଧିକାରୀ ସୂଚନା ଦେବା ନିୟମ ରହିଛି। ଏହି ସମୟ ଭିତରେ ସୂଚନା ନ ମିଳିଳେ ଆବେଦନକାରୀ ପରବର୍ତ୍ତୀ ୩୦ ଦିନ ଭିତରେ ପ୍ରଥମ ଆପିଲେଟ୍ କର୍ତ୍ତୃପକ୍ଷଙ୍କ ନିକଟରେ ଦରଖାସ୍ତ କରିପାରିବେ। ଏହାସତ୍ତ୍ବେ ସୂଚନା ନ ମିଳିଲେ ଅବଶିଷ୍ଟ ୩୦ ଦିନ ଭିତରେ ଦ୍ୱିତୀୟ ଆପିଲେଟ୍ ଅଥରିଟି ଅର୍ଥାତ୍ ରାଜ୍ୟ ସୂଚନା କମିଶନଙ୍କ ନିକଟରେ ଆବେଦନ କରିହେବ। କିନ୍ତୁ ଜଗତ୍ସିଂହପୁର ପୌର ପରିଷଦ ଅନେକ ସମୟରେ ସୂଚନା ଦେବାରେ ବିଳମ୍ବ କରୁଛି। ଏପରି କି ଗଣମାଧ୍ୟମକୁ ସୂଚନା ଦେବାକୁ କୁଣ୍ଠା ପ୍ରକାଶ କରୁଛି। ତେଣୁ ଗଣମାଧ୍ୟମ ପ୍ରତିନିଧିମାନେ ଅନେକ ସମୟରେ ଆର୍ଟିଆଇର ସହାୟତା ନେଉଛନ୍ତି। ଏହି ଆଧାରରେ ଜଗତ୍ସିଂହପୁର ପୌର ପରିଷଦ ଅଞ୍ଚଳରେ କାର୍ଯ୍ୟକାରୀ ହେଉଥିବା ପରିମଳ କାର୍ଯ୍ୟ ଓ ହୋମିଓପାଥିକ ଚିକିତ୍ସାଳୟ ସମ୍ପର୍କିତ କେତେକ ସୂଚନା ଜାଣିବା ପାଇଁ ଧରିତ୍ରୀ ଜଗତ୍ସିଂହପୁର ଜିଲା ପ୍ରତିନିଧି ପ୍ରମୋଦ କୁମାର ନାୟକ ୨୦୨୦ରେ ଆର୍ଟିଆଇରେ ପୃଥକ୍ ଭାବେ ସୂଚନା ମାଗିଥିଲେ। କିନ୍ତୁ ଧାର୍ଯ୍ୟ ସମୟ ମଧ୍ୟରେ ସୂଚନା ମିଳି ନ ଥିଲା । ତେଣୁ ସେ ପ୍ରଥମ ଆପିଲେଟ୍ କର୍ତ୍ତୃପକ୍ଷଙ୍କ ନିକଟରେ ଆବେଦନ କରିଥିଲେ। ସେଠାରୁ ନିରାଶ ହେବା ପରେ ରାଜ୍ୟ ସୂଚନା କମିଶନଙ୍କ ଦ୍ୱାରସ୍ଥ ହୋଇଥିଲେ। ଏହା ଉପରେ ରାଜ୍ୟ ସୂଚନା କମିଶନଙ୍କ ପକ୍ଷରୁ ମାମଲା ନଂ. ୧୯୧୯/୨୦ ଓ ୧୯୨୦/୨୦ ରୁଜୁ ହେବା ସହ ୩୦ା୯ା୨୨ରେ ଶୁଣାଣି ପାଇଁ ଦିନ ଧାର୍ଯ୍ୟ କରାଯାଇଥିଲା। ଏହିଦିନ ଆବେଦନକାରୀ ନାୟକ ଓ ପ୍ରତିପକ୍ଷ ତଥା ଜଗତ୍ସିଂହପୁର ପୌର ପରିଷଦ ପକ୍ଷରୁ ନିର୍ବାହୀ ଅଧିକାରୀ ଅଶୋକ କୁମାର କର୍ଣ୍ଣ, ଜନ ସୂଚନା ଅଧିକାରୀ ଦେବବ୍ରତ ମିଶ୍ର ଓ ସହକାରୀ ପିଆଇଓ ଯୋଗ ଦେଇଥିଲେ। ସେଠାରେ ନାୟକ ପୂର୍ଣ୍ଣ ସୂଚନା ମିଳି ନ ଥିବା କଥା କହିବା ସହ ପରିଷଦ ୱେବସାଇଟ୍ କାମ କରୁ ନ ଥିବାରୁ ଅନେକ ସୂଚନା ମିଳିବାରେ ଅସୁବିଧା ହେଉଥିବା କଥା ଉଲ୍ଲେଖ କରିଥିଲେ। ଉଭୟ ପକ୍ଷଙ୍କ ବୟାନ ଶୁଣିଲା ପରେ କମିଶନ ତୁରନ୍ତ ଆବେଦନକାରୀଙ୍କୁ ସୂଚନା ଦେବାକୁ କହିଥିଲେ। ଏଥିସହ ୧ ମାସ ଭିତରେ ପରିଷଦ ଅଫିସିଆଲ ୱେବସାଇଟ କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଥିଲେ। ୨୪ା୧୧ା୨୨ରେ ପରବର୍ତ୍ତୀ ତାରିଖ ସ୍ଥିର ହୋଇଥିଲା। ନାୟକ ଜଗତ୍ସିଂହପୁର ପୌର ପରିଷଦରେ ଦରଖାସ୍ତ କରିବା ସମୟରେ ବିମଳ ଲେଙ୍କା ପ୍ରଥମ ଆପିଲେଟ୍ କର୍ତ୍ତୃପକ୍ଷ ଥିଲେ, ତେଣୁ ତାଙ୍କୁ ମଧ୍ୟ ଏହିଦିନ ଉପସ୍ଥିତ ରହିବାକୁ କମିଶନଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା। ଏଥିଯୋଗୁ ସେ ମଧ୍ୟ ହାଜର ହୋଇଥିଲେ। କିନ୍ତୁ ଧାର୍ଯ୍ୟ ତାରିଖ ସୁଦ୍ଧା ୱେବସାଇଟ୍ ଅପଡେଟ୍ ତ ଦୂରର କଥା ପୂର୍ଣ୍ଣ ସୂଚନା ମିଳି ନ ଥିଲା । ନାୟକ ଏ ସମ୍ପର୍କରେ କମିଶନଙ୍କ ଦୃଷ୍ଟି ଆକର୍ଷଣ କରିବାରୁ କମିଶନ କ୍ଷୁବ୍ଧ ହୋଇଥିଲେ। କାହିଁକି ଏ ପର୍ଯ୍ୟନ୍ତ କମିଶନଙ୍କ ନିର୍ଦ୍ଦେଶ ପାଳନ ହୋଇନାହିଁ ବୋଲି ପ୍ରଶ୍ନ କରିଥିଲେ। ଏହାପରେ ନିର୍ଦ୍ଦେଶ ପାଇବାର ୬୦ ଦିନ ଭିତରେ ୱେବସାଇଟ୍ ଅପଡେଟ୍ ସହ ନାୟକଙ୍କୁ କାର୍ଯ୍ୟାଳୟକୁ ଡାକି ତାଙ୍କ ପସନ୍ଦ ମୁତାବକ ସୂଚନା ଦେବାକୁ କମିଶନ ମେମୋ ସଂଖ୍ୟା ୨୩୪୯/୧୧ା୧ା୨୩ରେ ଉଲ୍ଲେଖ କରିଥିଲେ । ମାତ୍ର ଏହା ଭିତରେ ୭ ମାସ ଅତିକ୍ରାନ୍ତ ହୋଇଯାଇଥିଲେ ସୁଦ୍ଧା ୱେସାଇଟ୍ କାର୍ଯ୍ୟକ୍ଷମ ହୋଇନାହିଁ। ଏ ସମ୍ପର୍କରେ ପରିଷଦ ଜନ ସୂଚନା ଅଧିକାରୀ ଦେବବ୍ରତ ମିଶ୍ରଙ୍କୁ ପଚାରିବାରୁ ନୂଆ ୱେବସାଇଟ୍ କାର୍ଯ୍ୟକ୍ଷମ କରିବା ପାଇଁ ଏନ୍ଆଇସି (ନ୍ୟାଶନାଲ ଇନଫର୍ମେଟିକ୍ସ ସେଣ୍ଟର)କୁ ଅର୍ଥ ଦିଆଯାଇଛି । କିନ୍ତୁ ଏନ୍ଆଇସି ଏହା କାର୍ଯ୍ୟକାରୀ କରିବାରେ ବିଳମ୍ବ କରୁଥିବା କହିଛନ୍ତି । ଯଥାଶୀଘ୍ର ଏହାକୁ କାର୍ଯ୍ୟକ୍ଷମ କରା ନ ଗଲେ ବାଧ୍ୟ ହୋଇ ପୁଣି ରାଜ୍ୟ ସୂଚନା କମିଶନଙ୍କ ନିକଟରେ ଅଭିଯୋଗ କରିବେ ବୋଲି ନାୟକ ଚେତାବନୀ ଦେଇଛନ୍ତି ।