ଶାଶୁ-ଶ୍ୱଶୁରଙ୍କ ବିବାହ କରାଇଲେ ଜ୍ୱାଇଁ। ରାଜସ୍ଥାନର ବାନ୍ସଓ୍ବାଡା ଜିଲା ଅନ୍ତର୍ଗତ ଭାଡଲିପଡ଼ା ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି, ଯାହାକି ଏବେ ଚର୍ଚ୍ଚାରେ। ଘଟଣାର ଭିଡିଓ ଭାଇରାଲ ହେଉଥିବା ବେଳେ ଲୋକମାନେ ଜ୍ୱାଇଁଙ୍କ ଏଭଳି କାର୍ଯ୍ୟକୁ ପ୍ରଶଂସା କରିଛନ୍ତି।
ପୁରା ଘଟଣାଟି ଏପରି। ଭାଡଲିପଡ଼ା ଗ୍ରାମର ଧନଜୀ ଅମଲିୟର ୬୦ ବର୍ଷ ପୂର୍ବେ ପ୍ରେମ ବିବାହ କରିଥିଲେ। ସେତେବେଳେ ସେ ସାତ ଫେରା ନେଇ ନ ଥିଲେ କିମ୍ବା ବିବାହର କୌଣସି ରୀତିନୀତି ମଧ୍ୟ କରାଯାଇ ନ ଥିଲା। ଉଭୟଙ୍କର ଏକ ଝିଅ ସୀମା ଏବଂ ଜ୍ୱାଇଁ ଅଛନ୍ତି। ଶାଶୁଶ୍ୱଶୁର ପୂର୍ବରୁ ଠିକ୍ ଭାବେ ବିବାହ କରି ନ ଥିବାରୁ ଜ୍ୱାଇଁ ପୁଣିଥରେ ଉଭୟଙ୍କ ବିବାହ କରିବାକୁ ସ୍ଥିର କରିଥିଲେ। ହିନ୍ଦୁ ରୀତିନୀତି ଅନୁଯାୟୀ ବିବାହର ସମସ୍ତ ସମାରୋହର ଆୟୋଜନ କରାଯାଇଥିଲା। ବାଜା ବାଜିଥିଲା। ରୋଷଣୀରେ ଘର ଝଲସିଲା। ବ୍ରାହ୍ମଣ ମନ୍ତ୍ର ପଢ଼ିଥିଲେ। ଶେଷରେ ସମାଜ ସମ୍ମୁଖରେ ସେମାନେ ମାଳା ବଦଳାଇ ବିବାହ କରିଥିଲେ।
ଏହି ବିବାହକୁ ଦେଖିବା ଲାଗି ଅଞ୍ଚଳର ବହୁ ଲୋକ ପହଞ୍ଚିଥିଲେ। ସେମାନେ ବୃଦ୍ଧ ଦମ୍ପତିଙ୍କୁ ଆଶୀର୍ବାଦ ଦେବା ସହ ଅଭିନନ୍ଦନ ଜଣାଇଥିଲେ। ଏବେ ଏହି ବିବାହର ପ୍ରଶଂସା କରାଯାଉଥିବା ବେଳେ ଭିଡିଓ ଭାଇରାଲ ହେବାରେ ଲାଗିଛି।