ସାପ୍ତାହିକ ହାଟ ପାଇଁ ହଟହଟା

ନନ୍ଦପୁର,୨୩ା୯ (ଶଙ୍କର ପୂଜାରୀ): ନନ୍ଦପୁର ବ୍ଲକ ଦେଇ ହାଣ୍ଡିପୁଟ-ସେମିଳିଗୁଡା ସଂଯୋଗ କରୁଥିବା ଏମଡିଆର-୫୫ ରାସ୍ତା ରହିଛି। ଏହା ମଧ୍ୟ ଜୟପୁର-ବିଶାଖାପାଟଣାକୁ ସଂଯୋଗ କରୁଛି। ଏହି ରାସ୍ତାରେ ସୁବାଇ, ବାଲଡା, ନନ୍ଦପୁର, ପାଡୁଆ, ସଗର ଓ ଥୁବା ଗ୍ରାମ ରହିଛି। ଏହି ଗ୍ରାମଗୁଡିକର ସାପ୍ତାହିକ ହାଟ ରାସ୍ତା କଡରେ ବସୁଥିବାରୁ ଟ୍ରାଫିକ ଅବ୍ୟବସ୍ଥା ଦେଖାଦେଉଛି। ସୋମବାର ସୁବାଇ, ମଙ୍ଗଳବାର ବାଲଡା, ବୁଧବାର ନନ୍ଦପୁର, ଗୁରୁବାର ପାଡୁଆ, ଶୁକ୍ରବାର ସଗର ଓ ଶନିବାର ଥୁବା ଗ୍ରାମରେ ସାପ୍ତାହିକ ହାଟ ବସୁଛି। ହାଟଦିନ ରାସ୍ତାର ଦୁଇ ପାର୍ଶ୍ୱରେ ବ୍ୟବସାୟୀଙ୍କ ପସରା ସାଙ୍ଗକୁ ସାମଗ୍ରୀ ପରିବହନ କରୁଥିବା ଗାଡ଼ି, ଖାଉଟି ଓ ସେମାନଙ୍କ ଗାଡ଼ିଗୁଡ଼ିକ ରଖିଥିବାରୁ ରାସ୍ତା ଜାମ ହେଉଛି। ରାସ୍ତାରେ ଯାତାୟାତ କରୁଥିବା ରୋଗୀବୁହା ଯାନ, ଯାତ୍ରୀବାହୀ ଗାଡ଼ି, ଭାରିଯାନ, ସରକାରୀ କର୍ମଚାରୀ ଓ ସାଧାରଣ ଲୋକେ ଯାତାୟାତ ବେଳେ ଅସୁବିଧାର ସମ୍ମୁଖୀନ ହେଉଛନ୍ତି। ହାଟ ଭିତରେ ଅଳିଆ ଆବର୍ଜନା ସହ କାଦୁଅ ସ୍ଥିତି ଓ ଭଙ୍ଗା ଦଦରା ପିଣ୍ଡି ଯୋଗୁ ବ୍ୟବସାୟୀମାନେ ରାସ୍ତାକଡ଼ରେ ସେମାନଙ୍କ ସାମଗ୍ରୀ ଧରି ବିକ୍ରି କରିବାକୁ ବାଧ୍ୟ ହେଉଛନ୍ତି। ହାଟ ପରିଚାଳନା କରୁଥିବା କୋରାପୁଟ ନିୟନ୍ତ୍ରିତ ବଜାର କମିଟି (ଆରଏମସି) କର୍ତ୍ତୃପକ୍ଷ ଚାଷୀ ଓ ବ୍ୟବସାୟୀଙ୍କଠାରୁ ହାଟ କର ଆଦାୟ କରୁଥିଲେ ମଧ୍ୟ ହାଟର ଦୁରବସ୍ଥା ଦୂର କରିବାକୁ ଚିନ୍ତା କରୁ ନ ଥିବା ବ୍ୟବସାୟୀମାନେ ଅଭିଯୋଗ କରିଛନ୍ତି। ସମସ୍ତ ସାପ୍ତାହିକ ହାଟ ନନ୍ଦପୁର ଓ ପାଡୁଆ ପୋଲିସ ଥାନା ଅଧୀନରେ ରହିଛି। ଦୁଇ ଅଞ୍ଚଳର ଥାନା ଅଧିକାରୀ ନିଜ ନିଜ ଅଞ୍ଚଳରେ ଥିବା ସାପ୍ତାହିକ ହାଟ ସ୍ଥାନରେ ଟ୍ରାଫିକ ବ୍ୟବସ୍ଥା ନିୟନ୍ତ୍ରଣ ଲାଗି ପୋଲିସ ମୁତୟନ କରିବାକୁ ସାଧାରଣରେ ଦାବି ହେଉଛି।