ଜଳେଶ୍ୱର, ,୨୧।୬ (ଡି.ଏନ୍.ଏ.) ବାଲେଶ୍ୱର ଜିଲା ଜଳେଶ୍ୱର ବ୍ଲକ ସୁବର୍ଣ୍ଣରେଖା ସେତୁର ନାକା ପଏଣ୍ଟଠାରେ ପୋଲିସ ଯାଞ୍ଚ କରୁଥିବା ବେଳେ ଏକ ବଡ ଧରଣର ପଶ୍ଚିମବଙ୍ଗର ଡକାୟତି ଗ୍ୟାଙ୍ଗକୁ ଧରିବାରେ ସଫଳ ହୋଇଛି। ୨ଟି କାର୍ରେ ଥିବା ୧୦ଜଣଙ୍କୁ ଗିରଫ କରାଯାଇଛି। ସେମାନଙ୍କଠାରୁ ୧୫ଲକ୍ଷ ୨୨ହଜାର ଟଙ୍କା ଜବତ କରାଯାଇଥିବା ଜଳେଶ୍ୱର ଏସ୍ଡିପିଓ ଅଙ୍କିତା କୁମ୍ଭାର ସୋମବାର ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି ା ଏହି ଗ୍ୟାଙ୍ଗ ଯାଜପୁର ଜିଲା ଧର୍ମଶାଳା ଥାନା ଅଞ୍ଚଳର ଜଣେ ବିଲ୍ଡରଙ୍କଠାରୁ ୧୫ଲକ୍ଷ ୨୨ହଜାର ଟଙ୍କା ଲୁଟି ନେଇ ପଳାଇଥିବା ଅଭିଯୋଗ ହୋଇଥିଲା ା
ପୋଲିସ ଏ ସମ୍ପର୍କରେ ପଦକ୍ଷେପ ଲାଗି ଉପାନ୍ତ ଅଞ୍ଚଳର ଥାନାଗୁଡିକୁ ସତର୍କ କରିଥିଲା ା ଗତ ୧୮ତାରିଖରେ ଉକ୍ତ ନାକା ପଏଣ୍ଟରେ ଜଳେଶ୍ୱର ଥାନା ଆଇଆଇସି ରୋଜାଲିନ୍ ବେହେରା ସଦଳବଳେ ଅପେକ୍ଷା କରିଥିଲେ ା ସନ୍ଧ୍ୟାରେ ସେହି ବାଟ ଦେଇ ଯାଉଥିବା ପଶ୍ଚିମବଙ୍ଗ ନମ୍ବର ଥିବା ୨ଟି କାର୍ ଦେଖି ପୋଲିସର ସନ୍ଦେହ ହୋଇଥିଲା। ପୋଲିସ ଘେରିଯାଇ ଯାଞ୍ଚ କରିବା ପରେ ସେମାନଙ୍କଠାରୁ ୧୫ଲକ୍ଷ ୨୨ହଜାର ଟଙ୍କା ଜବତ କରାଯାଇଥିଲା ଓ ସମସ୍ତଙ୍କୁ ଥାନାକୁ ଅଣାଯାଇଥିଲା। ଗିରଫ ଡକାୟତମାନେ ହେଲେ ହାୱାଡା ଜିଲାର ଉଲ୍ବେରିଆ ଥାନା ଜଗତ୍ପୁର ଗାଁର ସୌମେନ୍ ମାନ୍ନା, କସ୍ୟବପୁର ଗାଁର ସୁବାସ ବାଗ, କୁସାବେରିଆ ଗାଁର ଅଭିଜିତ୍ ଦାସ, ଉଲବେରିଆ ଗାଁର ଝଣ୍ଟୁ ପୁରକାୟସ୍ତ, କୁଲଗାଛିଆ ଗାଁର ସଞ୍ଜୟ ଦତ୍ତ, ସିଜ୍ବେରିଆ ଗାଁର ସେକ୍ ସମିରୁଲ ଆଲାମ୍, ବାଗନାନ ଥାନା ମୁର୍ଗବାଡିଆ ଗାଁର ଅବଦୁଲ ସଲିମ୍ ମଲିକ, ଦକ୍ଷିଣ ୨୪ ପ୍ରଗଣା ଜିଲା ସନାରପୁର ଥାନା ଅଧୀନ ରାଘବପୁର ପୋଲଘାଟ ଗାଁର ଦିପ୍ କୁମାର ଦେ , ପୂର୍ବ ମେଦିନୀପୁର ଜିଲାର ତମଲୁକ ଥାନା ଡୁମୁରା ଗାଁର ଶୁଭଦୀପ ହାଜରା, ମହିସାଦଳ ଥାନାର ନାଇଗୋପାଳପୁର ଗାଁର ଦେବବ୍ରତ ମିଶ୍ର। ପଚାରାଉଚରା ବେଳେ ସେମାନେ ଜାତୀୟ ରାଜପଥର ବିଭିନ୍ନ ଅପରାଧରେ ସମ୍ପୃକ୍ତ ଥିବା ସ୍ବୀକାର କରିଛନ୍ତି।