ନୂଆଦିଲ୍ଲୀ,୧୮।୧: ଭାରତୀୟ କୁସ୍ତି ମହାସଂଘର ସଭାପତି ତଥା ଭାଜପା ଏମ୍ପି ବ୍ରିଜ ଭୂଷଣ ଶାରନ ସିଂଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣି ଜନ୍ତରମନ୍ତରରେ ବିକ୍ଷୋଭ ପ୍ରଦର୍ଶନ କରୁଛନ୍ତି ରେସଲର୍। ସେମାନେ ସଭାପତି ପରିବର୍ତ୍ତନ କରିବାକୁ ଅଡି ବସିବା ସହ ଦାବି ପୂରଣ ନ ହେବା ଯାଏ ଧାରଣା ଜାରି ରହିବ ବୋଲି କହିଛନ୍ତି। ଏବେ ଏହି ପ୍ରସଙ୍ଗରେ ବ୍ରିଜ ଭୂଷଣଙ୍କ ପ୍ରତିକ୍ରିୟା ଆସିଛି। ଫେଡେରେସନ କୌଣସି ଖେଳାଳିଙ୍କ ନିର୍ଯାତନା ଦେଇଛି ବୋଲି କ’ଣ କେହି ଆଗକୁ ଆସି କହିପାରିବେ ବୋଲି ସେ ପ୍ରଶ୍ନ କରିଛନ୍ତି।
ନିଜର ମତ ରଖି ସେ କହିଛନ୍ତି, ଧାରଣା ବିଷୟରେ ମୁଁ ଜାଣିବା ମାତ୍ରେ ବିମାନ ଟିକେଟ କରି ଆସିଛି। ଅଭିଯୋଗ କ’ଣ ମୁଁ ପ୍ରଥମେ ଜାଣି ନ ଥିଲି। ଭିନେଶ ଯେଉଁ ସବୁଠୁ ବଡ ଅଭିଯୋଗ କରିଛନ୍ତି। ହେଲେ କେହି ଅଛନ୍ତି ଯିଏ କହିପାରିବେ ଯେ ଫେଡେରେଶନ କୌଣସି ଖେଳାଳିଙ୍କୁ ହଇରାଣ କରିଛି। ଗତ ଦଶ ବର୍ଷ ଧରି ଫେଡେରେଶନଠାରୁ କୌଣସି ଅସୁବିଧା ହେଉ ନ ଥିଲା।
ହେଲେ ଯେତେବେଳେ ନୂତନ ନିୟମ ଅଣାଯାଏ ସେତେବେଳେ ପ୍ରସଙ୍ଗ ସାମ୍ନାକୁ ଆସେ। ବିକ୍ଷୋଭରେ ବସିଥିବା କୁସ୍ତିଯୋଦ୍ଧାମାନେ ଅଲିମ୍ପିକ୍ସ ପରେ କୌଣସି ଜାତୀୟ ଟୁର୍ନାମେଣ୍ଟରେ ଭାଗ ନେଇ ନାହାନ୍ତି। ଖେଳାଳିଙ୍କୁ କୌଣସି ପ୍ରକାର ନିର୍ଯାତନା ଦିଆଯାଇନାହିଁ। ଯଦି ଏହା ପ୍ରମାଣିତ ହୁଏ ମୁଁ ଫାଶିରେ ଝୁଲି ପଡ଼ିବି। ଏଥିରେ କେହି ବଡ଼ ବ୍ୟକ୍ତିଙ୍କ ହାତ ରହିଛି, ଏକ ବଡ଼ ଶିଳ୍ପପତିଙ୍କ ହାତ, ଏହା ଏକ ଷଡଯନ୍ତ୍ର ବୋଲି ସେ କହିଛନ୍ତି।
ଏହାଛଡ଼ା ସେ କହିଛନ୍ତି, ୯୭ ପ୍ରତିଶତ ଖେଳାଳି ମୋ ସହିତ ଅଛନ୍ତି। ଯଦି ଆପଣ ଚାହାଁନ୍ତି, ଭୋଟ କରାଇ ନିଅନ୍ତୁ। ଯୌନ ଉତ୍ପୀଡ଼ନ ଏକ ବଡ ଅଭିଯୋଗ। ମୋର ନାମ ଏଥିମଧ୍ୟକୁ ଟଣାଯାଇଥିବାରୁ କାର୍ଯ୍ୟାନୁଷ୍ଠାନ ନେଇପାରିବି ନାହିଁ। ହେଲେ ଯାଞ୍ଚ ଲାଗି ପ୍ରସ୍ତୁତ ବୋଲି ସେ କହିଛନ୍ତି।