ସମସ୍ତେ ଭଲ ସୁଯୋଗ ପାଇଲେ ବା ଅଧିକ ଦରମା ପାଇଲେ ଚାକିରି ପରିବର୍ତ୍ତନ କରିଥା’ନ୍ତି । ତେବେ ଏଭଳି କ୍ଷେତ୍ରରେ ସାଲାରୀ ଆକାଉଣ୍ଟ କ’ଣ ହୁଏ ? ଏହାକୁ ନେଇ ଅନେକ ଚିନ୍ତାରେ ପଡ଼ିଯାଆନ୍ତି । ବେଳେବେଳେ ଲୋକେ ଭାବନ୍ତି ପୂର୍ବ କମ୍ପାନୀର ସାଲାରୀ ଆକାଉଣ୍ଟ ବନ୍ଦ କରିଦେବେ ନା ତାକୁ ଚଲାଇବେ । ତାହାକୁ ସାଧାରଣ ସେଭିଂସ ଆକାଉଣ୍ଟ ଭାବେ ଚଳାଇବେ ନା ଆଉ ଏକ ନୂଆ ଆକାଉଣ୍ଟ ଖୋଲିବେ ।
ଆପଣ ଯଦି ଚାକିରି ଛାଡ଼ନ୍ତି ତେବେ ସାଲାରୀ ଆକାଉଣ୍ଟ ସେଭିଂସ ଆକାଉଣ୍ଟରେ ବଦଳିଯାଏ । ଦରମା ମିଳୁଥିବା ପର୍ଯ୍ୟନ୍ତ ତାହା ସାଲାରୀ ଆକାଉଣ୍ଟ ହୋଇ ରହିଥାଏ । କେତେକ ବ୍ୟାଙ୍କ ସାଲାରୀ ଆକାଉଣ୍ଟକିୁ କିଛିଦିନ ପରେ ସେଭିଙ୍ଗସ ଆକାଉଣ୍ଟରେ ବଦଳାଇ ଦିଅନ୍ତି । ଯେତେବେଳେ କି ଆଉ କିଛି ବ୍ୟାଙ୍କ ତାହାକୁ ସାଲାରୀ ଆକାଉଣ୍ଟ ଭାବେ ହିଁ ରଖିଥା’ନ୍ତି । ସାଲାରୀ ଆକାଉଣ୍ଟରେ ସର୍ବନିମ୍ନ ବାଲାନ୍ସର ଆବଶ୍ୟକତା ନ ଥାଏ । କିନ୍ତୁ ତାହା ବଦଳିଗଲେ ସର୍ବନିମ୍ନ ବାଲାନ୍ସର ଆବଶ୍ୟକତା ପଡ଼େ । ଆପଣ ଯଦି ସର୍ବନିମ୍ନ ବାଲାନ୍ସ ରଖି ନ ଥିବେ ତେବେ ବ୍ୟାଙ୍କ ନନ ମେଣ୍ଟେନାନ୍ସ ଫି’ ଚାର୍ଜ କରେ ।
ଆପଣ ଜବ ସ୍ବିଚ କଲେ ନୂଆ ନିଯୁକ୍ତିଦାତାଙ୍କ ନିକଟରେ ଆଉ ଏକ ସାଲାରୀ ଆକାଉଣ୍ଟ କରିପାରିବେ । ଆପଣଙ୍କ ନିଯୁକ୍ତିଦାତା ଯେଉଁ ବ୍ୟାଙ୍କର ପାର୍ଟନର ଥାଆନ୍ତି ସେଠାରେ ନୂଆ ସାଲାରୀ ଆକାଉଣ୍ଟ ଖୋଲନ୍ତି । ସାଲାରୀ ଆକାଉଣ୍ଟରେ ଜିରୋ ବାଲାନ୍ସ, ଭଲ ସୁଧ ହାର ଓ ଅତିରିକ୍ତ ସେବା ମଧ୍ୟ ଉପଲବ୍ଧ ଥାଏ । କିନ୍ତୁ ନୂଆ ଜାଗାରେ ଚାକିରି କଲେ ସାଲାରୀ ଆକାଉଣ୍ଟ ବନ୍ଦ କରିବାର କିଛି ଆବଶ୍ୟକତା ନାହିଁ । କିନ୍ତୁ ତାହାକୁ ନିୟମିତ ଭାବେ ଦେଖିବା ଦରକାର ।
ଯେଉଁମାନେ ଇଏମଆଇ, ଏସଆଇପି, ଇନ୍ସୁରାନ୍ସ ପ୍ରିମିୟମ ଓ ୟୁଟିୟିଟି ବିଲକୁ ସାଲାରୀ ଆକାଉଣ୍ଟ ସହ ଅଟୋ ଡେବିଟ କରନ୍ତି ସେମାନେ ସମସ୍ୟାରେ ପଡ଼ିଥା’ନ୍ତି । ଯଦି ସାଲାରୀ ଆକାଉଣ୍ଟ ସେଭିଂସ ଆକାଉଣ୍ଟରେ ବଦଳିଯାଏ ଓ ଆପଣ ନୂଆ ସାଲାରୀ ଆକାଉଣ୍ଟ ଖୋଲନ୍ତି ତେବେ ଅଟୋ ଡେବିଟ ଇନଷ୍ଟ୍ରକ୍ସସନକୁ ଅପଡେଟ କରିବାର ଆବଶ୍ୟକତା ରହିଛି । ଯଦି ସେଭଳି ନକରନ୍ତି ତେବେ ଫାଇନ, ଲେଟ ଫି ଆଦି ପଡ଼ିଯିବ ।
