ଦୁବାଇ, ୧୯।୧୦: ଆଇପିଏଲ୍ ତ୍ରୟୋଦଶ ସଂସ୍କରଣରେ ରବିବାର ମୁମ୍ବାଇ ଇଣ୍ଡିଆନ୍ସ ଓ କିଙ୍ଗ୍ସ ଇଲେଭେନ ପଞ୍ଜାବ ମଧ୍ୟରେ ଟୁର୍ନାମେଣ୍ଟ ଇତିହାସରେ ସବୁଠାରୁ ରୋମାଞ୍ଚକ ମ୍ୟାଚ୍ ଦେଖିବାକୁ ମିଳିଥିଲା। ୨୦ ଓଭର ଖେଳ ପରେ ଦୁଇ ଦଳ ସ୍କୋର ୧୭୬-୧୭୬ରେ ସମାନ ରହି ସୁପର୍ ଓଭରକୁ ଯାଇଥିଲା। କିନ୍ତୁ ରୋମାଞ୍ଚର ସମସ୍ତ ସୀମା ଅତିକ୍ରମ କରିସାରିଥିଲା ଯେତେବେଳେ ଉଭୟ ଦଳ ସୁପର୍ ଓଭରରେ ସମାନ ୫-୫ ରନ କରିବାକୁ ସକ୍ଷମ ହୋଇଥିଲେ।
ହୋଇଥିବା ପରିବର୍ତ୍ତନ ଯୋଗୁ ପ୍ରଥମ ସୁପର୍ ଓଭର ଟାଇ ରହିବା ପରେ ଦ୍ୱିତୀୟ ସୁପର୍ ଓଭର ଦେଖିବାକୁ ମିଳିଥିଲା। ଦ୍ୱିତୀୟ ସୁପର୍ ଓଭରରେ କିନ୍ତୁ ମୁମ୍ବାଇକୁ ମାତ୍ ଦେଇ କିଙ୍ଗ୍ସ ଇଲେଭେନ ପଞ୍ଜାବ ୨ ପଏଣ୍ଟ ହାତେଇ ନେଇଥିଲା। ଉଲ୍ଲେଖଯୋଗ୍ୟ, ଗତବର୍ଷ ଖେଳାଯାଇଥିବା ଆଇସିସି ବିଶ୍ୱକପ୍ ପରେ ସୁପର୍ ଓଭର ନିୟମରେ ପରିବର୍ତ୍ତନ କରାଯାଇଥିଲା। ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଇଥିବା ବିଶ୍ୱକପ୍ ଫାଇନାଲରେ ସୁପର୍ ଓଭର ଟାଇ ରହିବା ପରେ ଫଳାଫଳ ପାଇଁ ବାଉଣ୍ଡରୀ ହିସାବ କରାଯାଇଥିଲା। ଅର୍ଥାତ୍ ଯେଉଁ ଦଳ ଅଧିକ ବାଉଣ୍ଡରୀ ମାରିଥିବା ସେହି ଦଳକୁ ବିଜେତା ଘୋଷିତ କରାଯାଇଥିଲା। ଏହି ଆଧାରରେ ଇଂଲଣ୍ଡ ଚାମ୍ପିୟନ ହୋଇଥିଲା। କିନ୍ତୁ ଏହି ବାଉଣ୍ଡରୀ ନିୟମକୁ ନେଇ ସେତେବେଳେ ଆଇସିସିକୁ ବେଶ୍ ସମାଲୋଚନା ହେବାକୁ ପଡ଼ିଥିଲା।
ତେବେ ଏହାପରେ ସୁପର୍ ଓଭର ନିୟମରେ ପରିବର୍ତ୍ତନ କରାଯାଇଥିଲା। ବର୍ତ୍ତମାନ ନୂତନ ନିୟମ ଅନୁଯାୟୀ ଯଦି ମ୍ୟାଚ୍ ପରେ ସୁପର୍ ଓଭର ମଧ୍ୟ ଟାଇରେ ଶେଷ ହେଉଛି ତେବେ ଫଳାଫଳ ପାଇଁ ଦ୍ୱିତୀୟ ସୁପର୍ ଓଭର ଖେଳାଯିବ। କିନ୍ତୁ ଯଦି ୨ୟ ସୁପର୍ ଓଭର ଟାଇ ରୁହେ ତେବେ ଫଳାଫଳ ପାଇଁ ଆଉ ଏକ ସୁପର୍ ଓଭରର ସହାୟତା ନିଆଯିବ। ଏହିଭଳି ଭାବେ ଫଳାଫଳ ବାହାରିବା ଯାଏ ସୁପର୍ ଓଭର ଖେଳାଯିବ। ସ୍ମରଣଯୋଗ୍ୟ, ୨୦୦୮ରେ ପ୍ରଥମେ ଟି୨୦ରେ ସୁପର୍ ଓଭର ନିୟମ ଆରମ୍ଭ ହୋଇଥିଲା। ଏହାପରେ ୨୦୧୧ ବିଶ୍ୱକପ୍ରେ ଏହାକୁ ସାମିଲ କରାଯାଇଥିଲା। ଏଥିପୂର୍ବରୁ କିନ୍ତୁ ମ୍ୟାଚ୍ ଟାଇ ରହୁଥିଲେ ଫଳାଫଳ ପାଇଁ ‘ବଲ୍ ଆଉଟ୍’ ପଦ୍ଧତି ଆପଣା ଯାଉଥିଲା। ‘ବଲ୍ ଆଉଟ୍’ରେ ଉଭୟ ଦଳର ୫ ଜଣ ଲେଖାଏ ବୋଲିଂ କରିବାର ସୁଯୋଗ ପାଉଥିଲେ ଏବଂ ବୋଲିଂ କରି ଷ୍ଟମ୍ପ୍ ଖସାଇବାକୁ ଚେଷ୍ଟା କରୁଥିଲେ। ଷ୍ଟମ୍ପରେ ଅଧିକଥର ବଜାଇଥିବା ଦଳକୁ ବିଜେତା ଘୋଷିତ କରାଯାଉଥିଲା।