ହାଟଡିହୀ,୩୧l୧୦(ଡି.ଏନ୍.ଏ.): କେନ୍ଦୁଝର ଜିଲା ହାଟଡିହୀ ବ୍ଲକ ପନ୍ଦାଡୋ ଗାଁ ନିକଟରେ ଥିବା ବିଦ୍ୟାଧରପୁର -ଆନନ୍ଦପୁର ମୁଖ୍ୟ କେନାଲରେ ଗାଧାଉଥିବା ସମୟରେ ଅସାବଧାନତାବଶତଃ ବୁଡିଯାଇ ଦୁଇଜଣ ଛାତ୍ର ନିଖୋଜ ହୋଇଯାଇଥିଲେ l ପ୍ରଥମେ ହିମାଂଶୁ ରାଉତ ନାମକ ନବମ ଶ୍ରେଣୀ ଛାତ୍ରଙ୍କ ମୃତଦେହକୁ ଉଦ୍ଧାର କରାଯାଇଥିଲା। ପରେ ଅନ୍ୟ ଜଣେ ଦଶମ ଶ୍ରେଣୀ ଛାତ୍ର ମାନସ ଦାସଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଆନନ୍ଦପୁର ମେଡିକାଲରେ ଭର୍ତ୍ତି କରାଯାଇଥିଲା l ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ମାନସ ପନ୍ଦାଡୋ ଗ୍ରାମର ପଦ୍ମନାଭ ଦାସଙ୍କ ପୁଅ ହୋଇଥିବା ବେଳେ ହିମାଂଶୁ ପଦାରୂଖା ଗାଁର ବିଶ୍ୱନାଥ ରାଉତଙ୍କ ପୁଅ ବୋଲି ଜଣାପଡ଼ିଛି। ଏନେଇ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି।
ସୂଚନାନୁଯାୟୀ, ହିମାଂଶୁ ନିଜ ବନ୍ଧୁ ଘର ପନ୍ଦାଡୋ ଗ୍ରାମକୁ ବୁଲି ଆସିଥିଲେ l ରବିବାର ମୋଟ ପାଞ୍ଚ ଜଣ ଛାତ୍ର ଗାଧୋଇବାକୁ ଯାଇଥିବା ବେଳେ ଦୁଇ ଜଣ ଆଗ ଗାଧୋଇ ପଳାଇଥିଲେ l ଅନ୍ୟ ତିନି ଜଣ ଗାଧୋଇବା ସମୟରେ ବୁଡି ଯାଇଥିଲେ l ସେହି ସମୟରେ ଉକ୍ତ ରାସ୍ତା ଦେଇ ଶାସଙ୍ଗ ହାଇସ୍କୁଲ ଶିକ୍ଷକ ଶାନ୍ତନୁ ରାଉତ ଯାଉଥିଲେ l ତିନି ଛାତ୍ର ବୁଡି ଯାଉଥିବା ଦେଖି ଶିକ୍ଷକ ଜଣକ ଏକ ଦଉଡି ପକାଇ ଅନ୍ୟ ଜଣେ ଦଶମ ଶ୍ରେଣୀ ଛାତ୍ର ଦେବ ଜ୍ୟୋତିକୁ ବଞ୍ଚାଇ ପାରିଥିଲେ l ତେବେ ଖବର ପାଇ ହାଟଡ଼ିହୀ ଓ ଆନନ୍ଦପୁର ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ l
