ବାରବାଡସ,୨୪।୧: ଇଂଲଣ୍ଡର ବୋଲିଂ ଲାଇନ୍ ଅପ୍ ଆଗରେ ୧୭୨ ରନ୍ର ବିଜୟ ଲକ୍ଷ୍ୟ ପିଛା କରୁଥିବା ଓ୍ବେଷ୍ଟଇଣ୍ଡିଜ ୧୫.୧ ଓଭରରେ ୯୫ ରନ୍ରେ ୮ ଉଇକେଟ ହରାଇ ସାରିଥିଲା। ଦଳ ନିଶ୍ଚିତ ପରାଜୟ ମୁହଁରେ ଛିଡ଼ା ହୋଇଥିବା ବେଳେ ରୋମାରିଓ ଶେଫର୍ଡଙ୍କ ସହ କ୍ରିଜରେ ଯୋଗ ଦେଇଥିଲେ ଅକିଲ ହୋସେନ। ଏହି ଯୋଡ଼ି ମ୍ୟାଚ୍କୁ ଅନ୍ତିମ ଓଭର ପର୍ଯ୍ୟନ୍ତ ଘୋଷାଡ଼ି ନେଇଥିଲା। କିନ୍ତୁ ଅନ୍ତିମ ଓଭରରେ ଯାହା ଘଟିଲା, ତାହା ଖେଳାଳିଙ୍କଠାରୁ ଆରମ୍ଭ କରି ଦର୍ଶକଙ୍କୁ ଚକିତ ରଖି ଦେଇଥିଲା।
ହୋସେନ ଷ୍ଟ୍ରାଇକ୍ରେ ଥିବା ବେଳେ ଓ୍ବେଷ୍ଟଇଣ୍ଡିଜକୁ ଅନ୍ତିମ ଓଭରରେ ଜିତିବା ପାଇଁ ଦରକାର ଥାଏ ୩୦ ରନ୍। ଇଂଲଣ୍ଡ ପାଇଁ ବୋଲିଂ କରିଥିଲେ ପେସର ସାକିବ ମାହମୁଦ। ହୋସେନଙ୍କଠାରୁ ବଲ ଦୂରେଇ ରଖିବା ପାଇଁ ମାହମୁଦ ପ୍ରଥମ ବଲକୁ ଅଫ୍ ସାଇଡ୍ରେ ଓ୍ବାଇଡ୍ ଲାଇନରେ ବୋଲିଂ କରିଥିଲେ। ପ୍ରଥମ ବଲ ଓ୍ବାଇଡ୍ ହେବା ପରେ ଦ୍ୱିତୀୟ ବଲ ଡଟ୍ ରହିଥିଲା। ପରବର୍ତ୍ତୀ ଦୁଇଟି ବଲରେ ହୋସେନ ଲଗାତାର ଚୌକା ଲଗାଇଥିଲେ। ଚତୁର୍ଥ ବଲ ଓ୍ବାଇଡ୍ ହେବାରୁ ଅନ୍ତିମ ୩ ବଲରେ ଓ୍ବେଷ୍ଟଇଣ୍ଡିଜକୁ ଦରକାର ଥିଲା ୨୦ ରନ। ବିଜୟ ସମ୍ଭବ ନ ଥିଲେ ମଧ୍ୟ ଆଶା ଛାଡ଼ି ନ ଥିଲେ ହୋସେନ। ଅନ୍ତିମ ୩ ବଲରେ ୩ ଛକା ଲଗାଇଥିଲେ। ଏହା ସତ୍ତ୍ୱେ ଓ୍ବେଷ୍ଟଇଣ୍ଡିଜକୁ ୧ ରନ୍ରେ ପରାଜୟ ବରଣ କରିବାକୁ ପଡ଼ିଥିଲା। ଶେଫର୍ଡ ୪୪ (୧ ଚୌକା ଓ ୫ ଛକା ) ଏବଂ ହୋସେନ ୪୪ (୩ ଚୌକା ଓ ୪ ଛକା ) ରନ୍ କରି ଅପରାଜିତ ଥିଲେ।