ବାର୍ବାଡୋସ୍,୩୧।୧: ଇଂଲଣ୍ଡ ବିପକ୍ଷ ଟି-୨୦ ସିରିଜର ଶେଷ ମ୍ୟାଚରେ କାରିବିଆନ ବୋଲର ଜେସନ ହୋଲ୍ଡର ଚାରିଟି ବଲରେ ଚାରିଟି ଉଇକେଟ ନେଇଥିଲେ। ଏହା ସହିତ ସେ ନିଜ ଦଳକୁ ସିରିଜର ଶେଷ ମ୍ୟାଚ ବିଜୟ ଦେବା ସହ ସିରିଜ ଜିତାଇଥିଲେ। ଏହି ମ୍ୟାଚର ଶେଷ ଓଭରରେ ହୋଲ୍ଡର ତାଙ୍କ ନାମରେ ଅନେକ ରେକର୍ଡ ସୃଷ୍ଟି କରିଥିଲେ ଏବଂ ଭାରତୀୟ ଦଳକୁ ମଧ୍ୟ ଚେତାବନୀ ଦେଇଥିଲେ। ହୋଲ୍ଡର ହେଉଛନ୍ତି ପ୍ରଥମ ୱେଷ୍ଟଇଣ୍ଡିଜ ବୋଲର ଯିଏକି ଟି -୨୦ କ୍ରିକେଟରେ ହ୍ୟାଟ୍ରିକ ନେଇଛନ୍ତି। ଏଥି ସହିତ ସେ ଦୁନିଆର ଚତୁର୍ଥ ବୋଲର, ଯିଏ ଚାରି ବଲରେ ଚାରି ଉଇକେଟ ନେଇଛନ୍ତି।
ହୋଲ୍ଡରଙ୍କ ପୂର୍ବରୁ ଆଫଗାନିସ୍ତାନର ରସିଦ ଖାନ, ଶ୍ରୀଲଙ୍କାର ଲାସିଥ ମାଲିଙ୍ଗା ଏବଂ ଆୟର୍ଲାଣ୍ଡର କୁର୍ତ୍ତି କେମ୍ପର ଅନ୍ତର୍ଜାତୀୟ କ୍ରିକେଟରେ ଏହି ସଫଳତା ହାସଲ କରିଛନ୍ତି। ଏହି ମ୍ୟାଚରେ ହୋଲ୍ଡର ମଧ୍ୟ ପାଞ୍ଚଟି ଉଇକେଟ ନେଇଛନ୍ତି।
ପାଞ୍ଚ ମ୍ୟାଚ ବିଶିଷ୍ଟ ସିରିଜରେ ଉଭୟ ଦଳ ପ୍ରତ୍ୟେକ ଦୁଇଟିରେ ବିଜୟ ହାସଲ କରିଥିଲେ ଏବଂ ପଞ୍ଚମ ମ୍ୟାଚ ସିରିଜର ନିର୍ଣ୍ଣାୟକ ଥିଲା। ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ୱେଷ୍ଟଇଣ୍ଡିଜ ୧୭୯ ରନ ସଂଗ୍ରହ କରିଥିଲା। ଅଧିନାୟକ ପୋଲାର୍ଡ ୪୧ ଏବଂ ରୋଭମାନ ପାୱେଲ ୩୫ ରନ ସ୍କୋର କରିଥିଲେ। ଇଂଲଣ୍ଡ ପାଇଁ ଆଦିଲ ରସିଦ ଏବଂ ଲିଭିଙ୍ଗଷ୍ଟୋନ ଦୁଇଟି ଲେଖାଏ ଉଇକେଟ ନେଇଥିଲେ। ୧୮୦ ରନ୍ର ଏକ ଟାର୍ଗେଟକୁ ପଛରେ ପକାଇ ଇଂଲଣ୍ଡ ୧୬୨ ରନ୍ରେ ଅଲଆଉଟ୍ ହୋଇଯାଇଥିଲା।
ୱେଷ୍ଟଇଣ୍ଡିଜ ଫେବୃୟାରୀ ୬ରୁ ଭାରତ ବିପକ୍ଷରେ ଦିନିକିଆ ଏବଂ ତା’ପରେ ଟି -୨୦ ସିରିଜ ଖେଳିବାକୁ ପଡିବ। ହୋଲ୍ଡର୍ ଉଭୟ ଫର୍ମାଟରେ ୱେଷ୍ଟଇଣ୍ଡିଜ ଦଳର ଏକ ଅଂଶ। ଏଭଳି ପରିସ୍ଥିତିରେ ଭାରତୀୟ ଖେଳାଳିଙ୍କୁ ସତର୍କ ରହିବାକୁ ପଡିବ।
