ନୂଆଦିଲ୍ଲୀ, ୩୦ା୧୨: କ୍ରୀଡ଼ା ମନ୍ତ୍ରଣାଳୟର ଆପତ୍ତି ଉଠାଇବା ପରେ ଭାରତ କୁସ୍ତି ମହାସଂଘ (ଡବ୍ଲ୍ୟୁଏଫ୍ଆଇ) ଶୁକ୍ରବାର ଏହାର କାର୍ଯ୍ୟାଳୟକୁ ମହାସଂଘର ପୂର୍ବତନ ସଭାପତି ତଥା ଭାଜପା ଏମ୍ପି ବ୍ରିଜଭୂଷଣ ଶରଣ ସିଂଙ୍କ ବାସଭବନରୁ ଅନ୍ୟତ୍ର ସ୍ଥାନାନ୍ତର କରିବାକୁ ବାଧ୍ୟ ହୋଇଛି।
ଡବ୍ଲ୍ୟୁଏଫ୍ଆଇର ନୂଆ କାର୍ଯ୍ୟାଳୟ ନୂଆଦିଲ୍ଲୀସ୍ଥିତ ହରି ନଗରରେ ଅବସ୍ଥିତ। ସଭାପତି ସଞ୍ଜୟ ସିଂଙ୍କ ନେତୃତ୍ୱରେ ନୂଆ ଡବ୍ଲ୍ୟୁଏଫ୍ଆଇ ପ୍ୟାନେଲ ଗଠନ ହେବାର ୩ ଦିନ ପରେ ଡିସେମ୍ବର ୨୪ରେ କ୍ରୀଡ଼ା ମନ୍ତ୍ରଣାଳୟ ଦ୍ୱାରା ସସ୍ପେଣ୍ଡ ହୋଇଛି। ବ୍ରିଜ ଭୂଷଣଙ୍କ ବାସଭବନରେ କାର୍ଯ୍ୟାଳୟ ଚଳାଇବା ଏହି କାର୍ଯ୍ୟାନୁଷ୍ଠାନ ପଛରେ ରହିଥିବା କାରଣଗୁଡ଼ିକ ମଧ୍ୟରେ ଅନ୍ୟତମ। ମହାସଂଘର ସମସ୍ତ କାର୍ଯ୍ୟ ପୂର୍ବତନ କର୍ମକର୍ତ୍ତା (ବ୍ରିଜ ଭୂଷଣ)ମାନଙ୍କ ଦ୍ୱାରା ପରିଚାଳିତ ହେଉଥିଲା, ଯେଉଁ ପରିସରରେ କି ମହିଳା କୁସ୍ତିଯୋଦ୍ଧା ଯୌନ ଶୋଷଣର ଶିକାର ହେଉଥିଲେ ବୋଲି ଅଭିଯୋଗ ହୋଇଛି। ମାମଲା ବର୍ତ୍ତମାନ କୋର୍ଟରେ ବିଚାରଧୀନ ରହିଛି ବୋଲି ମନ୍ତ୍ରଣାଳୟ ଏହାର ଚିଠିରେ ଉଲ୍ଲେଖ କରିଛି। ଡବ୍ଲ୍ୟୁଏଫ୍ଆଇର ନୂଆ ପରିଚାଳନା ପରିଷଦ ସମ୍ପୂର୍ଣ୍ଣ ଭାବେ ପୂର୍ବତନ କର୍ମକର୍ତ୍ତାଙ୍କ ନିୟନ୍ତ୍ରିତ ହେଉଥିଲା, ଏହାଦ୍ୱାରା ଜାତୀୟ କ୍ରୀଡ଼ା ଆଚରଣ ବିଧି ଉଲ୍ଲଂଘନ ହେଉଛି ବୋଲି ମଧ୍ୟ ମନ୍ତ୍ରଣାଳୟ କହିଥିଲା। ଅଲିମ୍ପିକ ପଦକ ବିଜେତା ବଜରଙ୍ଗ ପୁନିଆ ଓ ସାକ୍ଷୀ ମଲିକ ଏବଂ ବିଶ୍ୱ ଚାମ୍ପିୟନଶିପ୍ ପଦକ ବିଜେତା ଭିନେଶ ଫୋଗଟ ବ୍ରିଜ ଭୂଷଣଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଛି। ଏହି ମାମଲାର ଶୁଣାଣି ବର୍ତ୍ତମାନ ଦିଲ୍ଲୀ ହାଇକୋର୍ଟରେ ହେଉଛି। ସୂଚନାଯୋଗ୍ୟ, ଡିସେମ୍ବର ୨୧ରେ ବ୍ରିଜ ଭୁଷଣଙ୍କ ଅନ୍ୟତମ ଘନିଷ୍ଠ ସହଯୋଗୀ ସଞ୍ଜୟ ସିଂ ଡଡବ୍ଲ୍ୟୁଏଫ୍ଆଇର ମୁଖ୍ୟ ଭାବେ ନିର୍ବାଚିତ ହେବା ପରେ ସାକ୍ଷୀ କୁସ୍ତିରୁ ଅବସର ନିଷ୍ପତ୍ତି ନେଇଥିବାବେଳେ ବଜରଙ୍ଗ ପଦ୍ମଶ୍ରୀ ଫେରାଇ ଦେଇଥିଲେ ଏବଂ ଭିନେଶ ତାଙ୍କର ଖେଳରନତ୍ ଓ ଅର୍ଜୁନ ପୁରସ୍କାର ଫେରାଇଦେବାକୁ ନିଷ୍ପତ୍ତି ନେଇଛନ୍ତି। ମହାସଂଘ ଏହି ଭାଜପା ଏମ୍ପିଙ୍କ କୌଣସି ଘନିଷ୍ଠ କିମ୍ବା ଅନୁଗତଙ୍କ ଦ୍ୱାରା ପରିଚାଳିତ ନ ହେଉ ବୋଲି ସେମାନେ ଚାହାନ୍ତି। ଡବ୍ଲ୍ୟୁଏଫ୍ଆଇ ବର୍ତ୍ତମାନ ସସ୍ପେଣ୍ଡ ହୋଇଥିବାରୁ ଏହାର ପରିଚାଳନା ପାଇଁ ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ପୁଣି ଥିରେ ଭାରତ ଉଷୁ ଆସୋସିଏଶନ ମୁଖ୍ୟ ଭୂପିନ୍ଦର ସିଂ ବାଜଓ୍ବାଙ୍କ ଅଧ୍ୟକ୍ଷତାରେ ଏକ ୩ ଜଣିଆ ସଦସ୍ୟ ବିଶିଷ୍ଟ ଆଡହକ୍ କମିଟି ଗଠନ କରିଛି।