ବାରବଡସ,୨୧।୩: ଦ୍ୱିତୀୟ ଇନିଂସରେ ଅଧିନାୟକ କ୍ରେଗ ବ୍ରାଥଓ୍ବେଟ୍ଙ୍କ ଅପରାଜିତ ଅର୍ଦ୍ଧଶତକ ଯୋଗୁ ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟକୁ ଓ୍ବେଷ୍ଟଇଣ୍ଡିଜ ଡ୍ର’ କରିବାକୁ ସକ୍ଷମ ହୋଇଛି। ପ୍ରଥମ ଇନିଂସରେ ୧୬୦ ରନ୍ର ଲଢ଼ୁଆ ପାଳି ଖେଳିଥିବା ବ୍ରାଥଓ୍ବେଟ ଦ୍ୱିତୀୟ ପାଳିରେ ୧୮୪ ବଲର ସମ୍ମୁଖୀନ ହୋଇ ୫୬ ରନ୍ କରି ଇଂଲଣ୍ଡ ହାତରୁ ବିଜୟ ଛଡ଼ାଇ ନେଇଥିଲେ। ଏଥିଯୋଗୁ ବ୍ରାଥଓ୍ବେଟ୍ଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଛି।
ପ୍ରଥମ ଇନିଂସରେ ଇଂଲଣ୍ଡ ୫୦୭ କରିଥିବା ବେଳେ ୪୧୧ ରନ୍ରେ ସୀମିତ ରହିଥିଲା ଓ୍ବେଷ୍ଟଇଣ୍ଡିଜ। ଦ୍ୱିତୀୟ ପାଳି ଇଂଲଣ୍ଡ ୧୮୫ ରନ୍ରେ ପାଳି ଘୋଷଣା କରିବାରୁ ଘରୋଇ ଦଳ ଆଗରେ ଧାର୍ଯ୍ୟ ହୋଇଥିଲା ୨୮୨ ରନ୍ର ଟାର୍ଗେଟ। ଜବାବରେ ଓ୍ବେଷ୍ଟଇଣ୍ଡିଜ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଗୋଟିଏ ପଟେ ବ୍ରାଥଓ୍ବେଟ୍ ଛିଡ଼ା ହୋଇଥିବା ବେଳେ ଅନ୍ୟ ପଟେ ଉଇକେଟ ପଡ଼ି ଚାଲିଥିଲା। ଦଳ ୯୩ ରନ୍ ମଧ୍ୟରେ ୫ ଉଇକେଟ ହରାଇ ସଙ୍କଟରେ ପଡ଼ିଥିଲା। କିନ୍ତୁ ଅଧିନାୟକଙ୍କ ସହ ଜୋଶୁଆ ଡେ ସିଲଭ (୩୦*)ଙ୍କ ଯୋଡ଼ି ଇଂଲଣ୍ଡ ବୋଲରଙ୍କୁ ମ୍ୟାଚ୍ର ଅନ୍ତିମ ସେସନରେ ଉଇକେଟ ଦେଇ ନ ଥିଲେ। ଦୁହେଁ ୬ଷ୍ଠ ଉଇକେଟ ପାଇଁ ଅଭିଭାଜିତ ୪୨ ରନ୍ ଯୋଡ଼ିବାରୁ ଓ୍ବେଷ୍ଟଇଣ୍ଡିଜ ୫ ଉଇକେଟ ହରାଇ ୧୩୫ ରନ୍ କରିଥିଲା।
