ଲେହ,୪।୭: ଚାଇନା ସୀମାରେ ମୁତୟନ ହୋଇଥିବା ଯବାନଙ୍କୁ ଉତ୍ସାହିତ କରିବା ପାଇଁ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଚାନକ ଲଦାଖର ରାଜଧାନୀ ଲେହରୁ ପ୍ରାୟ ୨୫ କିଲୋମିଟରରେ ଥିବା ନିମୁକୁ ଗସ୍ତ କରିଥିଲେ। ଲଦାଖର ଫରଓ୍ବାର୍ଡ ବ୍ରିଗେଡର ନିମୁରେ ପହଞ୍ଚିବା ପରେ ମୋଦି ସିନ୍ଧୁ ଦର୍ଶନ ପୂଜା କରିଥିଲେ। ଏହି ସମୟରେ ସେନା ମୁଖ୍ୟ ଏମ୍.ଏମ୍. ନରଓ୍ବଣେ ଓ ସିଡିଏସ୍ ମୁଖ୍ୟ ବିପିନ ରାଓ୍ବତ ଉପସ୍ଥିତ ଥିଲେ। ଗୋଟିଏ ପଟେ ନିମୁରେ ସେନାର ବ୍ରିଗେଡ ମୁଖ୍ୟାଳୟ ସହ ଅନେକ ସାମରିକ ରେଜିମେଣ୍ଟର ବାଟାୟଲିୟନ୍ ମୁଖ୍ୟାଳୟ ରହିଥିବା ବେଳେ ଅନ୍ୟପଟେ ଭାରତ ଇତିହାସ ସହ ଜଡିତ ଥିବା ସିନ୍ଧୁ ନଦୀ ରହିଛି। ପ୍ରତିବର୍ଷ ଏଠାରେ ଜୁନ କିମ୍ବା ଜୁଲାଇରେ ସିନ୍ଧୁ ଦର୍ଶନ ମେଳା ଆୟୋଜିତ ହୋଇଥାଏ। ଯାହା ୯୦ଦଶକରୁ ଭାଜପାର ବରିଷ୍ଠ ନେତା ତଥା ପୂର୍ବତନ ଉପମୁଖ୍ୟମନ୍ତ୍ରୀ ଏଲ୍.କେ. ଆଡଭାନୀଙ୍କ ଦ୍ୱାରା ଆରମ୍ଭ ହୋଇଥିଲା। ତେବେ ଚଳିତ ବର୍ଷ କରୋନା ଯୋଗୁ ଏହି ମେଳାର ଆୟୋଜନ ହୋଇପାରିନାହିଁ। ଅନ୍ୟପଟେ ନିମୁ ସୀମା ସ୍ଥିତିକୁ ନେଇ ବରିଷ୍ଠ ଅଧିକାରୀଙ୍କ ସହ ଆଲୋଚନା କରିବା ପରେ ମୋଦି ଯବାନଙ୍କୁ ସମ୍ବୋଧିତ କରିଥିଲେ। ଏହି ସମୟରେ ମୋଦି କାହାରି ନାମ ନ ନେଇ ଚାଇନାକୁ ଟାର୍ଗେଟ କରିଥିଲେ। ତେବେ ମୋଦିଙ୍କ ଅଚାନକ ଲେହ ଗସ୍ତକୁ ନେଇ ଚାଇନା ବିଚଳିତ ହୋଇପଡ଼ିଥିବା ବେଳେ ଏହା ମୋଦି ଡ୍ରାଗନକୁ ଏକ ଦୃଢ଼ ବାର୍ତ୍ତା ଦେଇଛି। ଆର୍ଥାତ୍ ଚାଇନା ବୁଝୁଥିବା ଭାଷାରେ ଭାରତ ଉତ୍ତର ଦେବାକୁ ପ୍ରସ୍ତୁତ ରହିଛି ବୋଲି କୁହାଯାଇଛି।