ମାଲକାନଗିରି,୨୪ା୧୦ (ଡି.ଏନ.ଏ.): ଦିନେ ରାଜ୍ୟ ତଥା ଜିଲା ପାଇଁ ଗୌରବ ଆଣିଥିବା ଯୁବକ ଆଜି ପାଲଟିଛନ୍ତି ଦିନ ମଜୁରିଆ । ଅର୍ଥାଭାବରୁ ତାଙ୍କ ପ୍ରତିଭା ଅନ୍ଧାରରେ ହଜିଯାଉଛି। ପ୍ରତିଭା ଥିବା ସତ୍ତ୍ୱେ ଅଭାବ ତାଙ୍କ ବାଟ ଓଗାଳିଛି। ସେ ପାଲଟି ଯାଇଛନ୍ତି ଦିନମଜୁରିଆ। ଏହା ଦେଖିବାକୁ ମିଳିଛି ମାଲକାନଗିରି ଜିଲାରେ।
ଜିଲାର ଚିତ୍ରକୋଣ୍ଡା ବ୍ଲକ ଅଧୀନ ଦୋରାଗୁଡ଼ା ଗ୍ରାମର ପ୍ରତିଭାଶାଳୀ ଯୁବକ ହେଉଛନ୍ତି ଭକ୍ତରାମ ଦେସ୍ତି । ଭକ୍ତରାମ ଭାରୋତ୍ତୋଳନରେ ରାଜ୍ୟଠୁ ଆରମ୍ଭ କରି ଦେଶ ବିଦେଶରେ ଜିତିଛନ୍ତି ସ୍ବର୍ଣ୍ଣପଦକ। ୨୦୧୬ରେ ଆନ୍ଧ୍ରରେ ହୋଇଥିବା ସ୍କୁଲ ନ୍ୟାଶନାଲ ଗେମ୍ସ, ୨୦୧୮ରେ ଦିଲ୍ଲୀରେ ହୋଇଥିବା ଖେଲୋ ଇଣ୍ଡିଆ, ମହାରାଷ୍ଟ୍ରର ନାଗପୁରରେ ହୋଇଥିବା ୟୁଥ୍ ନ୍ୟାଶନାଲ ଚାମ୍ପିୟନଶିପ୍, ୨୦୧୯ ଖେଲୋ ଇଣ୍ଡିଆରେ ଅଂଶଗ୍ରହଣ କରି ଭକ୍ତରାମ ସ୍ବର୍ଣ୍ଣ ପଦକ ଜିତିଥିଲେ। ସେହିପରି ଅଷ୍ଟ୍ରେଲିଆରେ ଅନୁଷ୍ଠିତ ଅଣ୍ଡର୍ ୧୭ କମନୱେଲ୍ସ୍ ଗେମ୍ସରେ ୪୯ କିଲୋ ବର୍ଗରେ ମଧ୍ୟ ଦେଶ ପାଇଁ ସ୍ବର୍ଣ୍ଣ ପଦକ ଆଣିଥିଲେ ଭକ୍ତରାମ। ଏବେ କିନ୍ତୁ ଭକ୍ତରାମ ଅଲୋଡ଼ା। ସେ ସୁନା ଜିତି ଗୌରବ ଆଣିଛନ୍ତି ସତ, ହେଲେ ଏବେ ସେହି ଗୌରବ କିମ୍ବା ପ୍ରତିଭାର କୌଣସି ସୁଫଳ ପାଉନାହାନ୍ତି । ପେଟ ପୋଷିବାକୁ ସେ ଖେଳାଳିରୁ ପାଲଟିଛନ୍ତି ଦିନମଜୁରିଆ । ପେଟକୁ ଦାନା ଯୋଗାଡ଼ ପାଇଁ ସେ କ୍ଷେତରେ ଖଟୁଛନ୍ତି। ଆଗକୁ ବଢ଼ିବାକୁ ଯେତିକି ସହାୟତା ଲୋଡା ତାଙ୍କୁ ମିଳୁ ନ ଥିବାରୁ ସେ ଖେଳ ବଦଳରେ ବାଛିଛନ୍ତି କାମକୁ। ନିଜ ପ୍ରତିଭା ଥିଲେ ସୁଦ୍ଧା ତାଙ୍କୁ ସରକରୀ ସହାୟତା ମିଳୁ ନ ଥିବାରୁ ସେ ଏଭଳି ସ୍ଥିତିରେ ପହଞ୍ଚତ୍ଥିବା କହିଛନ୍ତି। ତେବେ ସରକାରୀ ସହାୟତା ମିଳିଲେ ସେ ଆଗକୁ ବଢି ରାଜ୍ୟ ତଥା ଦେଶ ପାଇଁ ପୁଣି ଗୌରବ ଆଣିପାରିବେ ଏ ଆଶା ରଖିଛନ୍ତି।
