ଭଦ୍ରକ ଅଫିସ, ୧୨।୫: ପ୍ରେମ ପାଇଁ ଦୁଇଜଣ ପ୍ରେମିକଙ୍କୁ ହଟହଟା ହେବାକୁ ପଡ଼ିଛି। ଜଣଙ୍କୁ ବିବାହ କରିବାକୁ ପଡ଼ିଥିବା ବେଳେ ଅନ୍ୟ ଜଣଙ୍କୁ ଜରିମାନା ଗଣିବାକୁ ପଡିଛି। ଭଦ୍ରକ ଜିଲା ସଦର ବ୍ଲକ ଅଧୀନ କାଉପୁର ସିରାପୁର ଅଞ୍ଚଳରେ ମଙ୍ଗଳବାର ଏଭଳି ଘଟଣା ଦେଖିବାକୁ ମିଳିଛି।
ଘଟଣାରୁ ପ୍ରକାଶ, ଉକ୍ତ ଅଞ୍ଚଳର ଜଣେ ବ୍ୟକ୍ତିଙ୍କ ବଡ଼ଝିଅ କଲେଜ ପଢ଼ା ସମୟରେ ଭଣ୍ଡାରିପୋଖରୀ ଥାନା ଅଧୀନ ସରସଦା ଗ୍ରାମର ଗୋବିନ୍ଦ (ଛଦ୍ମନାମ)ଙ୍କ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା। ସେହିପରି ମଝିଆ ଝିଅଙ୍କର ମଧ୍ୟ ବାଲେଶ୍ୱର ଜିଲା ଖଇରା ଥାନା ଅଧୀନ ରଟିନା ଗାଁର ରାମଚନ୍ଦ୍ର(ଛଦ୍ମନାମ)ଙ୍କ ସହ ରଙ୍ଗ୍ ନମ୍ବରରୁ ପ୍ରେମ ଆରମ୍ଭ ହୋଇଥିଲା। ମଙ୍ଗଳବାର ଦୁଇଭଉଣୀ ସେମାନଙ୍କ ମାମୁ ବିବାହ ଉତ୍ସବକୁ ଉଭୟ ପ୍ରେମିକଙ୍କୁ ଡାକିଥିଲେ। ବାହାଘର ସରିବା ପରେ ଦୁଇ ଭଉଣୀ ଓ ଯୁବକଦ୍ୱୟ ଏକ ଘରେ ଥିବା ବେଳେ ଖବରପାଇ ଗାଁ ଲୋକେ ଘେରିଯାଇଥିଲେ। ସେମାନଙ୍କ ମଧ୍ୟରୁ ଗୋବିନ୍ଦ ଅବିବାହିତ ଥିବାବେଳେ ରାମଚନ୍ଦ୍ର ବିବାହିତ ବୋଲି ଜଣାପଡ଼ିଥିଲା। ବହୁ ପାଟିତୁଣ୍ଡ ପରେ ବୁଧବାର ଗୋବିନ୍ଦ ବାହା ହେବାକୁ ରାଜିହେବାରୁ ତାଙ୍କ ପ୍ରେମିକା ସହ ବାହାଘର କରାଯାଇଥିଲା। ଅନ୍ୟପକ୍ଷେ ଗାଁ ଲୋକେ ରାମଚନ୍ଦ୍ରଙ୍କ ସ୍ତ୍ରୀଙ୍କୁ ଘଟଣାସ୍ଥଳକୁ ଡାକି ସବୁ କଥା ଜଣାଇଥିଲେ। ରାମଚନ୍ଦ୍ର ଗ୍ରାମବାସୀଙ୍କୁ ଭୁଲ୍ ମାଗିବା ସହ ପୋଲିସ ଉପସ୍ଥିତିରେ ୨୦ ହଜାର ଟଙ୍କା ଜରିମାନା ଦେଇ ଘରକୁ ଫେରିଥିଲେ।