ପାଟନା, ୨୦ା୧୦: ବିହାରର ଏକ ସରକାରୀ ସ୍କୁଲରେ ୭ମ ଶ୍ରେଣୀ ପରୀକ୍ଷା ପ୍ରଶ୍ନପତ୍ରରେ କଶ୍ମୀର ଉପରେ ପଚରାଯାଇଥିବା ପ୍ରଶ୍ନକୁ ନେଇ ବିବାଦ ଦେଖାଦେଇଛି। ଏଥିରେ କଶ୍ମୀରକୁ ଏକ ଦେଶ ଦର୍ଶାଯିବା ସହ କଶ୍ମୀରବାସୀଙ୍କୁ କ’ଣ କୁହାଯାଏ ବୋଲି ପ୍ରଶ୍ନ ପଚରାଯାଇଛି। କିଶନଗଞ୍ଜ ଜିଲାରେ ଥିବା ଏହି ସ୍କୁଲର ଅର୍ଦ୍ଧବାର୍ଷିକୀ ପରୀକ୍ଷାରେ ସାମାଜିକ ବିଜ୍ଞାନ ପ୍ରଶ୍ନପତ୍ରରେ ଏପରି ପ୍ରଶ୍ନ କରାଯିବାକୁ ନେଇ ରାଜ୍ୟ ଶିକ୍ଷାମନ୍ତ୍ରୀ ଚନ୍ଦ୍ରଶେଖର ସିଂ ତଦନ୍ତ ନିର୍ଦ୍ଦେଶ ଦେଇଛନ୍ତି।
ଉଲ୍ଲେଖ କରାଯାଇଛି, ନିମ୍ନରେ ଦିଆଯାଇଥିବା ଦେଶର ଲୋକଙ୍କୁ କ’ଣ କୁହାଯାଏ। ଯେପରି ଚାଇନା ଲୋକଙ୍କୁ ଚାଇନିଜ୍, ସେପରି କଶ୍ମୀର ଲୋକଙ୍କୁ କ’ଣ କୁହାଯାଏ। ଭାରତର ଲୋକଙ୍କୁ କ’ଣ ଡକାଯାଏ ବୋଲି ପ୍ରଶ୍ନ ରହିଛି। ତେବେ ଷ୍ଟେଟ୍ କାଉନସିଲ୍ ରିସର୍ଚ୍ଚ ଆଣ୍ଡ୍ ଟ୍ରେନିଂ (ଏସ୍ସିଇଆର୍ଟି) ଏହି ପ୍ରଶ୍ନପତ୍ର ପ୍ରସ୍ତୁତ କରିଛି। ଏହି ଦାୟିତ୍ୱ ବିହାର ଏଜୁକେଶନ ପ୍ରୋଜେକ୍ଟ କାଉନ୍ସିଲ (ବିଇପିସି) ଏବଂ ଏଥିରେ ଜିଲାର କୌଣସି ଭୂମିକା ନାହିଁ ବୋଲି ଜଣେ ସ୍ଥାନୀୟ ପ୍ରଶାସନିକ ଅଧିକାରୀ କହିଛନ୍ତି। ଘଟଣାରେ ବିଇପିସିକୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ସ୍କୁଲ ପ୍ରଧାନଶିକ୍ଷକ ଏସ୍.କେ. ଦାସ ଏହାକୁ ମାନବୀୟ ତ୍ରୁଟି ବୋଲି କହିଛନ୍ତି। କଶ୍ମୀରରେ ରହୁଥିବା ଲୋକଙ୍କୁ କ’ଣ କୁହାଯାଏ ବୋଲି ପ୍ରଶ୍ନ କରାଯିବାର ଥିଲା।
ହେଲେ ଭୁଲ୍ବଶତଃ ଏହାକୁ ‘କେଉଁ ଦେଶର ଲୋକଙ୍କୁ କ’ଣ କୁହାଯାଏ’ ପ୍ରଶ୍ନ ତାଲିକାରେ ରଖାଯାଇଥିବା ସେ କହିଛନ୍ତି। ଏହାକୁ ନେଇ ବିହାର ଭାଜପା ନୀତୀଶ କୁମାରଙ୍କ ସରକାରଙ୍କୁ ଟାର୍ଗେଟ କରିଛି। ରାଜ୍ୟ ସରକାର ତୁରନ୍ତ ଦୋଷୀଙ୍କୁ ଚିହ୍ନଟ କରି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ବିହାର ଭାଜପା ସଭାପତି ସଞ୍ଜୟ ଯଶଓ୍ବାଲ ଦାବି କରିଛନ୍ତି। ଘଟଣାର ଯାଞ୍ଚ କରି ତଦନ୍ତ ରିପୋର୍ଟ ଦାଖଲ କରିବାକୁ ଶିକ୍ଷାମନ୍ତ୍ରୀ ଜିଲା ମାଜିଷ୍ଟ୍ରେଟଙ୍କୁ ନିର୍ଦ୍ଦେଶ ଦେଇଥିବା କହିଛନ୍ତି।