ଜାମାଇକା,୧୪।୧: ସ୍ଥାନୀୟ ସାବିନା ପାର୍କଠାରେ ଖେଳାଯାଇଥିବା ଆୟର୍ଲାଣ୍ଡ ବିପକ୍ଷ ଦ୍ୱିତୀୟ ଦିନିକିଆ ମ୍ୟାଚ୍ରେ ବ୍ୟାଟରେ କମାଲ କରି ଦେଖାଇଛନ୍ତି ଓ୍ବେଷ୍ଟଇଣ୍ଡିଜ ବୋଲର। ପ୍ରଥମେ ବ୍ୟାଟିଂ କରିଥିବା ଘରୋଇ ଦଳ ୧୪୩ ରନ୍ରେ ୮ ଉଇକେଟ ହରାଇ ସଙ୍କଟରେ ପଡ଼ିଥିଲା। ଜଟିଳ ସ୍ଥିତିରେ ଆୟର୍ଲାଣ୍ଡ ବୋଲରଙ୍କ ବିରୋଧରେ କାଉଣ୍ଟର ଆଟାକ କରିଥିଲେ ରୋମାରିଓ ଶେଫର୍ଡ ଏବଂ ଓଡେନ ସ୍ମିଥ। ଓଡେନ ସ୍ମିଥ ମାତ୍ର ୧୯ ବଲରେ ଖେଳିଥିଲେ ୪୬ ରନ୍ର ବିସ୍ଫୋରକ ପାଳି। ତାଙ୍କ ଇନିଂସରେ ସାମିଲ ଥିଲା ୨ ଚୌକା ଓ ୫ ଛକା। ସେହିଭଳି ଶେଫର୍ଡ ୪୧ ବଲରେ ୭ ଚୌକା ସହାୟତାରେ ୫୦ ରନର ପାଳି ଖେଳିବା ପରେ ଅନ୍ତିମ ବ୍ୟାଟର ଭାବେ ପ୍ୟାଭିଲିଅନ ଫେରିଥିଲେ। ଦୁହିଁ ଅବଦାନ ଯୋଗୁ ଓ୍ବେଷ୍ଟଇଣ୍ଡିଜ ସ୍କୋର ୨୨୯ ରନ୍ରେ ପହଞ୍ଚିପାରି ଥିଲା। ଆୟର୍ଲାଣ୍ଡ ଲାଗି ଆଣ୍ଡି ବ୍ୟାକବ୍ରାଏନ ୪ ଏବଂ କ୍ରେଗ ୟଙ୍ଗ ୩ ଉଇକେଟ ହାତେଇଥିଲେ।
ବର୍ଷା ବାଧକ ସାଜିବାରୁ ଆୟର୍ଲାଣ୍ଡ ଆଗରେ ୩୬ ଓଭରରେ ଧାର୍ଯ୍ୟ କରାଯାଇଥିଲା ୧୬୮ ରନ୍ର ଟାର୍ଗେଟ। ଜବାବରେ ହାରି ଟେକ୍ଟର (୫୪ ରନ୍, ୪ ଚୌକା ଓ ୧ ଛକା )ଙ୍କ ଅପରାଜିତ ଅର୍ଦ୍ଧଶତକ ଯୋଗୁ ଆୟର୍ଲାଣ୍ଡ ୩୨.୩ ଓଭରରେ ୫ ଉଇକେଟ କ୍ଷତିରେ ବିଜୟ ଲକ୍ଷ୍ୟ ହାସଲ କରିଥିଲା। ବୋଲିଂରେ ୪ ଉଇକେଟ ନେବା ସହ ୩୫ ରନ୍ କରିଥିବା ମ୍ୟାକ୍ବ୍ରାଏନଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଛି।
