କୋଲକାତା,୨୭।୩: ପଶ୍ଚିମବଙ୍ଗ ସରକାରର ମନ୍ତ୍ରୀ ଶୋଭନଦେବ ଚଟ୍ଟୋପାଧ୍ୟାୟ ରାଜ୍ୟର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ‘ଭଗବାନ’ ଆଖ୍ୟା ଦେଇଛନ୍ତି। ସେ କହିଛନ୍ତି, ମମତା ବାନାର୍ଜୀ କୌଣସି ଭୁଲ କରିପାରିବେ ନାହିଁ କାରଣ ସେ ଭଗବାନଙ୍କ ପରି ଅଟନ୍ତି। ମୁଁ ଜଣେ ଚୋର ହୋଇପାରେ, କିନ୍ତୁ ସେ ସେପରି ନୁହଁନ୍ତି। ଶୋଭନଦେବ ଉତ୍ତର ୨୪ ପରଗଣା ଜିଲାର ଖାରଦା ଠାରେ ଏକ ସାଧାରଣ ସଭାରେ ଉଦବୋଧନ ଦେଇ ଏହି ମନ୍ତବ୍ୟ ଦେଇଛନ୍ତି। ତାଙ୍କର ଏହି ବିବାଦୀୟ ମନ୍ତବ୍ୟକୁ ନେଇ ଚର୍ଚ୍ଚା ହେଉଛି। ଏହା ଉପରେ ପ୍ରତିକ୍ରିୟା ରଖି ଭାଜପା କହିଛି, ଟିଏମସି ନେତାଙ୍କ ମଧ୍ୟରେ ନିରାଶା ଭାବ ସୃଷ୍ଟି ହୋଇଛି। ସେଥିପାଇଁ ସେମାନେ ଏପରି ବିବୃତ୍ତି ଦେଉଛନ୍ତି।
ପଶ୍ଚିମବଙ୍ଗ ସରକାରରେ କୃଷି ମନ୍ତ୍ରୀ ଥିବା ଶୋଭନଦେବ କହିଛନ୍ତି, ମମତା ବାନାର୍ଜୀ ଏକ ଇଶ୍ୱରଙ୍କ ପରି ଯାହାକୁ ଆମେ ପୂଜା କରୁ। ଇଶ୍ବରଙ୍କୁ ଉପାସନା କରୁଥିବା ପୁରୋହିତମାନେ ମଧ୍ୟ ବେଳେବେଳେ ଚୋରି ହୋଇପାରନ୍ତି, କିନ୍ତୁ ସେମାନେ ପୂଜା କରୁଥିବା ମୂର୍ତ୍ତି ଏପରି କାମ କରିପାରିବେ ନାହିଁ। ତେଣୁ ମୁଁ ଚୋର ହୋଇପାରେ, କିନ୍ତୁ ମମତା ବାନାର୍ଜୀ ନୁହେଁ।