ଭୁବନେଶ୍ବର, ୩୦।୧୧(ବ୍ୟୁରୋ): ସୋମବାର ସାରେ ପଦ୍ମପୁର ଜଗଦମ୍ବା କ୍ଲଥ୍ ଷ୍ଟୋରରେ ଜିଏସ୍ଟି ଚଢ଼ାଉ ସମୟରେ ଭାଜପାର ୩ ଜଣ ନେତା ଠାକୁର ରଣଜିତ ଦାସ, ପିଙ୍କି ପ୍ରଧାନ ଏବଂ କାଳନ୍ଦୀ ସାମଲ ଜାଣିଶୁଣି ଗଣ୍ଡଗୋଳ ଭିଆଇଥିବା ଅଭିଯୋଗ ଆଣିଛି ବିଜେଡି। ଏହି ମର୍ମରେ ବିଜେଡିର ଏକ ପ୍ରତିନିଧି ଦଳ ମୁଖ୍ୟ ନିର୍ବାଚନ ଅଧିକାରୀଙ୍କୁ ଫେରାଦ ହୋଇ ଉକ୍ତ ୩ଭାଜପା ନେତାଙ୍କୁ ପଦ୍ମପୁରରୁ ତଡ଼ିପାର କରିବା ସହ ସେମାନଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନେବା ଲାଗି ଦାବି କରାଯାଇଛି। ସେହିପରି ପଦ୍ମପୁରରେ ସର୍ଭେଲାନ୍ସ ବଢ଼ାଇବାକୁ ବିଜେଡି ଦାବି କରିଛି। ବିଜେଡି ପକ୍ଷରୁ କୁହାଯାଇଛି, ଜିଏସ୍ଟି ଟିମ୍ର ଜଣେ ମହିଳା ଅଧିକାରୀଙ୍କୁ ଗୋଡ଼େଇ ଗୋଡ଼େଇ ଆକ୍ରମଣ କରିବା ସହ ଭାଜପା କର୍ମୀମାନେ ଗାଡ଼ି ପୋଡ଼ିଛନ୍ତି। କାହା ଟଙ୍କା ଧରାପଡ଼ିବା ଭୟରେ ଭାଜପା ଏଭଳି କାଣ୍ଡ କରିଛି ବୋଲି ବିଜେଡି ପ୍ରଶ୍ନ କରିଛି। କେଉଁ କେନ୍ଦ୍ରମନ୍ତ୍ରୀଙ୍କ ଟଙ୍କା ଧରାପଡ଼ିବାର ଭୟ ରହିଥିଲା। ଭାଜପା ଏସବୁ ପ୍ରଶ୍ନର ଉତ୍ତରଦେବା ଦରକାର ବୋଲି ବିଜେଡି କହିଛି। ସେହିପରି ଭାଜପା ନେତା ଦିଲୀପ କୁମାର ସେନାପତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଶାସକ ଦଳ ଦାବି କରିଛି। ସେ ବିଜେଡି କର୍ମୀଙ୍କୁ ଶାରୀରିକ ନିର୍ଯାତନା ଦେବା ସହିତ ପଦ୍ମପୁରରେ ଭୋଟରଙ୍କୁ ଟଙ୍କା ବାଣ୍ଟୁଥିବାର ବିଜେଡି ଅଭିଯୋଗ ଆଣିଛି।