ପାଶ୍ଚାତ୍ୟ ଦେଶମାନେ ରୁଷିଆ ବିରୋଧରେ କରୁଛନ୍ତି ସିଧାସଳଖ ଲଢ଼େଇ: ସର୍ଗେଇ ଲାଭରୋଭ…

ମସ୍କୋ,୨୪।୯: ରୁଷିଆର ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭ ପାଶ୍ଚାତ୍ୟ ଦେଶଗୁଡ଼ିକୁ ମିଥ୍ୟା ସାମ୍ରାଜ୍ୟ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି କୃଷ୍ଣସାଗର ଶସ୍ୟ ଚୁକ୍ତିନାମାକୁ ପୁଣି ସ୍ବାଭାବିକ କରିବା ପାଇଁ ଉଦ୍ୟମ ସଫଳ ହେବ ନାହିଁ କାରଣ ଏଥିରେ ରୁଷିଆକୁ ଦିଆଯାଇଥିବା ପ୍ରତିଶ୍ରୁତି ବିଷୟରେ ଉଲ୍ଲେଖ କରାଯାଇ ନାହିଁ। ନ୍ୟୁଜ ଏଜେନ୍ସି ରଏଟର୍ସ ଏହି ସୂଚନା ଦେଇଛି।

ନ୍ୟୁୟର୍କରେ ମିଳିତ ଜାତିସଂଘ ମୁଖ୍ୟାଳୟରେ ସାଧାରଣ ସଭାର ବାର୍ଷିକ ବୈଠକ ପାଇଁ ଆସିଥିବା ବିଶ୍ୱ ନେତୃବୃନ୍ଦଙ୍କ ଏକ ସପ୍ତାହ ଆଲୋଚନା ପରେ ଲାଭରୋଭଙ୍କ ବିବୃତ୍ତି ଆସିଛି। ଏହି ଅବଧି ମଧ୍ୟରେ, ୟୁକ୍ରେନ ଏବଂ ଏହାର ପାଶ୍ଚାତ୍ୟ ସହଯୋଗୀମାନେ କିଭକୁ ସମର୍ଥନ କରିବା ପାଇଁ ସମସ୍ତ ପ୍ରକାର ପ୍ରୟାସ କରିଥିଲେ।

ନ୍ୟୁଜ ଏଜେନ୍ସି ଅନୁଯାୟୀ, ମିଳିତ ଜାତିସଂଘର ସାଧାରଣ ସଭାକୁ ସମ୍ବୋଧିତ କରିବାବେଳେ ଲାଭରୋଭ ପାଶ୍ଚାତ୍ୟ ଦେଶମାନଙ୍କ ଉପରେ ବର୍ଷିଥିଲେ। ସେ ଆମେରିକା ଏବଂ ପାଶ୍ଚାତ୍ୟ ଦେଶ ସ୍ବାର୍ଥପର ଭାବେ କାର୍ଯ୍ୟ କରୁଥିବା କହିଛନ୍ତି।

ଲାଭରୋଭ କହିଛନ୍ତି ଆମେରିକା ଏବଂ ଏହାର ପାଶ୍ଚାତ୍ୟ ସହଯୋଗୀମାନେ ଲଗାତାର ଦ୍ୱନ୍ଦ୍ୱ ସୃଷ୍ଟି କରୁଛନ୍ତି। ସେମାନେ କୃତ୍ରିମ ଭାବରେ ମାନବିକତାକୁ ଶତ୍ରୁ ଗୋଷ୍ଠୀରେ ବିଭକ୍ତ କରନ୍ତି ଏବଂ ସାମଗ୍ରିକ ଲକ୍ଷ୍ୟ ହାସଲ କରିବାରେ ବାଧା ସୃଷ୍ଟି କରନ୍ତି। ପ୍ରକୃତ ମଲ୍ଟିପୋଲାର ସିଷ୍ଟମ ଗଠନକୁ ରୋକିବା ପାଇଁ ସେମାନେ ସମସ୍ତ ସମ୍ଭାବ୍ୟ ପ୍ରୟାସ କରୁଛନ୍ତି ।

ଲାଭରୋଭ ଖବରଦାତାଙ୍କୁ କହିଛନ୍ତି ପାଶ୍ଚାତ୍ୟ ଶକ୍ତିମାନେ ୟୁକ୍ରେନକୁ ସମର୍ଥନ କରି ମସ୍କୋ ବିରୋଧରେ ସିଧାସଳଖ ଲଢ଼େଇ କରିଛନ୍ତି। ନ୍ୟୁଜ ଏଜେନ୍ସି ଅନୁଯାୟୀ, ସେ ଆହୁରି ମଧ୍ୟ କହିଛନ୍ତି ଆପଣ ଏହାକୁ ଅନ୍ୟ କୌଣସି ନାମ ଦେଇପାରିବେ, କିନ୍ତୁ ସେହି ପାଶ୍ଚାତ୍ୟ ଦେଶମାନେ ସିଧାସଳଖ ଆମ ସହ ଲଢୁଛନ୍ତି। ଆମେ ଏହାକୁ ହାଇବ୍ରିଡ ଯୁଦ୍ଧ ବୋଲି କହିଥାଉ, କିନ୍ତୁ ଏହା କିଛି ପରିବର୍ତ୍ତନ କରିବାକୁ ଯାଉନାହିଁ ।

ସେ ୟୁକ୍ରେନବାସୀଙ୍କ ମାଧ୍ୟମରେ ରୁଷିଆ ବିରୁଦ୍ଧରେ ଲଢୁଥିବା ପାଶ୍ଚାତ୍ୟ ଦେଶଗୁଡିକୁ ସୂଚାଇ କହିଛନ୍ତି ପାଶ୍ଚାତ୍ୟ ଦେଶମାନେ ୟୁକ୍ରେନୀୟମାନଙ୍କ ହାତ ଏବଂ ଶରୀର ବ୍ୟବହାର କରି ଆମ ବିରୁଦ୍ଧରେ ଲଢୁଛନ୍ତି। ସେ ଆହୁରି ମଧ୍ୟ କହିଛନ୍ତି ଏଠାରେ ଉପସ୍ଥିତ ସମସ୍ତେ ଜାଣନ୍ତି ଯେ ଆମେରିକା, ବ୍ରିଟେନ ଏବଂ ଅନ୍ୟ ଦେଶମାନେ ଅଧିକରୁ ଅଧିକ ଅସ୍ତ୍ରଶସ୍ତ୍ର ଯୋଗାଇ ରୁଷିଆ ବିରୋଧରେ ଲଢୁଛନ୍ତି।