କରୋନା ଭାଇରସ୍ ସମଗ୍ର ବିଶ୍ୱକୁ ବଦଳାଇ ଦେଇଛି। ବିଶେଷକରି ବିବାହ ଉତ୍ସବ ସମ୍ପୂର୍ଣ୍ଣ ଭାବରେ ବଦଳିଯାଇଛି। ଏମିତି ଏକ ଅନନ୍ୟ ବିବାହ ଦେଖିବାକୁ ମିଳିଛି ଆମେରିକାରେ। ଏଠାରେ ରହୁଥିବା ଭାରତୀୟ ପ୍ରେମୀଯୁଗଳ ଜୁମ୍ ଆପ୍ରେ ଭର୍ଚୁଆଲ ବିବାହ କରିଛନ୍ତି। ଏହି ବିବାହ ଉତ୍ସବରେ ୯୫ ଅତିଥିଙ୍କ ସହ ୧୧ଟି ଦେଶରେ ରହୁଥିବା ସମ୍ପର୍କୀୟମାନେ ସାମିଲ ହୋଇଥିଲେ।
ଉତ୍ତରପ୍ରଦେଶର ଲକ୍ଷ୍ମୀପୁରରେ ରହୁଥିବା ଡକ୍ଟର ଅଜୟ ଆଗା ଏବଂ ଡକ୍ଟର ପୁନମ ଆଗାଙ୍କ ସାନ ପୁଅ ଅକ୍ଷତ ଆମେରିକାରେ ଏକ ନାମୀ କମ୍ପାନୀରେ ଇଞ୍ଜିନିୟର ଭବେ କାମ କରନ୍ତି। ତାଙ୍କ ବିବାହ ପରିବାରବର୍ଗ ହୋଲି ପୂର୍ବରୁ ପୁଣେରେ ରହୁଥିବା ଶ୍ୱେତାଙ୍କ ସହ ସ୍ଥିର କରିଥିଲେ। ଯିଏକି ଆମେରିକାର ଟେକ୍ସାସ ସହରରେ ଚାକିରି କରୁଛନ୍ତି। ବିବାହ ସ୍ଥିର ହେବା ପରେ ବିଶ୍ୱରେ କରୋନା ମହାମାରୀ କାୟା ବିସ୍ତାର କଲା। ଫଳରେ ଚାରିଆଡ଼େ ଲକ୍ଡାଉନ୍ ଜାରି କରାଗଲା। ଏହି କାରଣରୁ ବିବାହ ତାରିଖ ଘୁଞ୍ଚି ଘୁଞ୍ଚି ଚାଲିଲା। ଏହି ସମୟରେ ଫ୍ଲାଇଟ୍ ବନ୍ଦ। କେହି କେଉଁଠାରୁ ମଧ୍ୟ ଆସିପାରିବେ ନାହିଁ। ତେଣୁ ଦୁଇଜଣ ଆମେରିକାରେ ହିଁ ବିବାହ କରିବାକୁ ଚାହିଁଲେ।
ଦୁଇଜଣ ଜୁମ୍ ଆପ୍ରେ ଏକ ମିଟିଂ କରି ବିବାହ ତାରିଖ ଆଉ ଘୁଞ୍ଚାଇବା ଠିକ୍ ନୁହେଁ ବୋଲି ନିଷ୍ପତ୍ତି ନେଲେ।
ଏହା ପରେ ଅକ୍ଷତ ୧୫୦ ଆମେରିକୀୟ ଡଲାର ଦେଇ ଜଣେ ଜଜ୍ଙ୍କୁ ଘରକୁ ଡାକି ବିବାହ ଉତ୍ସବର ଆୟୋଜନ କଲେ। ଏହି ସମୟରେ ଦୁଇଜଣଙ୍କ ପରିବାରର କିଛି ସଦସ୍ୟ ଏବଂ ଆତ୍ମୀୟ ସ୍ବଜନ ଜୁମ୍ ଆପ୍ ଜରିଆରେ ଯୋଡ଼ି ହୋଇ ବିବାହର ମଜା ନେଇଥିଲେ। ସମସ୍ତେ ନବଦମ୍ପତିଙ୍କୁ ଅନ୍ଲାଇନ୍ ଶୁଭେଚ୍ଛା ଜଣାଇଛନ୍ତି।
ଅକ୍ଷତଙ୍କ ମାତାପିତା କୁହନ୍ତି, ଏହି ବିବାହରେ ସେ ବହୁତ ଖୁସି। ଆମେ ପୁଅ ପାଇଁ ଝିଅ ଦେଖିବାକୁ ଅନ୍ଲାଇନ୍ରେ ପ୍ରସ୍ତାବ ଦେଇଥିଲୁ। ପୁଣେରେ ରହୁଥିବା ସିହ୍ନା ପରିବାର କହିଥିଲେ କି, ତାଙ୍କର ଏକ ଝିଅ ଆମେରିକାରେ ମାଷ୍ଟର ଡିଗ୍ରୀ କରୁଛି। ଦୁଇଜଣଙ୍କ ଆମେରିକାରେ ଦେଖା ସାକ୍ଷାତ ହୋଇଥିଲା। ଦୁହେଁ ଦୁହିଁଙ୍କୁ ଖୁବ୍ ପସନ୍ଦ କରିଥିଲେ। ପରେ ବିବାହ କଲେ। ଏଥିରେ ଆମେ ସମସ୍ତେ ଖୁସି। ଏହି ବିବାହ ଭାରତୀୟ ରୀତିନୀତିରେ ସମ୍ପନ୍ନ ହୋଇଛି। ଭାରତୀୟ ଦମ୍ପତି ଉଭୟ ଉଭୟଙ୍କୁ ବରଣମାଳା ପିନ୍ଧାଇବା ସହ ଶ୍ୱେତାଙ୍କ ମୁଣ୍ଡରେ ସିନ୍ଦୂର ପିନ୍ଧାଇଥିଲେ ଅକ୍ଷତ।
